Kampeni Kadimena Kutachika HaOctober 16 Kushika haNovember 12!
1 “Kukuma kwaNsakililu yaKutwamba Kudi Mukamwihi!” Iwu diwu mutu waNsañu Yayiwahi Na. 37, yikahanewaña mukaayi kejima kutachika kakweji wunakwinza. Muchikunku chamafuku atachi aOctober, tukahanaña mamagazini aUlupungu lwa kwa Kalinda niLoleni! Kutachika hachimu, October 16, kushika haMulungu, November 12, twakakalakalaña mudimu weneni wakuhana Nsañu Yayiwahi Na. 37. Hakukuma kwamulungu hampinji yakampeni, twakayihaninaña hamu namagazini yakatataka.
2 Anyi Atela Kukalakala: Ejima anakushimwina chikupu nsañu yayiwahi akakeña kuzataku munaka kampeni. Amakwawu akazataku wupayiniya wakukwasha. Komana mukweti anyana hela atudizi aBayibolu anakukulilaku lwakuspritu? Yikwashenu ahoshi nawaeluda kulonda amoni neyi anashikuhu kwikala akwakushimwina abula kupapatishewa. Aeluda atela kwikala atachi kuhosha nawakwakushimwina anakushimpokela kulonda kuyikolesha akakalikaluku, hadaha kuhitila mukuzatila hamu nawakwakushimwina akuluka yitembi.
3 Naambala yamatirakiti yaNsañu Yayiwahi Na. 37 anakuyitemesha kuyipompelu yejima kulonda akwakushimwina akatambuli matalakiti akushika ku 24 hamuntu. Apayiniya ampinji yejima anayinki chipimu chakushika ku 48. Antu ejima niapayiniya atela kuhemba chipapilu chanaambala yakuvula kwamatirakiti akahanawu nikusoneka yumiyi kunyima yachipapilu chalipoti yamudimu wamwiha hakumana kwaOctober niNovember. Nsoneki wakachinda kuvula kwejima kwachipompelu nakuhana chileji kukasanji kamutayi kunsa yakakweji hikakweji. Makopi akashalahu atirakiti yaNsañu Yayiwahi hanyima yakukuma kwakampeni atela kuzatishewa munjila yidi yejima yamudimu.
4 Chakuhosha: Nhoshelu yenu yatela kwikala yayihi, ichi chikuyikwashaku kushimwina nsañu kudi antu amavulu. Mwatela kuhosha nenu: “Nidi mumudimu wakushimuna iyi nsañu yalema yamukaayi kejima yakukwashaku amavulu kuhetelamu. Iyi kopi nayinki chawana. Mwani muyitañi.” Chikubadika kuwaha neyi hitukusenda ipakumuna danyikanda mumudimu wakwitala nikwitalaku. Shenuku kashinshi kulonda muhembi chipapilu himwakasoneka antu yimukawana akamwekesha mpwila.
5 Chakushimwina Mwiluña Denu Dejima: Chatela muhaneña tirakiti yaNsañu yaWanta mumudimu wamumukwakwa, swejenu kushimwina nankashi kwitala nikwitala nimumaluña anyidimu neyi chinatwesheki. Sonekenu matala humukubula kuwana antu, kulonda mwakafuntiluku cheñi mpinji yikwawu hela ifuku dikwawu damumulungu. Kutachika haChimu November 6, mwatela kashiyaña kopi yimu hetala hanabuli antu. Hela chochu, neyi chipompelu chikweti maluña amavulu akuzatilamu yimukukañanya kushimwina muniyi mpinji yinapimuwu, aeluda atela kufuukulahu nawu tirakiti yaNsañu yaWanta atela kuyishiya hamatala hanabuli antu hampinji yakampeni kejima.
6 Kujilumuka ‘kwaBabiloni Muneni’ kunakunyakala nankashi. Antu atela kufuma muñanda yindi henohu kanda amujilumuni chikupu. (Chim. 14:8; 18:8) Ayinu diyi mpinji yakufuukulahu kukalakala chikupu munaka kampeni kamukaayi kejima kulonda kuleja antu eluki nawu kukuma kwansakililu yakutwamba kudi mukamwihi!