Kampeni Kadimena Kakutiyakesha Chanukishu!
1. Mudimwinyi wakekala nawakwakushimwina aWanta mukaayi kejima kutachika haMarch 21, 2009, nawa muloñadi?
1 Hefuku daChiwana, April 9, 2009, akwakudifukula aYehova Nzambi mukaayi kejima akapompa hamu nakwanuka kukeña kwabadika kwamwekesheliyi Yehova Nzambi kumuchidi wamuntu. (Rom. 5:6-8) Tunakuhweleli netu yihita yawantu anakukeña kudiza chalala twakekala nawu hampinji yitwakanakanaña kufwa kwaYesu. Yipapilu yadimena yakutambika nachu antu Kuchanukishu akayihana mukaayi kejima kutachika haMarch 21.
2. Yikumanyi yimwatela kwanuka hampinji yimunakuhana chipapilu chakutambika nachu antu?
2 Yikuma Yitwatela Kwanukaña: Zatishenu nankashi nyevulu, malwihu ninsona yinatenuwu yidi hachipapilu chakutambikilahu antu. Chakutalilahu, munateli kuhosha hamwevulu wudi hewulu nikuhosha nenu: “Inakuyitambika kulonda twakanakani hamu kufwa kwaYesu kutwakanakanaña hefuku daChiwana, April 9, 2009.” Kuhiñahu tañenu mutu nimalwihu analondeluhu adi hachipapilu chakutambika nachu antu. Mwatela kumuleja mwiniitala nenu niyena watela kutambikaku chisaka chindi niantu amakwawu anakukeña kutambikayi.
3. Chumanyi chimwatela kwila kudi antu imwatambikili hakutachika kwakampeni?
3 Neyi chipompelu chenu chikweti iluña deneni dakushimwina, aeluda akuyileja kushiya yipapilu yakutambika nachu antu hamatala hanabuli antu. Hamposu nihamulungu, mwatela kuhana magazini nichipapilu chakutambika nachu antu. Ikalenu nachikonkwanyi chakutambika antu imwakafuntilaku, atudizi aBayibolu, antaña jenu, akwenu akashikola, niakwenu imwazataña nawu, antuñinenu, niamabwambu jenu. Chaaka chinamani, muhela wumu watambikili antaña jindi 30 nawa watwalekeluhu kuyanukisha hakulema kwanichi chanukishu. Dichi wazañaleli chikupu hakumona antaña jindi 25 awanikiluku, nawa antu 4 atachikili kudiza Bayibolu!
4. Yumanyi yitwatela kutachika kudiloñesha nawa muloñadi?
4 Tachikenu Kudiloñesha: Akwakushimwina amavulu akakalakala chikupu muMarch niApril. Neyi mudi nanyana hela nawatudizi aBayibolu anakuzata chiwahi, iyi diyi mpinji yayiwahi yakwikala akwakushimwina abula kupapatishewa. Ayinu diyi mpinji yakudiloñesha kulonda kukalakala chikupu munaka kampeni kakwanakana kukeña kwabadika kwamwekesheli Nzambi niYesu.—Yow. 3:16; 15:13.