Kutambika Antu Kuchawija Chadimena
1. Kampeni kakutambika antu kukupompa kwamu 2014 kakatachika mpinjinyi?
1 Neyi munakufwila kutambika amabwambu hela chisaka nakudya yakudya yayiwahi yimunazati nañovu hakwila muteleki, chakadi nikujina mukushaku kanshinshi hakuyitambika. Chochimu, amana kwetu anazati nañovu hakuloñesha chawija chakuspiritu chakekalaku hakupompa kwankambi nikwanyunza kwakekalaku mu 2014. Neyi kunashali dehi nyilungu yisatu nakutachika kupompa, twakekala nakukooleka kwakutambika antu kukupompa. Chumanyi chikutukwasha kuzata nañovu hakutambika antu?
2. Chumanyi chikatukwasha kuzata nañovu hampinji yakampeni?
2 Neyi tutoñojoka chitwakahetela kunichi chawija chakuspiritu chinatuloñesheliyi Yehova haniku kupompa, tukazata chikupu muniyi kampeni. (Isa. 65:13, 14) Twatela kwanuka cheñi netu mukampeni ketu kahachaaka hachaaka mwafumaña yuma yayiwahi. Antu amakwawu itwatambikaña enzaña nakupompa nanetu. Hichikweti muloña nawantu akenza nakupompaku, neyi tuzata nañovu hampinji yakampeni tukamwekesha netu Yehova himuwahi nawa tukamuhameka.—Mas. 145:3, 7; Chim. 22:17.
3. Twakahana ñahi jihandibilu?
3 Mazanvu ejima awaeluda atela kufuukulahu chakuhana chikupu jihandibilu muyipompelu yawu, nawa atela cheñi kufuukulahu neyi atela kushiya jihandibilu hamatala hanabuli antu hela muwunsahu wahatooka mwiluña dawu dakushimwina. Kunsa yanyilungu mwatela kuhana magazini hamu nahandibilu neyi chinatwesheki. Neyi Mposu yatachi yamukakweji yikala hamafuku akampeni, mwatela kusha kashinshi hakuhana handibilu bayi hakutachika kudizisha antu Bayiboluku. Neyi kampeni kanamani, tukatiya muzañalu chikupu hakwiluka netu twazatili nañovu hakutambika antu amavulu kwinza nakupompa nanetu kuchawija chakuspiritu chaloñesheliyi Yehova.