Neyi Antu haMatala Hosi
1. Kukalanyi kwasweja kunakumwekana mumudimu wakushimwina kwitala nikwitala?
1 Mumaluña amavulu chinakukala nankashi kuwana antu hamatala. Muyinu “nyaka yakala,” antu amavulu chinakuyileñela kuzata maora amavulu hakwila awani yakudya. (2 Tim. 3:1) Amakwawu alukaña hanyikala yawu kuya nakudima hela kuya nakujaha inshi kulonda amoni mwakuhandila hela kuya nakuhema yisela. Hanu dinu tunateli kushimwina ñahi nsañu yayiwahi kudi antu amuchidiwu?
2. Twatela kwiluka ñahi netu twakafunta nakuzatila hamatala habulili antu?
2 Hembenu Wunsahu waKusoneka Chachiwahi: Njila yatachi yidi yakusoneka matala hanabuli antu. Ichi chalema sweje-e neyi mwazatilaña mwiluña denu kakavulu. Komana mwasonekaña majina anyikwakwa, naambala yeluña, ijina denu, niifuku? Mwatela kushiya iluña hakusonekela nsañu yikwawu neyi enu hela mukwakushimwina mukwawu yafunta nakuzatila matala habulili antu. Hakukuma kwampinji yakuzatila mwiluña, mwatela kuhana chipapilu hela nsañu kudi muntu wukweti kaadi yeluña, neyi yeteja kuzatila matala habulili antu. Zatishenu chipapilu chacheñi kusonekahu antu akumwekesha mpwila yimwakafuntilaku.
3. Jinjilanyi jitwatela kuzatisha hakushimwina antu yitwabulaña kuwana hamatala?
3 Esekenu Kuyaku Mpinji Yacheñi: Hadaha antu abulili kwikala hamatala mukachi kamulungu atela kwikala hamatala namelela hela kunsa yamulungu. Komana mwatela kuhimpa ndandanda yenu kulonda mwakayiku hampinji yayiwahi? (1 Kor. 10:24) Neyi nehi, mwatela kumwinka mukwakushimwina chipapilu chamatala himwabulili kuwana antu kulonda yakayiku mpinji yacheñi. Neyi nehi, mwatela kuyisonekela antu abulili kwikala hamatala hela kuyitumina nshiña. Akwakushimwina akañanyaña kushimwina kwitala nikwitala hamuloña wakukata atela kutiya kuwaha kuyikwashaku.
4. Chumanyi chinamwekeshi kulema kwakufuntila hamatala habulaña kuwanika antu?
4 Chakutalilahu chimu chamwekeshaña kulema kwakwendela antu abulaña kuwanika hamatala. Akwakushimwina hanyima yakukinkila hetala dimu hadi yaaka yisatu, nkumininaku amuwanini mwiniitala. Enjili nakwiluka nawu muntu yeniwu wadiña nakuhembelela nindi Chinsahu yamwendeli kulonda yatachiki cheñi kudiza kwaBayibolu kwadizileñayi henohu kanda yenzi kunidi iluña.
5. Mpinjinyi yamanaña iluña dakuzatilamu?
5 Manishenu Iluña Dejima: Mpinjinyi yitwatela kumanisha iluña dakuzatilamu? Kakavulu, chekalaña neyi tuzata nañovu yakuhosha namuntu hamatala ejima. Chatela kuwaha kushiya tilakiti hela magazini yayikulu mukubabala hamatala habula antu, sweje-e mumaluña mwabula kuzatilawu kakavulu. Iluña datela kumana mutukweji tuwana. Dichi iluña atela kuditala cheñi kulonda nkoñi weluña yasoneki munyikanda yindi.
6. Muloñadi wutwatela kushimwina nsañu yayiwahi kudi antu ekala mwiluña detu?
6 Tunakukeña antu amavulu kwikala nakukooleka kwakudiza kutambika hejina daYehova nakumona kuhanda. (Rom. 10:13, 14) Chinabombelimu niantu afumaña hamatalawu hampinji yitwashimwinaña kwitala nikwitala. Kufwana kapostolu Pawulu, ikalenu nampwila ‘yakushimuna chikupu nsañu yayiwahi yaluwi lwaNzambi.’—Yil. 20:24.