Yipapilu Yakutambika Nachu Antu kuChanukishu Yikahanewa Mukaayi Kejima
1. Kampeninyi yadimena yinaloñeshuwu kuzatawu mukaayi kejima henohu Chanukishu kanda?
1 “Ilenuña mwenimu muñanakanaña nachu.” (Luka 22:19) Hamuloña wakwovwahila ilu lushimbi lwaYesu, akwakudifukula aYehova akapompa hamu nawantu akweti mpwila yakudiza Bayibolu haMarch 30, 2010, kulonda kwanakana kufwa kwaYesu. Yipapilu yadimena yakutambika nachu antu kuChanukishu akayihana mukaayi kejima kutachika haMarch 13 nakushika haMarch 30.
2. Tunateli kuhana ñahi chipapilu chakutambika nachu antu?
2 Chakuhana: Munateli kumwinka mwiniitala chipapilu kulonda yatali mwevulu wuduhu, kufumahu hoshenu nenu, “Namelela haMarch 30, antu amavulu mukaayi kejima akapompa kulonda kwanakana kufwa kwaYesu. Nenzi nakuyinka ichi chipapilu hamu nachisaka chenu kulonda mwakenzi kuchanukishu. Munateli kwinza nawamabwambu jenu.” Mwani iyi diyi mpinji niluña kutwakanakenaña ichi chanukishu. Kwesekeja nachidi yuma, munateli kufukulahu kutaña Luka 22:19 kulonda kumuleja lushimbi lwamuNsona. Hela chochu, Ilukenu nenu, chineli tukweti mpinji yantesha yakuwanisha iluña detu dakushimwina, chikuwaha neyi muhosha mazu antesha.
3. Twatela kutambika anyi?
3 Neyi chipompelu chenu chikweti iluña deneni dakushimwinamu, hefuku datachi aeluda anateli kuyileja kushiya yipapilu hamatala hanabuli antu. Neyi chinatwesheki, hanenu magazini nichipapilu chakutambika nachu antu. Tambikenu antu imwalejeli kufuntilaku, atudizi aBayibolu, akwenu imwazataña nawu, akwenu akashikola, antaña jenu, antuñinenu, niamabwambu jenu.
4. Kuhameka kukeña kwaYehova kwamwekesheliyi hakutwinka ifutu danyiloña kukutusañumuna kwiladi?
4 Diloñeshenu Kulonda Mwakazati naÑovu: Chilaaka chaChanukishu diyi mpinji yayiwahi yimwatela kuzata chikupu mumudimu wakushimwina. Komana munateli kuhimpa ndandanda yenu kulonda mwakazatuku wupayiniya wakukwasha? Mukweti anyana hela atudizi aBayibolu anakuzata chiwahi kuspiritu? Neyi mukweti, hoshenu nawaeluda kulonda eluki neyi niwena anateli kushikahu kuzataku iyi kampeni yadimena neyi akwakushimwina abula kupapatishewa. Kuhameka kukeña kwaYehova kwamwekesheliyi hakutwinka ifutu danyiloña kukutusañumuna kuya kuChanukishu cheñi nikutambika antu amavulu kulonda twakapompi nawu.—Yow. 3:16.