Kwashenu Amakwawu Kwikala Amabwambu jaNzambi
1 Makonu, antu akunyunza yejima anakuyidizisha njila jaYehova. (Isa. 2:2, 3) Antu amuchidiwu hakwila nawu ‘asoñi nyikabu nakumika,’ chiña amukeña Yehova. (Luka 8:15; Maku 12:30) Chakadi kukeña kwamuchidiwu, hiyakwikala nañovu yakukañesha yuma yatama hela wulobu wakwila yuma yayiwahuku. Njila yimu yakukwashilamu amakwawu kukwata wubwambu wawuwahi naYehova yidi yakuyikwasha aswejeshi kukeña yililu yindi. Yikoleshenu kulonda atoñojokuhu chikupu hansañu yidi mumukanda waPalameni Kuli Yehova.
2 Chakutalilahu Chenu: Yililu yenu yinateli kuyishika chikupu atudizi aBayibolu hamuchima. Chiyamona nawu mwalemesha chikupu wubwambu wenu naYehova nikumona chiwunahimpi nshakaminu yenu, chinateli kuyiletesha kukwata wubwambu wahalwawu wamuchidiwu. (Luka 6:40) Eña, kakavulu chakutalilahu chetu chakwashaña nankashi amakwawu kubadika yuma yitwahoshaña.
3 Njila yeneni anvwali yatañishilañamu anyana kumukeña Yehova yidi yakuhitila muchakutalilahu chawu. (Kuhit. 6:4-9) Adisumbula amu akeñeleña kukulisha anyanawu muchalala ehwili maana kudi anvwali atweshahu dehi. Iyala wumu wasumbula wahosheli nindi: “Antu ejima yinahosheli nawu anlejeli nawu chuma cheneni hichakutalilahu chawanvwali.” Dichi mukuhanda kwawu kwejima, anvwali atela kwikala chakutalilahu chachiwahi kudi anyanawu hanochu chalumbuluka kwikala “ibwambu daYehova.”—Yak. 2:23.
4 Kulomba kwaKufuma haMuchima: Mwatela kukwashaku cheñi amakwawu kukwata wubwambu naYehova kuhitila mukuyileja kulomba kwakufuma hamuchima. Mwatela kuyileja kulomba kwaYesu kwachitalilu, cheñi nikulomba kwakuvulu kwamukoyu kwasonekawu muNsona. (Mat. 6:9, 10) Munateli kudizisha anyanenu niatudizi aBayibolu chakulomba kuhitila mukutiyilila kukulomba kwenu. Chatiyawu kulomba kwenu kwakufuma hamuchima, akwiluka nawu mwamukeña Yehova. Yikoleshenu ‘akakeleña mukulomba’ neyi aholokela mukweseka. (Rom. 12:12) Chiyakumonaña wukwashu waYehova mumpinji yalukadi, akatachika kumukuhwelela nikumukeña Yehova hamu neyi ibwambu dawu walala.—Mas. 34:8; Fwil. 4:6, 7.