Kwakekala Kuhana Tilakiti yaNsañu yaWanta Na. 38 muNovember
1. Malwihwinyi ehulañawu antu hadi afu, nawa awa malwihu akayakula ñahi muNovember?
1 Kufwa hichilumbu chawantu ejima, hichidi namuloña nayuma yimwakuhwelelaku. (1 Kor. 15:26) Antu amavulu eluka wanyi kwayañawu antu neyi anafwi nawa eluka wanyi neyi amba kayimona cheñi. Dichi, mukaayi kejima yipompelu yayivulu yikazata hadi kakweji kamu mumudimu wakuhana tilakiti Na. 38, yidi namutu wunakwila nawu Komana Afu Amba Kahanda Cheñi? Aka kampeni kalema kakatachika haNovember 1. Hanyima yakumanisha iyi kampeni, tilakiti yaNsañu yaWanta Na. 38 tukatachika kuyizatisha mumudimu wakushimwina.
2. Indi tilakiti yaNsañu yaWanta Na. 38 anayisoneki ñahi?
2 Chayisonekawu: Tilakiti yaNsañu yaWanta Na. 38 anayituñi munjila yakwila tutwesheña kuyivuña mukuleha kulonda chipapilu chahewulu chimwekesheña mutu wudi namazu akusañumuna akwila nawu “Komana mukwakula nenu . . . eña? inehi? hekwawu?” Ntañi chabakulayi tilakiti yaNsañu yaWanta, wukumona Bayibolu chiyinakwakula lwihu ludi hewulu nichikaninu chamuBayibolu chichinateli kumukwasha. Wukwiluka cheñi muloña watela kukuhwelelayi Bayibolu. Kuchipapilu chakunyima yaniyi tilakiti yaNsañu yaWanta kudi lwihu lwaluwahi lukushalayi nakutoñojokahu nawa lukumuleñela yekali nampwila yakukeña kudizilahu yuma yikwawu.
3. Indi tilakiti yaNsañu yaWanta Na. 38 akayihanaña ñahi?
3 Chakuyihana: Iyi kampeni yikekala neyi chochitwazataña kampeni yakutambika nachu antu kuChanukishu hela hakuhana yipapilu yakutambika nachu antu kukupompa kwankambi. Aeluda akahana nshimbi kutalisha hakushimwina mwiluña denu kwesekeja namukanda watambwililuwu wayisonekeleluwu haApril 1, 2013. Yipompelu yikweti maluña anyanya akushimwinamu yinateli kukwashaku yipompelu yakwakwihi yikweti maluña amaneni. Neyi himukusenda tilakiti yaNsañu yaWanta Na. 38, mwatela kusenda hohu matilakiti imwatela kuzatisha mumulungu wumu. Hampinji yakampeni, munateli kuhana matilakiti muwunsahu wakushimwina hatooka neyi mudimu wakushimwina kwitala nikwitala wunamani. Neyi munamanishi kuhana matilakiti ejima henohu kakweji kanda yamani, munateli kuhana nyikanda yakuhana munowu kakweji. Mposu yatachi tukasha maana hakuzata kampeni yalema kubadika kutachika kudizisha antu Bayibolu. Kunsa yamulungu tunateli cheñi kuhana nimagazini neyi chinatwesheki. Komana munakufuukulahu kuzata nañovu muniyi kapeni yalema?