Chumanyi Chimwatwamijaku Hambidi?
1 Ilu lwihu munateli kulwakula ñahi? Eña, wonsu wetu twafwilaña kusha yuma yaWanta hambidi. (Mat. 6:33) Ilaña twatela kudihula etu aweni netu, ‘Komana yuma yinelaña yamwekeshaña nawu natwamijañaku yuma yaWanta?’ Bayibolu yatukonkomwenaña nawu: ‘Dishinshikenuña mwiluki chimudi enu aweni.’ (2 Kor. 13:5) Tunateli kudishinshika ñahi etu aweni hakwila twiluki neyi tunakutwamijaku Wanta?
2 Chitwazatishaña mpinji Yetu: Twatela kutachika kuhitila mukushinshika chitwafuukulaña kuzatisha mpinji yetu. (Efwes. 5:15, 16) Komana mumulungu twazatishaña mpinji yishika hadihi nakuhanjeka, kutala chisanji chanyivwimbimbi, kuzatisha Intaneti, hela kuhema yisela? Neyi tusoneka mpinji yitwanatilaña kuniyi yuma nikuyesekeja nampinji yitwazatishaña kunyidimu yakuspiritu, tunateli kuhayama nankashi. Komana twazataña mpinji yeneni kumudimu wakumujimba chakwila tujimbalaku nimudimu wajila hamuloña wakukeña kuwana yuma yaletaña chiseki? Mapampa kañahi kitwajiñaña kukupompa hela kushimwina kulonda kuya nakwila yuma yakumujimba kunsa yamulungu?
3 Imikenu Yikwokwanyi: Etu amavulu hitukweti mpinji yashikila yakwila yuma yejima yitunakukeña kwilaku. Dichi hakwila nawu tutwamijuku yuma yaWanta hambidi, twatela kwiluka yikwokwanyi yetu cheñi nikwambulaku mpinji ‘yayuma yalema nankashi.’ (Fwil. 1:10) Yumiyi yinabombelumu kudiza Izu daNzambi, kukalakalaku mumudimu wakushimwina, kuhemba chisaka, nikuwanika kukupompa kwawiniKristu. (Mas. 1:1, 2; Rom. 10:13, 14; 1 Tim. 5:8; Heb. 10:24, 25) Nyidimu yikwawu yakeñekaña yidi neyi kukolesha mujimba mukwesekeja nikunooka kwakuwahi kwakwashaña. (Maku 6:31; 1 Tim. 4:8) Ilaña iyi yuma yabula kulema nankashi hiyinateli kukañesha yuma yaWantaku.
4 Mana kwetu wumu wakansi, wakeñeli kusha yuma yaWanta hambidi kuhitila mukutachika mudimu wampinji yejima chatela kutaña shikola yeneni kulonda yimukwashuku kuwana mudimu wakumujimba. Wadizili idimi dacheñi nawa wayili kwiluña kwadiña kukankila kweneni. Wahosheli nindi: “Akunu inakutiya kuwaha chikupu. Mudimu wakushimwina wunakuwaha nankashi! Nakukombelela hohu nami mutenowu atwansi ejima adi kwila neyi chochineli ami kulonda atiyi neyi chinakutiya ami. Kwosi chuma nichimu chabadika hakumukalakela Yehova nayuma yejima yitukwetuku.” Eñañi, kutwamijaku Wanta hambidi kwaletaña nkisu, sweje-e dinu chamuzañaleshaña Tata yetu wamwiwulu, Yehova.—Heb. 6:10.