Mafuku Asatu Akutambwila Nkisu Kudi Yehova

1. Chumanyi chitwakatambwila hakupompa kwankambi kwachinu chaaka?

¹ Yehova nakutwalekahu kukiswila ambuñindi mukanu kaayi kaSatana kakadi menji akuspiritu. (Isa. 58:11) Njila yimu mwatukoleshelañayi Yehova hikupompa kwankambi kwahachaaka nichaaka. Chineli kupompa kwankambi kwachinu chaaka kudi dehi kwakwihi, tunateli kudiloñesha ñahi hakwila twakatambwili nkisu kudi Yehova?—Yish. 21:5.

2. Yumanyi yitwatela kuloñesha?

² Neyi kanda mudiloñeshi, yinu diyi mpinji yimwatela kutachika kuloñesha ndandanda yenu niyakumudimu kulonda mwakapompi mafuku ejima asatu akupompa kwankambi. Komana muneluki mpinji yimwatela kushika kwiluña dakupompela mafuku ejima kulonda mukeñeña hakushakama henohu progiramu kanda yitachiki? Hitunakukeña kushalahu yakudya yakuspiritu yakutukolesha yinatuloñesheliyi Yehovaku. (Isa. 65:13, 14) Komana mwaloñesha dehi ñendelu nihakukama?

3. Yumanyi yatela kutukwasha hamu niyisaka yetu kuhetelamu chikupu muprogiramu?

³ Chumanyi chikuyikwasha kulonda mubuli kusha maana kuyuma yacheñi hampinji yakupompa? Neyi chinatwesheki mwatela kukama swayi mafuku akupompa kwankambi. Mutalenuña nhoshi nawa tañenuña nsona yejima yikutaña nhoshi muBayibolu yenu. Sonekenuña nsañu yantesha. Yisaka yatela kushakama hamu kulonda anvwali akwasheña anyanawu kutiyilila nakanañachima. (Yish. 29:15) Hadaha mwatela kuhanjeka yikuma yamaneni yamuprogiramu namelela nachisaka. Hakwila nawu chisaka chenu chitwalekuhu kwikala chakola hanyima yakupompa, mwatela kuzatisha mpinji yaKudifukula kwaChisaka kwamelela kulonda muhanjeki yikuma yatela kuzatisha chisaka chenu.

4. Tunateli kukwashaña ñahi amakwawu muchipompelu chetu kulonda akatambwili nkisu?

⁴ Kwashenu Antu Amakwawu Kulonda Akatambwili Nkisu: Tunakukeña netu antu amakwawu niwena akatambwili nkisu. Komana muchipompelu chenu mudi akwakushimwina atushinakaji hela amakwawu anakukeña wukwashi hakuya nakupompa? Munateli kuyikwasha? (1 Yow. 3:17, 18) Aeluda sweje-e akulumpi amazanvu, atela kuzata nañovu kulonda akwashi akwakushimwina wenawa.

5. Tukahanaña ñahi yipapilu yakutambika nachu antu kukupompa kwankambi? (Talenu chikasha chidi hewulu.)

⁵ Neyi chochitwelaña dikalu, henohu kunashali nyilungu yisatu nakutachika kupompa kwankambi, twakekala nakampeni yakutambika antu kukupompa. Yipompelu yatela kwimika chikonkwanyi chakuhana yipapilu yawu yakutambika nachu antu nikushimwina amwiluña dawu dejima. Neyi chisaka chenu chinashiyuhu yipapilu hakumanisha kampeni mwatela kuyileta kuchipompelu kulonda akayizatishi hakushimwina wunsahu wamumpanji. Nsañu yikwawu yakundama kuniyi akayishimuna muprogiramu hefuku datachi. Yipapilu yakutambika nachu antu yikabula kuzatisha chisaka chenu hampinji yakupompa mwatela kuyihana kudi atulama neyi munashiki heluña dakupompela. Mwani shiyenuhu chipapilu chimu kulonda mwakachizatishi hakahanañawu mpanji yakukumishaku hefuku damuchisatu.

6. Tunateli kumwekeshaña ñahi yililu yayiwahi hampinji yakupompa kwankambi?

⁶ Yililu Yayiwahi Yazañaleshaña Antu: Muyinu mpinji munasweji ‘kudikeñawu’ antu nawa mwabulaña kukeña akwawu, twatiyaña kuwaha nankashi kwikala nawakwetu akwaKristu afwilaña kumwekesha yililu yayiwahi. (2 Tim. 3:2) Twamwekeshaña yililu yayiwahi neyi twiñila muchipaka wumweneni nikuhembela hakushakama antu itudi nawu mwitala dimu hela itwenza nawu mumotoka yimu hela antu itwadizaña nawu Bayibolu. Twamutiyililaña cheyamani neyi yatuleja nindi tushakami nakutiyilila tumina twakutachika nachu yibalu. Tunateli kumwekesha yililu yayiwahi neyi tubula kuluwañesha akwetu naselufoni mpinji yakupompa. Twamwekeshaña cheñi yililu yayiwahi kuhitila mukubula kuhosha, kusoneka nsañu hanshiña, kudya hela kuhitañana hampinji yakupompa.

7. Hampinji yitunakuhanjeka nawana kwetu, tunateli kukoleshewa hela kuyikolesha ñahi?

⁷ Kuhanjeka Munjila Yakudikolesha: Kupompa kwankambi kwatwinkaña kukooleka kukwawu kwakuhanjeka nawana kwetu akwaKristu nakutiyañana. (Mas. 133:1-3) Kwila mutachikilahu ‘kukasunuka munyichima yenu’ nakuhanjeka nawana kwetu niahela anafumi kuyipompelu yacheñi nehi? (2 Kor. 6:13) Mwatela kwikala nachikonkwanyi chakwiluka muntu hela chisaka chimu ifuku niifuku. Tunateli kuhanjeka hampinji yachayili. Dichi mwatela kusenda yakudya yahachayili nakudiila heluña dakupompela kulonda mwakahanjekeña nawakwenu chatela muyeña nakulanda yakudya kulesitilanti. Chumichi chinateli kuyileñela kwikala nawamabwambu amawahi.

8. Muloñadi wutwatela kudihana kuzata mudimu hakupompa kwankambi, nawa tunateli kwila ñahi mwenimu?

⁸ Twatiyaña kuwaha kuzatila hamu mudimu wajila nawakwetu akwakudifuukula. Kwila muzataku mudimu wakudikeñela mudipatimenti yimu hela kuzatila hamu nachipompelu chenu mudimu wakuwahisha nehi? (Mas. 110:3) Neyi kanda ayinki mudimu wakuzata, mwani mwatela kwihula Dipatimenti yaMudimu waKudikeñela hakupompa kwankambi. Mudimu wakuzata antu amavulu waswayi.

9. Muloñadi wutwatela kwikala nayililu yayiwahi nikuvwala chachiwahi hampinji yakupompa kwankambi?

⁹ Yililu Yetu Yazañaleshaña Antu Atumonaña: Twatela kwikala nayililu yayiwahi mafuku ejima asatu akupompa, bayi neyi hampinji yaprogiramu hohuku. Antu atumonaña mwiluña mudi kupompa kwankambi atela kumona chaambu chekala hadi etu nawantu abula kwikala aYinsahu. (1 Pet. 2:12) Nvwalilu nimmwekenu yetu yatela kumulemesha Yehova neyi tudi heluña dakupompela hela kwiluña kutunakukama nikumalesitilanti. (1 Tim. 2:9, 10) Neyi tuvwala mabaaji etu, antu akutumonaña akwiluka nawu tudi aYinsahu jaYehova. Chumichi chikutuleñela kuyileja nsañu yakupompa kwankambi nawa tukuyishimwina wunsahu.

10. Yumanyi yamwekeni yamwekeshaña nawu twashimwinaña wunsahu wawuwahi hamuloña wakwikala nayililu yayiwahi yawakwaKristu?

¹⁰ Antu amonaña yililu yetu yayiwahi hampinji yakupompa kwankambi elañadi? Kwesekeja nachipapilu chansañu chimu, mukulumpi wamudimu weluña dimu dazatishañawu hakupompa kwankambi wahosheli nindi: “Hiyantu akweti kalemesha. Twatiyaña kuwaha chenzañawu chaaka nichaaka.” Mwaaka wadi muntu wabula kwikala Chinsahu wajimbesheli chikwama chindi muhotelu yazatisheleñawu ayinsahu enjili kukupompa kwankambi. Chamufuntishililuwu mukulumpi wahotelu chikwama kushilahu niyuma yejima yadiñamu, wamulejeli mwini chikwama nindi: “Wunakooleki muloña aYinsahu jaYehova apompelaña kupompa kwankambi kwakwihi nawa diwu avula muhotelu. Neyi nehi hiwadi kumona chikwama cheyuku.”

11. Akwakuzata kuDipatimenti yaFirst Aid atela kukwashana munjilanyi, nawa yumanyi yatela kwilukilawu chadimu antu anakwinza nakupompa?

¹¹ First Aid: Dipatimenti yaFirst Aid yekala yakukwashana hamaposu akukasumwisha bweñi. Bayi neyi hidipatimenti yakuhanina yitumbu hela chipatelaku. Mwani mwakasendi yitumbu yenu, mabandeji hela yuma yikwawu yadifwana, muloña yumiyi hiyakayihana hakupompaku. Neyi mweluka dehi nenu mwakatakataña musoñu washunga, chikatu chamuchima niyikatu yikwawu, mwatela kusenda yitumbu yashikila. Mwatela kwinza nantaña hela muntu wamuchipompelu weluka yikatu yenu nawa wunateli kuyikwasha neyi kumwekana kukala kwakukasumwisha. Hakupompa kwankambi hamwekanaña kukala muloña wakwila antu akatakataña ayishiyaña nakukatila kwakankawawu. Neyi chakwila antu akatakataña hiyakweti ntaña watela kuyikwashaku, atela kuyileja aeluda haniku kukala nawa akwiluka mwakuyikwashila. Hichikutwesheka kuloñesha tupeka twadimena hakupompa kwankambi twakuhembelamu antu akatakataña neyi epula mavumba acheñuku.

12. Chineli kupompa kwankambi kunashiki dehi kwakwihi, twatela kwiladi, nawa muloñadi?

¹² Kupompa kwankambi kwachinu chaaka kunashiki dehi kwakwihi. Kudi kuzata nañovu chikupu hakwila nawu progiramu yakupompa yikali yakukolesha nikuwahisha iluña dakupompela. Zatenu nañovu kulonda mwakapompi mafuku ejima asatu nawa diloñeshenu mwakatambwili yuma yinayihembeliyi Yehova nikuloñesha kwindi. Fwilenu chikupu kuzañalesha akwenu nayililu yenu yayiwahi nikuhanjeka munjila yakudikolesha. Chimwela mwenimu, enu niantu amakwawu mukutiya neyi chatiyiliyi mana kwetu chaaka chinamani wasonekeli nindi, “Kwosi chuma chinanukaña chanzañalesheli chikupu neyi kupompa kwankambi.”

[Mazu ekoku adi hefu 3]

Neyi chochitwelaña dikalu, henohu kunashali nyilungu yisatu nakutachika kupompa kwankambi, twakekala nakampeni yakutambika antu kukupompa

[Mazu ekoku adi hefu 5]

Nvwalilu nimmwekenu yetu yatela kumulemesha Yehova neyi tudi heluña dakupompela hela kwiluña kutunakukama nikumalesitilanti

[Mazu ekoku adi hefu 6]

Fwilenu chikupu kuzañalesha akwenu nayililu yenu yayiwahi nikuhanjeka munjila yakudikolesha

[Chikasha chidi mafu 3-6]

Yuma Yitwatela Kwanuka haKupompa kwaNkambi Kwamu 2011

◼ Mpinji Yikatachika Progiramu: Progiramu yikatachikaña nampinji ya 8:20 hamafuku ejima asatu. (Yinsu yetala dakupompelamu akayenzununaña nampinji ya 7:00.) Neyi tumina twakutachikilahu tunatachiki dehi, wonsu wetu twatela kushakama muyitwamu yetu kulonda kupompa kukatachiki munjila yakalemesha. Progiramu yikamana nampinji ya 15:55 hefuku datachi, 16:15 hefuku damuchiyedi, nawa hefuku damuchisatu yikamana nampinji ya 15:10.

◼ Chakwimika Nyotoka: Chineli maluña hakwimikila nyotoka hetala dakupompela akehaña, yisaka yikweti nyotoka yatela kutiyashana kulonda akazatisheña motoka yimu.

◼ Kukwatila Yitwamu: Antu imunenzi nawu mumotoka yimu hela imunakushakama nawu itala dimu diwu imwatela hohu kuhembela yitwamu hela hakushakama.—1 Kor. 13:5.

◼ Kudya Kwahachayili: Mwani mwakasendi yakudya yenu yahachayili kulonda mukabuleña kufuma heluña dakupompela nakuya nakukeña yakudya hampinji yakunooka. Mwatela kusenda kachimpaya kanyanya kimwatela kusha mwishina dachitwamu. Bayi musenda chuma cheneni nankashi chekalashi mwakusha yakudya heluña dakupompelaku.

◼ Yawaana: Tunateli kumwekesha kusakilila hakutuloñeshela kupompa kuhitila mukuhana yawaana kumudimu wamukaayi kejima mukudikeñela hakupompa kwankambi. Macheki ejima akahanawu hakupompa kwankambi atela kuyihana ku “Watch Tower Society.”

◼ Maposu niYuma Yakukasumwisha: Neyi kunamwekani kukala kwakukasumwisha heluña dakupompela, mwani hoshenu nakalama wudi kwakwihi, kulonda yayi swayi-swayi nakuleja akamutayi waFirst Aid aheluña dakupompela kulonda muntu wakuluka yitembi yatweshi kumona kutoha kwakukala nikukwashana.

◼ Yihemba: Neyi munakukeña yihemba, mwani sendenu yayivulu muloña hakupompa kwankambi hiyakahanaña yihembaku.

◼ Malasha: Chikuwaha neyi tukuzatisha nakwesekeja malasha asweja ivumba, muloña anateli kuleta kukala kudi amakwawu ekala nakukala kwañonenu hela kukala kukwawu.—1 Kor. 10:24.

◼ Mafomu aMwani Mukeñenu Iwu Muntu (S-43): Zatishenu fomu yaMwani Mukeñenu Iwu Muntu kulonda muhani nsañu yamuntu wunamwekeshi mpwila hakumushimwina wunsahu wamumpanji hampinji yakupompa kwankambi. Akwakushimwina atela kusenda fomu yimu hela jiyedi kukupompa kwankambi. Mwatela kuhana mafomu yimunasoneki kuKapeka kaNyikanda hela kudi nsoneki wamuchipompelu chenu neyi munafunti.—Talenu Mudimu Wetu waWanta waNovember 2009, ifu 4.

◼ Chipapatishu: Hamatala Akupompela Kupompa Kweneni hekala majiya akupapatishila, izaza datela kulondela nshimbi yakushakama muyitwamu hampinji yachipapatishu. Kumaluña amakwawu kwapapatishilañawu mutuloña, nimunyihoñi, anyana bayi atemukilaña kumbidi yawantu anakuya nakupapatishewaku, ilaña atela kushala hanyima yawatulama. Hadi yaaka yayivulu yinahituhu, twatambwilaña wunsahu wakwila nawu akulumpi amavulu hiyayaña kwiluña dakupapatishilaku. Nianvwali akweti anyana anakupapatishewa hiyayaña nakumona ichi chidika chalemaku. Dichi anvwali niakulumpi amakwawu anayikonkomweni kuyaña kuchipapatishu kulonda amwekesheña kulema kwanichi chidika.

◼ Chimwenu: Kwosi muntu anetejuwu kukwata nyevulu kudi kwejima hela kwakwihi nachinañamu hampinji yachimwenu nawa kwosi muntu watela kuluwañesha amakwawu kudiluñisha chimwenu. Mwani toñojokelenuku akwenu kuhitila mukubula kuyijikilila. Anyana atela kushakama nawanvwali jawu. Atulama akweti wuswa wakupalañesha anyana anadikuñululi hamu nakuyitwala kudi anvwali jawu hela kuyifumisha muchipaka kulonda abuli kuluwañesha antu.

◼ Nswadi: Twatela kuhemba iluña detu dakupompela chachiwahi nawa nawunyonji. Neyi tunakutoñojokelaku amakwawu twatela kunatila yakudya yejima yinashaluhu, yipapilu niyuma yikwawu mwibuku dinaloñeshuwu, ichi chamwekeshaña chiwahi nhoshelu yetu yakwila nawu twamwakama Nzambi. Hakupompa kwankambi kudi hambidi, wejima wetu tukafwili kuhemba iluña dakupompela dawunyonji nikudihemba etu aweni kulonda ‘tuwahishi kuleja kwaNzambi, Chamwinu chetu, muyuma yejima.’—Tit. 2:10.

◼ Nyisalanyi: Mpinji yejima anyana anyanya atela kuyitwala kudi anvwali jawu hela akulumpi anakuyihemba hakuzatisha kapeka kakuwelela kumakasa ninyisalanyi. Mpinji yikwawu hakupompa, chimwahita ora yimu hela maora amavulu anyana atachikaña wupila. Hakwila awani mwakuyila nakuhema, kakavulu anyana ekalaña nachaaku chakutemukila kunyisalanyi hampinji yakupompa, nakuluwañesha amakwawu chikupu. Neyi chakwila anvwali akanjikija anyanawu kuya kumusalanyi henohu kanda atachiki kupompa, kakavulu hiyaluwañeshaña antu hakupompa chimwahita mpinji yanteshaku. Kutwala anyana kumusalanyi nikutupeka twakuwelela kumakasa nikwena kwakiñaña anyanetu kuchina akenda kamona wubanji.

◼ Mudimu waKudikeñela: Twazañalalaña hama hakupompa kwankambi sweje-e dinu neyi tudihana kuzata mudimu wakudikeñela hakupompa. (Yil. 20:35) Ejima anakukeña kudihana atela kuya kuDipatimenti yaMudimu waKudikeñela hakupompa kwankambi. Anyana adi nayaaka 16 nakufunta mwishina anateli kuzata chiwahi neyi azatilaña hamu nawanvwali jawu hela ayihembaña hela akulumpi amakwawu anayiteji kuzata nawu.

[Chikasha chidi hefu 4]

Twakahanaña Ñahi Chipapilu Chakutambika Nachu Antu?

Hakwila nawu tushimwini mwiluña detu dejima, chikuwaha neyi tukuhosha mazu antesha. Tunateli kuhosha netu: “Ñahi mwani. Tunakuzata mudimu wamukaayi kejima wakuhana ichi chipapilu chakutambika nachu antu. Chipapilu chenu ichi. Mukuwana nsañu yayivulu hanichi chipapilu.” Chipapilu chahewulu anachisoneki kulonda chileti ikoku kudi antu, dichi mwinkenu mwiniitala munjila yatela kumonayi yuma yiduhu. Hoshenuña namuzañalu. Neyi tunakuhana yipapilu yakutambika nachu antu kunsa yamulungu tunateli kuhana nimagazini hanateleli.