Kutambika Antu
1. Kampeni kakutambika antu kukupompa kakatachika mpinjinyi?
1 Neyi munakukeña kutambika chisaka hela amabwambu nakudya yakudya yayiwahi yimunazati nañovu hakwila muteleki, chakadi nikujina mukushaku kanshinshi hakuyitambika. Chochimu, amanakwetu anazati nañovu kuloñesha chawija chakuspiritu chakekalaku hakupompa kweluña. Neyi kunashali dehi nyilungu yisatu nakutachika kupompa, Yehova nakukeña nindi twakatambiki antu kukupompa. Chumanyi chikutukwasha kuzata nañovu kulonda tukatambiki antu?
2. Chumanyi chikatukwasha kuzata nañovu mukampeni?
2 Neyi tutoñojoka chitwakahetela kunichi chawija chakuspiritu chinatuloñesheliyi Yehova haniku kupompa, tukazata chikupu muniyi kampeni. (Isa. 65:13, 14) Twatela kwanuka cheñi netu mukampeni ketu kahachaaka hachaaka mwafumaña yuma yayiwahi. (Talenu chikasha chinakwila nawu “Mwafumaña Yuma Yayiwahi.”) Antu amakwawu itwatambikaña enzaña nakupompa. Hichikweti muloña nawantu akenza nakupompaku, neyi tuzata nañovu hampinji yakampeni tukamwekesha netu Yehova himuwahi nawa tukamuhameka.—Mas. 145:3, 7; Chim. 22:17.
3. Twakahanaña ñahi yipapilu yakutambika nachu antu?
3 Mazanvu ejima awaeluda atela kufuukulahu chakuhana yipapilu yakutambika nachu antu, nawa atela cheñi kufuukulahu neyi atela kushiya yipapilu hamatala hanabuli antu hela kuhana mwiluña dawu dakushimwina. Kunsa yanyilungu mwatela kuhana magazini hamu nachipapilu chakutambika nachu antu neyi chinatwesheki. Neyi kampeni kanamani, tukekala namuzañalu nankashi wakwiluka netu twazatili nañovu kutambika antu amavulu kwinza nakupompa nanetu kuchawija chakuspiritu chaloñesheliyi Yehova.