Mudimu wamuKaayi Kejima Wakutiyakesha Kupompa kwaNkambi Kunakwila Nawu “Londelenu Mumahaji aKristu”!
Akwakushimwina aKuhanaña Cheñi Chipapilu Chadimena chaKutambika Nachu Antu kuKupompa
1 Chaaka chinamani kwadiña kampeni yamukaayi kejima yakutiyakesha kupompa kwaNkambi kwa “Kupuluka kudi Mukamwihi!” kakwashili chikupu akwakukeña kwakuwahi. Antu etejeli iwu mutambi katachi adiluñishili hamu nawaYinsahu jaYehova chawija chachiwahi chakuspiritu. (Isa. 65:13) Adiluñishili kuhanjeka kwakuwahi nawana kwetu awiniKristu amuzañalu nawa anuñañana. (Mas. 133:1) Hakwila tukwashiku antu amavulu akawaniki kuKupompa kwaNkambi kunakwila nawu “Londelenu Mumahaji aKristu!” tukwikala cheñi nakampeni yamukaayi kejima yakuhana yipapilu yadimena.
2 Yuma Yafuminumu Chaaka Chinamani: Kushindamena hayileji yitwatambwilili kufuma kumatuña amukaayi kejima, mukutiyakesha kupompa kwankambi kwa “Kupuluka kudi Mukamwihi!” mwafumini yuma yayiwahi chikupu. Mumatuña amavulu atwitiyakesheli chachiwahi. Chakutalilahu, chipapilu chansañu chimu chadiñi nachibaba chiyasonekeli muyibalu yitanu nakamu kutalisha hakampeni, chahosheli nawu: “Henohu kupompa kanda kutachiki aYinsahu adiña nakuzata nañovu munyikala, azataña maora amavulu, kwenda njila jajilehi, nikuhosha swayi-swayi.” Mudimu wakuzatila hamu hakuhana yipapilu yadimena wasañumwini mpwila yawakwachikuzulemba mumusumba wukwawu, chaletesheli iyi nsañu kutiyakana chikupu. Yipapilu yansañu yisatu yatiyakesheli chachiwahi mudimu wetu henohu kupompa kanda kutachiki. Mukwakusoneka nsañu wasonekeli yibaba yayivulu chikupu yenzesheli yipapilu kubadika yiyedi muchipapilu chansañu chiyedishiluwu haMulungu. Chipapilu chansañu chahosheli hayuma yitwakuhwelelamu, wumana kwetu, kuhana yipapilu, nikupompa kwankambi. Chelili mukwakushimwina hakuhana chipapilu hetala dimu, mwiniitala wamukwatili kwizu nindi, “Eña. Katataka ichi nadiña nakutaña iyi nsañu muchipapilu chansañu!” Mwiniitala mukwawu niyena wahosheli nindi nadiñi nakutaña nsañu yenu, mwaka mwashika dehi kunu! Ichi dichipapilu chami? Wahosheli cheñi nindi, “Iwu himudimu wawuwahi wunakuzatawu aYinsahu jaYehova.”
3 Akwakukeña kwakuwahi amavulu enjili kukupompa nayipapilu yawu mumakasa. Amakwawu afumini kwakulehi kulonda kuwanika kukupompa. Mudimu wutwazatili nañovu wakutambika antu waleñesheli naambala kuvulilaku, chakutalilahu, mwiituña dimu antu awanikili kukupompa abadikili naambala yachina chaaka chikwawu namapasenti 27.
4 Chakuwanisha Iluña: Munateli kutachika kuhana yipapilu henohu kunashali nyilungu yisatu nakutachika kupompa. Mwatela kuzata nañovu kulonda muwanishi iluña dachipompelu dejima. Yipompelu yikweti iluña deneni, akwakushimwina anateli kushiya chachiwahi chipapilu hamatala hanabuli antu mumulungu wakukumishaku henohu kupompa kanda. Yipompelu yatela kufwila kuhana yipapilu yayitumininuwu yejima nakuwanisha iluña dejima neyi chinatwesheki. Yipapilu yikashalahu atela kuyizatisha kudi apayiniya amuchipompelu.
5 Mazu Akuhosha: Munateli kuhosha nenu: “Tunakuzata mumudimu wamukaayi kejima wakuhana yipapilu yakutambika nachu antu kwinza kukupompa kwalema kudi hambidi. Ichi dichipapilu chenu. Mukuwana nsañu yikwawu yinalumbululiwu hanichi chipapilu.” Kuhosha mazu antesha kukuyileñela kuhana yipapilu yayivulu. Hela chochu, neyi mwiniitala wukweti malwihu, ikalenu nampinji yakuyakula. Neyi namwekeshi muzañalu, musonekenu kulonda mukafuntiluku swayi swayi.
6 Chalema kufwila kulondela mumahaji aKristu! (Yow. 3:36) Kupompa kwetu kwankambi kudi hambidi kukakwasha ejima akawanikaku kulondela mumahaji aKristu. Tunakuhweleli netu kukekala cheñi kushimwina chikupu muloña waniwu mudimu wakuzatila hamu wakutiyakesha Kupompa kwaNkambi kwa “Londelenu Mumahaji aKristu!” Dichi, zatenu nañovu kulonda mukatambiki antu amavulu akawanikiku. Yehova yakiswili mudimu wenu chimukuzataña iwu mudimu wamukaayi kejima.