Yililu Yaletaña Kalemesha Kudi Nzambi
1. Muloñadi antu chelukilañawu nawu aYinsahu jaYehova anakupompa kupompa kwankambi?
1 Neyi tunayi kukupompa kwankambi, antu elukaña nawu tunakuya kukupompa kwankambi. Mujimbaka jajivulu mwekalaña kupompa kwankambi, yikuzulemba yansañu yalejaña antu muchituñilu nawu tunakupompa. Mahotela nimumatala akudyila mwenzalaña enyi, nawa antu ashakamaña munawa maluña amonaña enyi amavulu anavwali mabaji ahakupompa kwankambi. Iyi diyi yanukishu yikutukwasha kumulemesha Nzambi kuhitila mukumwekesha yililu yayiwahi hampinji yitudi mumusumba mudi kupompa kwankambi.—1 Pet. 2:12.
2. Tunateli kumulemesha ñahi Nzambi kuhitila muvwali yetu yayiwahi hampinji yitudi mumusumba mudi kupompa kwankambi?
2 Nvwalilu Yayiwahi: Neyi tuvwala chachiwahi hampinji yitunakupompa antu atumonaña atiyaña kuwaha. Hela chochu, nvwalilu yetu hampinji yikwawu, neyi tunafunti dehi kuhotela, neyi tudi kumatala akudyila, hampinji yakulanda yuma, nimpinji jikwawu, yinateli kuleñela antu atulemesheña chikupu. Hela chikwila hitwatela kuvwala neyi chitwavwalaña hakupompaku, twatela kuvwala chiwahi nawa munjila yakalemesha. Antu atumonaña atela kumona chaambu chekala hakachi ketu niantu abula kwitiya. (Rom. 12:2) Kubombelahu, twatela kuvwala baji yahakupompa kwankambi, muloña yikashimwinaña hakupompa kwankambi, nakutwileñela tushimwini antu nawa yikaleñelaña antu akenza nakupompa akatwiluki.
3. Tunateli kumwekesha ñahi kudiwunjika nikutoñojokelaku akwetu?
3 Kudiwunjika niKutoñojokelaku Akwetu: Chineli antu mukaayi adikeña nawa hiyasakililañaku, neyi twikala adiwunjika nikutoñojokelaku akwetu tukazañaleshaña antu akatumonaña adi neyi antu azatilaña muhotela nimumatala akudyila. (2 Tim. 3:1-5) Neyi tunakuhembela akwetu yitwamu hela neyi tunakwimana mumusululu kulonda tutambuli nyikanda yinediki, bayi tukeña hohu kudizañalesha etu awenuku, ilaña twatela kufwila kuzañalesha mukwetu. (1 Kor. 10:23, 24) Hanyima yakuwanika kukupompa kwankambi katachi, iyala wadiña nampwila yakudiza wahosheli nindi, “Hinukutwesha kwanuka jimpanji jejima jahaninuwu hadina ifukuku, ilaña natwalekeluhu nakutoñojoka hayililu yayiwahi yamwekesheluwu aYinsahu.”
4. Muloñadi chitunateli kutoñojokela hakudihana nakuzataku nyidimu yakupompa kwankambi neyi chinatwesheki?
4 Akwakuzata Mudimu Wakudikeñela: AkwaKristu alala ayilukilaña kuyililu yakudihana. (Mas. 110:3) Komana kwila mudihana kulonda mukazatiku nyidimu hakupompa kwankambi nehi? Hakupompa kwankambi kumu, amana kwetu niahela akushika ku 600 adihanini kuzata nyidimu yakuwahisha henohu kupompa kanda kutachiki. Antu azatilaña hanidi iluña ahosheli nawu: “Kanda tumoneñahu dehi chuma chamuchidiwu! Tunahayami hakumona nawu antu ejima awa adihana kwinza nakuzata nyidimu.” Tunakutalila chikupu kupompa kwankambi kwamu 2013 nikukooleka kutukweti kwakumulemesha Nzambi bayi kwakutiyilila nikudiza hohuku.