Kwañwila Heneni

YESU washimwineñahu dehi nindi atumbanji twindi akañwila heneni munanu mafuku akukuminina. (Mat. 9:37; 24:14) Talenu awa mazu chiyanashikijewi mwiluña daTranscarpathia, Ukraine. Mumatawuni asatu hohu adikumashana ekala munidi iluña, mwekala yipompelu 50 niakwakushimwina kubadika ha 5,400.a Mwamweni, munawa matawuni, hadi antu awana, muntu wumu hiChinsahu chaYehova.

Iluña dakushimwina dekala ñahi? Manakwetu Vasile washakamaña munidi iluña wahosheli nindi: “Antu kunu alemesha Bayibolu, akeña wuñanji, akweti yisaka yayiwahi nawa akeña kukwasha akwawu.” Wabombelelihu nindi: “Mpinji yikwawu akaanaña yuma yitwakuhwelela. Ilaña neyi muyitañila nsañu yimu muBayibolu, akutiyilila nakanañachima.”

Hela chochu, amanakwetu niahela amonaña kukala kwambukaku neyi anakushimwina mwiluña mudi akwakushimwina amavulu. Chakutalilahu, chipompelu chimu chidi nawakwakushimwina 134 ilaña munidi iluña mudi hohu matala 50. Akwakushimwina atweshaña ñahi kuzata?

Amanakwetu niahela amavulu ayaña nakushimwina kumaluña kudi kukankila. Ionash manakwetu wudi nayaaka 90 wahosheli nindi: “Iluña dachipompelu chetu, mukwakushimwina watela hohu kushimwina antu ayedi. Nashimwinineña mumukala, ilaña chineli ñovu yinamani, nayaña kwiluña kwabula akwakushimwina, nendaña makilomita 160, nashimwinaña mwidimi daHungarian.” Akwakushimwina atela kudihana kukwasha maluña amakwawu akushimwina. Ionash wahosheli nindi: “Hakwila nikandami sitima, nahindukileña na 04:00 nawa nashimwinineña kushika 18:00 mpinji yafuntileña sitima. Nelileña mwenimu kapampa kayedi hela kasatu mumulungu.” Watiyaña ñahi namudimu wazatileñayi? Wahosheli nindi: “Natiyileña muzañalu kushimwina muniyi njila. Nakwashili chisaka chimu kudiza chalala.”

Kuhosha hohu walala, bayi neyi antu ejima muyipompelu yamunidi iluña akutwesha kwenda maluña amalehiku. Ilaña, niakwakushimwina akula dehi azataña nañovu kushimwina chikupu mwiluña dawu dakushimwina. Chinafumimu, mu 2017, antu enjili kuChanukishu munawa matawuni asatu avulili kushika kuchibalu chawantu ejima ashakamaña munawa matawuni. Chakadi nikujina, kwejima kutunakukalakela, kudi “yuma yayivulu yakuzata mumudimu waMwanta.”—1 Kor. 15:58.