Kampeni Yamukaayi Kejima Yakutiyakesha Kupompa Kwankambi kwa “Kupuluka Kudi Mukamwihi!”
Akwakushimwina amuChipompelu Chejima Atela Kuhana Handibilu Yadimena
1 Kutachika muMay 2006 mumatuña amakwawu mwakekala kulondashana kwakupompa kwankambi mukaayi kejima sampu nichikwakamana, kwakekala kampeni yamukaayi kejima yakutiyakesha kupompa kwankambi kukekala mumatuña kwakwihi na 155. Nkeñelu yidi yakutambika antu amavulu nikuyikolesha kulonda akawanewi kukupompa kwankambi. Iyi kampeni yinabombelimu kupompa kwankambi kwadimena kunatanjikiwu kwakekala muGermany, Czech Republic, nimuPoland mukakweji waJuly kushika nimulungu watachi waAugust 2006.
2 Hamuloña wakwila tunakushakama kunsa yamafuku akukuminina, kupompa kwankambi kunakukonkomwena hakukana kwaNzambi kwakupulwisha kufuma mudinu ituña datama, kwatela kukokola chikupu antu afuukulawu dehi. Iyi nsañu yatela kuyisañumuna kulonda atoñojoki hayuma yidi kumbidi. Hakwila nawu tutweshi kwinka yihita yawantu kukooleka kwakutiya nsañu yakukundeja nikuchiñeja, yipompelu yawaYinsahu jaYehova kubadika ha 98,000 anayikonkomweni kukalakala neyena dadeni hakutiyakesha nsañu yakupompa kwankambi kunayitambikuwu.
3 Yipompelu akayinka mahandibilu ashikila kulonda chikakwashiku mukwakushimwina wejima kutambula mahandibilu akushika ku 15. Mahandibilu akashalahu atela kuyizatisha kudi apayiniya ahachipompelu. Chipompelu chidi chejima, chakatachika kampeni henohu kunashali dehi nyilungu yisatu nefuku datachi dakupompa kwankambi kuyaleja ochu chipompelu kuya. Ichi chatela kukwashaku hakwikala nampinji yashikila yakuwanisha iluña dejima dazatilañamu chipompelu neyi chinatwesheki.
4 Chetejewa nawu neyi chinatwesheki hanenu handibilu kudi muntu wumukuwana hetala. Hela chochu, neyi chakwila amakwawu hamatala hosiwu, mwatela kushiya handibilu chachiwahi hachisu. Cheñi, akwakushimwina atela kwiluka nawu atudizi awu aBayibolu, antaña jawatudizi awu aBayibolu, niakwakukeña kwakuwahi amwiluña dawu anayileji nikuyitambika kukupompa kwankambi. Chinakukeñeka kuzata nañovu kulonda kuhana mahandibilu ejima munyilungu yisatu hohu.
5 Lipoti yaMudimu waMarch yidi muMudimu Wetu waWanta yatela kutukolesha kutwalekahu muniwu mudimu wunakuyilaku hambidi. Tudi namuzañalu wakushimuna netu kuvula kwakuha kwakuvulu kwashikijeweli. Kwadiña kuvula kwampinji yejima kwawapayiniya ampinji yejima 10,168 kunaleteshi kwikali kuvula kwawakwakushimwina ejima hamu 129,806. Kubombelahu, twadiña nakuvula kwakuha kwakuhana nyikanda, nyikanda 37,454 nimagazini 667,593. Lipoti yinamwekeshi cheñi kuvula kwampinji yejima kwakudiza kwaBayibolu 209,034 kwalombweliwu.
6 Munakwanuka muzañalu wamwekesheli chipompelu chenu mumudimu wakuspiritu mukakweji waMarch? Komana kuvula kweniku kwila kutwalekahu hampinji yakampeni yamukaayi kejima nehi? Ankoñi aKudiza kwaMukanda niankwashi jawu atela kukeña jinjila jakukwashilamu ejima ekala mwiizanvu dawu kuswejesha kuzata mumudimu wawu. Munjila yikwawu, ansoneki atela kubomba chachiwahi lipoti yamudimu wamwiha yachipompelu nakuyitemesha swayi-swayi kukasanji kamutayi. Mukwakushimwina wukuhana lipoti yikwawu yamudimu wamwiha muloña hahanini lipoti yakakweji wunahitiku, akumuchinda neyi akwakushimwina ayedi.
7 Hamuloña wakuzata nañovu mukaayi kejima hakutiyakesha Kupompa kwaNkambi kunashimuniwu muchinu chibaba cha “Kupuluka Kudi Mukamwihi!” tunakuhweleli netu kwakekala kushimwina nankashi. Tunakulomba netu nkisu jaYehova jajivulu jikwikala hanyidimu yenu yimunakudikita hampinji yimukukalakalaña muniyi kampeni yamukaayi kejima.