Komana Mukweti Iluña Denu?
1. Indi iluña denu dakuzatilamu hichumanyi?
1 Iluña denu hiiluña dayinkawu kuzatila. Datela kwikala kwakwihi nakumwashakama kulonda mutwesheña kushika swayi-swayi nakushimwina chili nkawenu hela namukwenu mukwakushimwina. Hela chakwila kulondela ntanjikilu yachipompelu yakushimwina hamu nezaza hichuma chachiwahi neyi chinatwesheki, kwikala neluña denu dakuzatilamu mpinji yikwawu chikuyikwasha kushimwina chikupu, sweje-e muyipompelu yikweti maluña amaneni akuzatila.—Yil. 10:42.
2. Kuwahanyi kwekala mukwikala neluña detu dakuzatila?
2 Nkisu: Amakwawu anawani nkisu jikwawu kuhitila mukushimwina mwiluña dawu didi kwakwihi nakwazatilañawu nampinji yachayili hela neyi anakumishi dehi kuzata. Amakwawu niwena adiluñishaña kuzatila hamu nachisaka mwiluña mwashakamañawu hadi ora yimu hela kubadikahu henohu mpinji yaKupompa kwaMukanda haChipompelu kanda yishiki. Chafumañamu, ekalaña nakufuntila nikudiza kwaBayibolu kwakuvulu mukamwihi, ichi chaleñelaña kubula kuzeya, nikumanisha mpinji, nimali. Chineli yuma yayivulu yinateli kuzatewa mukapinji kantesha, kwikala neluña denu kunateli kukwashaku amakwawu kuzataku wupayiniya wakukwasha mumpinji mumpinji hela kusonekesha wupayiniya wampinji yejima. Cheñi, kuzatila mwiluña denu nikudiluka nawenimatala kunateli kutukwashaku kuyikuhwelela nikuhimpa ntañishilu yetu kwesekeja nakukankila kwawu, nikuwahishaku mudimu wetu wakushimwina.
3. Chakuhumañananyi chapayiniya wumu watambwili iluña didi dakuzatilamu?
3 Payiniya wumu wamumbanda wakolesheluwu kudi nkoñi wañinza kwikala neluña dindi dakuzatila wahosheli nindi: “Netejeli mwanlejeluwu nawa nadilukili nikudikunda chikupu nawenimatala amwiluña dami. Nahimpili mpinji yakuyendela kwesekeja nanyidimu yawu. Chafuminimu, kufuntila kwami kwavulililuku kufuma ha 35 nakubadika ha 80 hakakweji, nawa nikweti kudiza kwaBayibolu 7.”
4. Munateli kutambula ñahi iluña dahalwenu nikuzatilamu?
4 Chakwikala Neluña: Neyi munakukeña kwikala neluña denu, hoshenu nankoñi watalaña hamaluña. Ikalenu akasunuka kutambika mukwenu mukwakushimwina kulonda muzati nindi, nawa hembenu wunsahu wamatala himukubula kuwana antu. Esekenu kumanisha iluña dejima mutukweji tuwaana. Neyi chinayikalili kwila mwenimu, mwatela kwihula nkoñi yenu waKudiza kwaMukanda haChipompelu hela amakwawu kulonda ayikwashuku. Neyi tukweji tuwaana tunamani dehi, munateli kufuntisha iluña dakumanisha dehi hela kulomba nenu muzatilumu cheñi. Hela chochu, himwatela kukakela mwiluña dimu hohuku ilaña difuntishenu kulonda amakwawu niwena atweshi kuzatilamu. Neyi mudi muchipompelu chikweti maluña antesha nawa chakala kutambula iluña denu, hadaha munateli kulomba chibalu cheluña kudi nkoñi wakudiza kwamukanda.
5. Chumanyi chinakukeñeka hakwila nawu tukalakali mudimu wetu wakushimwina?
5 Mudimu wetu wakushimwina ‘kwejima kwashakamawu antu’ himudimu wakutiyisha woma. (Mat. 24:14) Wakeñekaña kunuñañana kwakuwahi munzatilu. Kubombela hakuzatila hamu nezanvu, kushimwina mwiluña denu kunateli kutwikwasha kushimwina nsañu yayiwahi kudi antu amavulu.