Zatishenu Mpinji Yenu Chachiwahi
1 Kufwila kwetu kwakumuzañalesha Yehova kwatwileñelaña kusha wumi wetu hanyidimu yakuspiritu. Izu dindi datulejaña nawu ‘tutwalekihu nakusambila kukeña wanta’ ‘nikushinshika hayuma yasweja kulema.’ (Mat. 6:33; Fwi. 1:10) Munjilanyi mutunateli kwambwilaku mpinji yakukeña yuma yaWanta nakusha nyidimu yabula kulema mwiluña damuchiyedi?—Efwes. 5:15-17.
2 Shenu Nyidimu yaWanta Hambidi: Tanjikenu mpinji yenu chiwahi kuchina kuyikisañena kuyuma yamukunkulwayi. Amakwawu atanjikaña mpinji yatelela hakalenda yawu yamudimu wamwiha hakutachika kakweji wudi wejima. Kulondelahu, amonaña kwila nawu kwosi chuma chinetejiwu chikukañesha yuma yinatanjikiwu. Dichitwatela kwila nihakwambulaku mpinji yakupompa, kudiza kwahalwetu, niyakuya kukupompa kweneni. Amakwawu akweti ndandanda yefuku niifuku yakutachika hela kumanisha ifuku nakutaña Bayibolu. Ambulenuhu mpinji yimu yanyidimu yalema, nawa kanda muleka yuma yikwawu yinakubula kukeñeka yiyikañeshuku.—Mukwa. 3:1; 1 Kor. 14:40.
3 Bayi Musweja Kuzatisha Ituñaku: Mumatuña amakwawu mwekala yuma yayivulu nankashi, yiseela, yuma yakuzañalesha, kuhema, yuma yakumanishilamu wuudi, niyuma yikwawu. Amavulu ombaña mpinji yeneni nankashi nakutala nyivwimbimbi hachisanji chanyevulu hela kuzatisha jikompyuta. Hela chochu, kusweja kukasika nanyidimu hampinji yakunooka indi kwiji natumakina twatuha tunakuleta kanu kaayi kunateli kututwala kukusawuka. (1 Yowanu 2:15-17) Dichi Nsona jatukonkomwenaña nawu bayi tusweja kuzatisha ituña chikupuku. (1 Kor. 7:31) Kuhitila mukutiyilila iku kufumba kwamaana, mukumwekesha kudi Yehova nenu kudifukula kudi yena dichuma chatachi mukuhanda kwenu.—Mat. 6:19-21.
4 Mpinji yinashaliku yampata yamakonu yidi kwakwihi nakumana. Antu asambilaña kukeña yuma yaWanta akazañalala nawa akatambwila nkisu yaNzambi. (Yish. 8:32-35; Yak. 1:25) Komana tweyenu tuzatishenu mpinji yetu chiwahi, muloña yalema nankashi.