Akwakuhoña Natutumbwa Niakwakuhoña Hohu Ashimunaña Yuma Yikamwekana?

AKWAKUHOÑA NATUTUMBWA

Kuhoña natutumbwa hikukuhwelela nawu tutumbwa, kakweji nimapulaneti jakwashaña antu ekala hamaseki. Akwakuhoña natutumbwa ahoshaña nawu kwesekeja neluña hadi katumbwa hampinji yinakuvwalikayi mwana yamwekeshaña yilwilu yakekalayi nayu niyuma yikamumwekena kumbidi yindi. Hela chakwila kuhoña natutumbwa kwatachikilili muBabiloni wakushankulu niyinu mpinji kuchidi kutwalekahu. Kwesekeja nachileji cha 2012 muUnited States, wumu hakachi kawantu asatu wakuhweleleli nindi kuhoña natutumbwa yadiña “sayansi,” nawa antu akushika kumapesenti 10 ahosheli nawu yadiña “sayansi chikupu.” Komana dimu? Inehi. Iwu diwu muloña waweni.

• Mapulaneti nitutumbwa hitukweti ñovu yakukwasha antu neyi chahoshañawu akwakuhoña natutumbwaku.

• Antu amavulu ahoshaña nawu yuma yikamwekana kumbidi yinateli kuzatika kudi muntu wudi wejima.

• Munanu mafuku akwakuhoña natutumbwa ashimunaña yuma yikamwekana kumbindi kwesekejaña nayuma yakuhweleleliwu kunyima yakwila nawu mapulaneti anyeñumukaña iseki. Ilaña, mapulaneti anyeñumukaña itañwa.

• Akwakuhoña natutumbwa ashimunaña yuma yambukaku hamuntu yowumu.

• Akwakuhoña natutumbwa ambulaña antu mumazanvu 12 nayinjikijilu kwesekeja namafuku awu akusemuka. Hamuloña wakunyeñumuka kweseki hayaaka yinahitihu, mafuku esekejeliwu nachinjikijilu esekenaña wanyi nayuma yesekejeliwu nachu neyi itañwa dinahiti dehi.

Yinjikijilu yashimunañawu akwakuhoña natutumbwa ayikuhwelela nawu yamwekeshaña chekala muntu. Ilaña, antu asemukili ifuku dimu hiyekala nayilwilu yoyimuku, ifuku dakusemuka muntu dalumbululaña wanyi chikekalayi. Chatela amoneña chekala antu, akwakuhoña natutumbwa atalaña yilwilu yekala namuntu niyuma yikamumwekena. Komana hikuluwañesha antuku?

AKWAKUHOÑA HOHU

Kufuma tuhu kushankulu, antu amavulu ehulaña akwakuhoña hohu. Antu akuluka yitembi mujakuhoña akeñaña kwiluka mwatalisha yuma yidi neyi jamwivumu dawanyama niantu hela chazookolañayi ikombu yakuda. Amakwawu ashimunaña yuma yakumbidi kuzatisha masamba hela kofi. Makonu azatishaña matarot cards, crystal balls, dice, niyuma yikwawu kulonda “ashimuni” mbidi yamuntu. Komana kuhoña hinjila yitwatela kushindamena hakwiluka yuma yakumbidi? Inehi. Tushinshikenu haniyi nsañu.

Tushinshikenu neyi ahoshaña mwomumu. Yuma yashimunañawu akwakuhoña hohu yambukaña hela anazatishi njila jashiyashana. Hela chakwila azatisha njila yimu ahoshaña yuma yambuka chikupu. Chakutalilahu neyi muntu yehula akwakuhoña hohu ayedi lwihu lwolumu nindi “alumbululi” munatalishi nsañu yidi hakaadi, atela kulumbulula nsañu yoyimu. Ilaña dichiyelañawu wanyi.

Antu anakujinooka njila yahoñelañamu akwakuhoña hohu nichaleteshaña nawu ahoñeña. Ahoshaña nawu makaadi hela macristal balls hiyuma yamukunkulwayi hohu nawa akwakuhoña hohu ashimunaña kwesekeja nayuma yinakuhoshayi muntu yomweni bayi neyi ashimunaña yuma yidi hamakaadiku. Chakutalilahu, mukwakuhoña hohu wakuluka yitembi wehulaña muntu malwihu nikutiyishisha nakanañachima chinakulumbululayi muntu kulonda chimukwashi kumulumbulwila. Mukwakuhoña hohu wukuzatisha nsañu yinamulumbulwiliwu kulonda yashimuni nsañu yamwekeni. Muntu chakuhwelelayi yuma yinashimuniyi, akwakuhoña amakwawu alombaña mali amavulu nankashi.

CHAHOSHA BAYIBOLU

Yuma yalumbululañawu akwakuhoña natutumbwa niakwakuhoña hohu yamwekeshaña nawu tunateli kwilukila dimu yuma yikatumwekena kumbidi. Komana mwalala? Bayibolu yatulejaña nawu tukweti wuswa wakutonda yuma yitwakuhwelela hela wakukeña kwila yuma yitunakukeña nawa yuma yitwafuukulaña mukafuma yuma yayiwahi hela yatama.—Yoshuwa 24:15.

Antu adifukulaña kudi Nzambi akaanaña akwakuhoña natutumbwa nikwakuhoña hohu muloña Nzambi wahela kuhoña kwejima. MuBayibolu twawanañamu awa mazu akwila nawu: “Kudeyi bayi kwakamwekana . . . mukwakuhoña, hela mukwakuhoña natutumbwa, hela wasansa nyiseñu, hela mukwakupanda, hela mukwakukaya, hela mukwakupesha, hela katepa, hela kadañuku. Muloña antu ejima elaña yumiyi Yehova wayimona nindi hiyakwakushimana.”a—Kuhituluka 18:10-12.