‘Shakamenu Chiwahi Mukachi kaNyunza’
1. Kwikala nayililu yayiwahi hakupompa kudi hambidi kwalemenadi?
1 Antu amavulu atutalaña nankashi hakupompa kwetu kwahachaaka nichaaka, dichi chikuwaha neyi tumwimenaku chiwahi Nzambi itwadifukulaña nayililu yetu. (Lev. 20:26) Yililu yetu yayiwahi, kuvwala chiwahi nikudiwahisha kwatela kumwekesha nawu tudi atumbanji twaKristu alala. Tunateli kushakama ñahi chachiwahi mukachi nakuleta kalemesha kudi Tata yetu wamwiwulu, hampinji yakupompa kwankambi nikwanyunza kudi hambidi?—1 Pet. 2:12.
2. Kukoolekanyi kutukekala naku kwakumwekesha yililu yawakwaKristu hampinji yakupompa?
2 Mwekeshenu Yililu yawakwaKristu: Kukeña kutwamwekeshaña kudi ana kwetu nichitwahandaña ‘nawantu adi hanzi,’ kwambuka chikupu nayililu yidi mukaayi. (Kol. 3:10; 4:5; 2 Tim. 3:1-5) Twatela kwikala naluwi nikudiwunjika nawantu azataña kuhotelu nikulesitilanti hela chakwila kudi kukala. Kumwekesha yililu yayiwahi kwakeñekaña kwikala namuchima waluwi kudi antu anakutukwasha.
3. Yumanyi yayanukishañawu anvwali nawa muloñadi?
3 Anvwali atela kuhemba chiwahi anyanawu hakupompa, hajilesitilanti nihahotelu. (Yish. 29:15) Mukulumpi wumu wahotelu wamumbanda walejeli antu adisumbula nindi: “Twayikeña chikupu enu ayinsahu. Yisaka yenu nianyanenu ekala nakavumbi nawa afumbewa chiwahi. Antu ejima azatilaña hanu ayihamekaña nawa akeñaña nawu chiña mwadiña nakushakama hanu kunsa yanyilungu yejima.”
4. Twatela kuvwala ñahi hampinji yitudi mumaluña etu akupompela?
4 Kuvwala Chachiwahi: Twatela kuvwala yakuvwala yayiwahi nawa yatelela hampinji yakupompa, nawa bayi tuvwala neyi akwetuñaku. (1 Tim. 2:9) Twatela kuvwala chiwahi hampinji yitunakwiñila hela hakufuma muhotelu nihampinji yakunooka henohu kanda tupompi nihanyima yakupompa. Dichi tukutiya kuwaha kuvwala baaji yahakupompa nawa tukutiya nsonyi wanyi hakushimwina neyi tukoolekela muntu. Chitwavwala chiwahi nikwikala nayililu yayiwahi hakupompa kunakwinza, tukukokola antu ashinshika kunsañu yamuBayibolu yapulwishaña antu nikumuzañalesha Yehova.—Zef. 3:17.