Kampeni Mwafumaña Yuma Yayiwahi
Chikukashala nyilungu yisatu nakutachika kupompa kwankambi, yipompelu yikazataku cheñi mudimu wakutambika antu adi nampwila mwiluña dakushimwina kulonda akenzi nakupompa. Kudi chuma chachiwahi chaleñelaña kwikaleña iyi kampeni chaaka nichaaka. Antu atambwilaña yipapilu yakutambika nachu antu kukupompa kwankambi nawa enzaña kukupompa kakavulu azañalalaña hakutiya jimpanji jamuNsona, hakumona madipatimenti aloñeshawu chiwahi mwazatilaña akwakudihana niyililu yayiwahi nikunuñañana kutwamwekeshaña. (Mas. 110:3; 133:1; Isa. 65:13, 14) Hela chochu, kudihu yuma yayiwahi yafumaña mukampeni yetu, sweje-e mumaluña mwakwila antu adi nampwila atela kwenda yitampu yayilehi hakwila ayi nakupompa?
Chamanini kupompa kwankambi kwamu 2011, kasanji kamutayi katambwilili mukanda wafumini kudi mumbanda wawanini chipapilu chakutambika nachu antu kukupompa kwishina dachenzelu. Kakavulu waswamineña neyi aYinsahu jaYehova amwendela. Wasonekeli nindi: “Nadiña netala dadiwahi, mfumwami wamuwahi nawa natoñojokeleña nami nadiña nayuma yejima yadi kunzañalesha. Chawushona, hinadiña namunzañaluku nawa chihandilu chadiña chaluwankana. Dichi nafuukwiluhu kwenda makilomita 320 namotoka kulonda nikapompuku Hamposu.” Wadiluñishili kupompa kwankambi nankashi chakwila wamutemesheleli nfumwindi nshiña nakumuleja nindi wukukaama kulonda yakapompi nihaMulungu. “Natiyilili kumpanji jejima, nadibulakeni nawaYinsahu jaYehova amavulu nawa hinakeñeleña nami iyi progiramu yimanuku.” Chafuntiliyi kwitala, watachikili kudiza nawa hanyima yatukweji tuwana wekalili mukwakushimwina wabula kupapatishewa. “Nidi namuzañalu chikupu hamuloña wakwila nawanini chipapilu chakuntambika nachu kukupompa kwishina dachenzelu chami nawa chayinu mpinji nikweti muzañalu muchihandilu chami.”
Antu amakwawu akatambwila chipapilu chakutambika nachu antu akenza kukupompa. Dichi, dikitenu chikupu muniyi kampeni yalema nankashi. Yipapilu yejima yakutambika nachu antu yikashalahu mwakayisendi kukupompa kwankambi kulonda mwakayizatishi hakushimwina wunsahu wakukoolekela.
[Chikasha chidi hefu 1]
Twakahanaña Ñahi Chipapilu Chakutambika Nachu Antu?
Hakwila nawu tushimwini mwiluña detu dejima, chikuwaha neyi tukuhosha mazu antesha. Tunateli kuhosha netu: “Ñahi mwani. Tunakuzata mudimu wamukaayi kejima wakuhana ichi chipapilu chakutambika nachu antu. Chipapilu chenu ichi. Mukuwana nsañu yayivulu hanichi chipapilu.” Hoshenuña namuzañalu. Neyi tunakuhana yipapilu yakutambika nachu antu kunsa yamulungu, neyi chinatwesheki twatela kuhana nimagazini.