Kampeni Yadimena Yakuhana Tilakiti Kutachika haOctober 20–November 16!
1 Kutachika haChimu, October 20, twakekala nakampeni yadimena hadi nyilungu yiwana yakuhana tilakiti yayiha yidi namutu wunakwila nawu Komana Munakukeña Kwiluka Ñakwilu Yanawa Malwihu? Tunakuhweleli netu aka kampeni kadimena kamukaayi kejima kakukwasha antu amavulu kwikala nampwila yansulu yimu hohu yansañu yalala.—Yow. 17:17.
2 Iyi Tilakiti yahanaña ñakwilu yoloka kumalwihu alema atanu nakamu amuBayibolu: “Komana chalala Nzambi watwakamenaña?” “Indi njita nimakabi amba kamana?” “Chumanyi chatwimwekenaña neyi tunafwi?” “Komana kuduhu kuchiñeja kudi kwejima kwawa afu?” “Nateli kulomba munjilanyi hakwila nawu Nzambi yantiyi?” nawa “Nateli kuwana ñahi muzañalu muchihandilu?” Yipompelu yaKristendomu yakañanya kwakula ñakwilu yatelela yanawa malwihu. Hela antu amavulu abulaña kuditena nawu hiyakwaKristu ehulaña awa malwihu, ilaña atela eluka wanyi nawu ñakwilu yoloka yekala muBayibolu. Dichi tunakuhweleli netu iyi nsañu yikuleta ikoku kudi antu amavulu.
3 Shimwinenu Mwiluña Denu Dejima: Fwilenu kushimwina chikupu mwiluña denu dejima kwitala nikwitala. Neyi iluña denu dakushimwinamu deneni, aeluda anateli kuyileja kushiya tilakiti hamatala himukubula kuwana antu halwendu lwatachi. Anukenu kuhana tilakiti yayiha kudi atuñi nenu, antaña, amabwambu yimwazataña nawu hela akashikola niamakwawu mwahanjekaña nawu. Hadaha munateli kudiloñesha kulonda mwakazatuku wupayiniya wakukwasha muOctober hela muNovember. Komana mukweti mwana hela kadizi waBayibolu wunakuyilaku hambidi muchalala nawa wunateli kushikahu kuzata nanetu munaka kampeni neyi mukwakushimwina wabula kupapatishewa? Neyi dimu yilejenu aeluda.
4 Nsañu Yakuhosha: Hakwila nawa mushimwini antu amavulu, chikuwaha neyi mukwihihisha mazu yimukuhosha. Mwihulenu mwiniitala lwihu lumu hakachi kamalwihu atanu nakamu adi hewulu nawa mulejenu ñakwilu yidi mutilakiti. Ichi chikuleñela akwakushimwina ejima kwiluka mwakuhoshela kwesekeja nakukankila kwamwiluña dawu dakushimwinamu. Neyi muntu namwekeshi mpwila musonekenu, kulonda mwakafuntiluku. Kunsa yanyilungu, munateli kuhana magazini akatataka hamu nitilakiti. Chakamana kampeni haNovember 16, twakahanaña mukanda waChatañishaña Bayibolu. Neyi kunashali matilakiti amakwawu munateli kuyihana neyi chitwahanaña matilakiti amakwawu.
5 Tachikenu Kudiza kwaBayibolu: Iyi tilakiti anayiloñeshi kulonda kutukwasha kutachika kudiza kwaBayibolu. Neyi munafuntili kudi muntu wamwekesheli mpwila, munateli kumwihula nenu nsañwinyi yalala yamuBayibolu yayikundejeli hela kuyizañalesha? Mulejenu chipapilu chakunyima hanashimunuwu chitwadizaña Bayibolu, nawa mwinkenu Mukanda waChatañishaña Bayibolu. Neyi chinatwesheki tañenu mukwihihisha parakalafu yimu hela jiyedi hakapetulu kakweti nsañu yayivulu kutalisha hamutu wunatondiyi.
6 Yehova nakukeña antu atela kudifukula kudi yena ‘muspiritu nimuchalala.’ (Yow. 4:23) Komana wejima wetu tuzatenu kampeni kadimena kulonda tukwashi amakwawu kwiluka nsañu yalala.