Tukatachika Kuhana Yipapilu Yakutambika Nachu Antu kuChanukishu haApril 2
1. Ifukwinyi ditwakatachika kuhana yipapilu yakutambika nachu antu kuChanukishu chinu chaaka, nawa iyi kampeni yahachaaka nichaaka yalemenadi?
1 Kutachika haApril 2 nakushika haApril 17, twakahanaña yipapilu yakutambika nachu antu kuchidika chasweja kulema muchaaka, Chanukishu chakufwa kwaKristu. Hayaaka yinahituhu antu akweti mpwila yakudiza Bayibolu atambulaña yipapilu yitwahanaña hakampeni yahachaaka nichaaka. Chakutalilahu, hefuku daChanukishu mumbanda wumu watemesheli nshiña kukasanji kamutayi nakuhosha nindi: “Nashiki hetala katataka, nawa nawani chipapilu chakuntambika nachu kwishina dachenzelu chami. Inakukeña kuya ilaña neluki wanyi mpinji yakutachika.” Mana kwetu wamulejeli hatela kuwanayi iyi nsañu hachipapilu chakutambika nachu antu. Ona mumbanda wahosheli nindi: “Nukuya kuchidika chenu namelela.”
2. Tunateli kuhosha netudi hakuhana chipapilu chakutambika nachu antu?
2 Chitukahanaña: Chineli tukweti mpinji yantesha yakuwanisha iluña detu dakushimwina, chikuwaha neyi tukuhosha mazu antesha. Tunateli kuhosha netu: “Ñahi mwani. Tunakukeña kwinka chisaka chenu ichi chipapilu kulonda mwakenzi nakwanakana chidika chalema chahachaaka chakekalaku mukaayi kejima haMulungu, haApril 17. [Mwinkenu mwiniitala chipapilu.] Idi hifuku dakwanakana kufwa kwaYesu. Kwakekala mpanji yaBayibolu yakahanawu chakadi kufwetesha yikalumbulula chitwatela kuhetela mwifutu daKristu. Ichi chipapilu chinakushimuna mpinji niluña kwakekalila chanukishu mwiluña detu.”
3. Tunateli kutambika ñahi antu amavulu?
3 Neyi chipompelu chenu chikweti iluña deneni dakushimwinamu, aeluda anateli kuyileja kushiya yipapilu hamatala hanabuli antu, chikuwaha neyi mubula kuyishiya hatooka. Mwatela kutambika antu imwalejeli kufuntilaku, antaña jenu, akwenu imwazataña nawu, akwenu akashikola, niantu imweluka. Hampinji yimunakuhana chipapilu chakutambika nachu antu kuchanukishu kunsa yamulungu, hanenu nimagazini neyi chinatwesheki. Komana munateli kuzataku wupayiniya wakukwasha muApril kulonda mukadiluñishi chikupu muniyi kampeni yayiwahi?
4. Muloñadi wutunakukeñela netu antu akweti mpwila yakudiza Bayibolu akenzi kuChanukishu?
4 Twakayishimwina wunsahu wawuwahi chikupu antu akenza kuchanukishu. Akeluka kukeña kwasweja kwatukeñayi Yehova hakutwinka ifutu danyiloña. (Yow. 3:16) Akadiza Wanta waNzambi chiwukakiswila antu. (Isa. 65:21-23) Akayileja cheñi kuhanjeka nawatulama neyi chakwila anakukeña kudiza Bayibolu kulonda eluki nsañu yayivulu. Tunakulomba netu antu amavulu akweti mpwila yakudiza Bayibolu akatambula yipapilu yitwakahanaña hakampeni kulonda akenzi kuChanukishu.