Kupompa Kwetu kwaNkambi hiWunsahu Weneni waNsañu Yalala

1. Indi yawija yayinkeleña aIsarela mpinji yakutoñojoka nikuhanjeka hansañwinyi yalala yalema yakuspiritu?

¹ A Isarela akushankulu apompeleña kuyawija kapampa kasatu hachaaka. Hela chakwila, amayala hohu diwu akeñekeleña kuya kuniyi yawija, kakavulu yisaka yejima yayileña kuYerusalema nakudiluñisha iku kupompa. (Kuhit. 16:15, 16) Adiña nampinji yakutoñojoka nikuhanjeka nsañu yalala yalema yakuspiritu hayawija yeniyi. Indi iyi nsañu yalala yikwawu hinsañwinyi? Yehova hiMukwakuhana wukweti kukeña. (Kuhit. 15:4, 5) Nsañu yalala yikwawu yakwila nawu tunateli kumushindamena hakwila yatulomboli nikutukiña. (Kuhit. 32:9, 10) A Isarela ateleleli cheñi kwiluka nawu chineli hiyantu emeneneñaku ijina daYehova, ateleleli kumwekesha kuloña kwindi chiwahi. (Kuhit. 7:6, 11) Makonu kupompa kwetu kwankambi kwahachaaka nichaaka kwatukwashaña munjila yoyimu.

2. Indi progiramu yakupompa kwankambi yikalumbulula ñahi nsañu yalala?

² Progiramu Yalumbululaña Chikupu Nsañu Yalala: Hakupompa kwetu kwankambi twadiluñishaña yimwenu, kwihujola nijimpanji jalumbululaña nsañu yalala yalema yamuBayibolu. (Yow. 17:17) Mudimu weneni wakuloñesha kupompa kwankambi kudi hambidi wazatewa dehi. Kuloñesha kwaYehova kunaloñeshi progiramu yinakuhosha hakukala kunakumonawu antu mukaayi kejima makonu. (Mat. 24:45-47) Komana munadiloñeshi kuya nakumona nikutiya yuma yikahoshañawu?

3. Yumanyi yitwatela kwila hakwila tukaheteli muprogiramu?

³ Tukahetelamu chikupu neyi tupompa mafuku ejima asatu nikutiyilila nakanañachima. Neyi kanda mumuleji muntu wayiñija mudimu, mule jenu kulonda yayinki mafuku akunooka. Mwatela kukama swayi mafuku ejima kulonda mwakabuleña kunoñoka hampinji yakupompa. Antu amavulu akunukaña wanyi neyi amutalaña nhoshi nikusoneka nsañu yantesha. Bayi muluwañesha akwenu hela enu aweni nanshiña yenuku. Nawa bayi muhoshahoshaña, kusoneka nsañu hanshiña, hela kudya hampinji yakupompaku.

4. Indi anvwali anateli kukwasha ñahi anyanawu kulonda ahetelumu hampinji yakupompa?

⁴ Muyaaka yaSabata, chapompeleña yisaka yawaIsarela nakutiyilila chatañileñawu Nshimbi hampinji yaChawija chaYisolu, apompeleña hamu ‘nawatwansi kulonda atiyi nikudiza.’ (Kuhit. 31:12) Twatiyaña kuwaha hakumona yisaka yinashakami hamu nawanyanawu hampinji yakupompa kwankambi nakutiyilila nakanañachima. Komana kwila mutala nsañu yimwasoneka nakuhanjeka hamu yikuma yimwadiluñisha hakupompa mafuku ejima nampinji yamelela nehi? “Wusupi awukasila mumuchima wakansi,” dichi anvwala atela kuhemba anyanawu kushilahu atumpululu niatunkaña hampinji yakunooka, kubadika ‘kuyileka tuhu chochina.’—Yish. 22:15; 29:15.

5. (a) Indi yililu yetu yayiwahi yawahishaña ñahi nsañu yalala? (b) Tunateli kuwahisha ñahi nsañu yalala neyi tuvwala chachiwahi mwiluña dakupompela?

⁵ Yililu Yetu Yayiwahi Yawahishaña Nsañu Yalala: Yililu yetu yayiwahi yitwamwekeshaña mwiluña dakupompela kwankambi yawahishaña nsañu yalala. (Tit. 2:10) Amakwawu amonaña neyi antu anenzi nakupompa alondejaña nshimbi nikwikala adiwunjika nawa aluwi. (Kol. 4:6) Neyi tuvwala mabaaji ahakupompa kwankambi bayi neyi tukutiyakesha hohu kupompa kwankambi hela kutwiluka kudi antu anenzi kukupompaku, ilaña tukushimwina cheñi wunsahu kudi antu akutumona. Antu adi mwiluña mudi kupompa kwankambi akamona nawu antu anavwali mabaaji ahakupompa anavwali chiwahi nawa chatelela, bayi kuvwala yakuvwala yabula kutelela yamukaayuku. (1 Tim. 2:9, 10) Dichi twatela kuvwala nikudiwahisha chiwahi hampinji yitudi mwiluña mudi kupompa kwankambi. Hela chakwila kupompa kwankambi kukwikalila hanji, twatela kuvwala yakuvwala yatelela. Neyi chakwila tunakukeña kuhimpa yakuvwala hakumana kwaprogiramu, twatela kwiluka netu tunenzi kukupompa kwankambi nawa hitwatela kuvwala yakuvwala yabula kutelelaku.

6. Njilanyi yitwatela kudiluñishilamu kunuñañana kwetu kwawakwaKristu hampinji yakupompa kwankambi?

⁶ Hayawija, aIsarela atiyileña kuwaha kudikunda nawakwawu akwakudifukula afumineña kumaluña acheñi nikumatuña acheñi nawa chumichi chayileñeleleña kwikala anuñañana. (Yil. 2:1, 5) Hakupompa kwankambi twamwekeshaña yililu yetu yadimena yawumana kwetu akwaKristu. Iyi yililu yayiwahi yaparadisa yetu yakuspiritu yazañaleshaña antu atumonaña. (Mas. 133:1) Chatela tufumeña heluña dakupompela nakuya nakulanda yakudya, chikuwaha neyi tusenda yakudya yahachayili nakudiila heluña dakupompela kulonda tuhanjekeña nawana kwetu niahela anashakami kwakwihi.

7. Yumanyi yikutuleñela kuzataku mudimu wakudikeñela neyi chinatwesheki?

⁷ Kakavulu antu amonaña kupompa kwetu kwankambi chikwendaña chiwahi azañalalaña, sweje-e neyi eluka nawu nyidimu yejima ayizataña kudi akwakuzata mukudikeñela. Komana munateli ‘kudihana mukudikeñela’ kulonda mwakazatuku hakupompa kwankambi? (Mas. 110:3) Kakavulu yisaka yejima yadihanaña nakuzataku hamu neyi njila yakudizishilamu anyanawu kudihana awenawu. Neyi mukweti nsonyi, kuzataku hakupompa kwankambi hinjila yayiwahi yakudiluka nawantu amakwawu. Muhela wumu wahosheli nindi: “Nelukili antu amavulu wanyi chiña hohu antaña jami niamabwambu antesha. Ilaña chinazatiluku mudimu wawunyonji nadilukili nawamana kwetu niahela amavulu. Natiyili kuwaha nankashi.” Kwikala nawamabwambu amavulu kuhitila mukuzataku hakupompa kwankambi kukatuzañalesha chikupu. (2 Kor. 6:12, 13) Neyi kanda muzateñahu dehi nyidimu yakudikeñela, ilenu aeluda ayileji chimwatela kwila kulonda mukazatuku.

8. Tukatambika ñahi amakwawu kulonda akenzi kukupompa kwankambi?

⁸ Tambikenu Amakwawu Akatiyi Nsañu Yalala: Henohu kuchidi nyilungu yisatu nakutachika kupompa kwetu kwankambi, tukekala nakampeni kakutambika antu kukupompa neyi chitwelaña dikalu. Yipompelu yatela kuhana yipapilu yakutambika nachu antu mwiluña dawu dakushimwina dejima. Yipapilu yejima yikashalahu mwatela kuyisenda kukupompa kwankambi. Akayizatisha hakushimwina wunsahu wakukoolekela mwiluña mudi kupompa kwankambi.

9. Shimunenu yakutalilahu yinakumwekesha nawu kampeni yetu yahachaaka mwafumaña yuma yayiwahi.

⁹ Komana antu itwatambikaña hakampeni kahachaaka enzaña nakupompa? Hakupompa kwankambi kumu, kalama wakwashili antu adisumbula kuwana hakushakama. Amulejeli nawu ayinkeli chipapilu chakutambika nachu antu nawa “amweni nawu hinsañu yayiwahi.” Dichi endeli namotoka makilomita akubadika 320. Chakutalilahu chikwawu, muhela washimwinineña kwitala nikwitala wahanini chipapilu chakutambika nachu antu kudi muntu wakeñeleña kwiluka nsañu yakupompa kwankambi. Ahanjekeli nsañu yadiña hachipapilu. Chimwahitili mafuku antesha hampinji yapompeleñawu, muhela wamweni ona muntu niibwambu dindi hakupompa kwankambi anasendi ninyikanda yayiha yedikili.

10. Muloñadi chichalemena kuya kukupompa kwankambi kwahachaaka?

¹⁰ Yawija yadiña yidika yayiwahi yaloñesheliyi Yehova kulonda aIsarela ‘amukalakeleña chakadi kudimbana nakashinshi.’ (Yosh. 24:14) Chochimu, kuya kukupompa kwetu kwankambi kwahachaaka nichaaka kwatukwashaña ‘kwenda mwaya nsañu yalala’ nawa hichuma chalema mukudifukula kwetu. (3 Yow. 3) Yehova yayikiswili wejima wenu mwakeña nsañu yalala kulonda mwakayi nakupompa nikuhetelamu chikupu.