Yuma Yitwatela Kwanuka haKupompa Kweluña
Mpinji Yikatachika Progilamu: Progilamu yikatachikaña nampinji ya 8:20 hamafuku ejima asatu. (Yinsu yetala dakupompelamu akayenzununaña nampinji ya 7:00.) Neyi tumina twakutachikilahu tunatachiki dehi, wonsu wetu twatela kushakama muyitwamu yetu kulonda kupompa kukatachiki munjila yakalemesha. Progilamu yikamana nampinji ya 16:00 hefuku datachi nihefuku damuchiyedi 16:00, nawa hefuku damuchisatu yikamana nampinji ya 15:00.
‘Musakililenu Yehova Nakamina’: Antu jaNzambi kushankulu amuhamekeleña Yehova kuhitila mukwimba tumina, nimakonu tumina twalema nankashi mukudifukula kwetu. (Mas. 28:7) Yibalu yejima hakupompa kwetu kweluña yatachikaña natumina. Tumina twavumishañawu twalema nankashi, muloña twakwashaña antu jaNzambi kudiza nikudifukula kudi Yehova. Dichi, neyi cheyamani yabidika nindi tumina keña tutachiki kuvuma, twatela kushakama muyitwamu yetu nakutiyilila kutumina chatela tuhanjekeña. Neyi tutiyililaña kutumina, tukumwekesha netu twahamekaña amanakwetu niahela adikitaña chikupu hakwimba itu tumina. Awa amanakwetu niahela ayaña kayedi hachaaka kuPatterson, New York namali awu nakwimba tumina twatuwahi kulonda tudiluñisheña. Hanyima yakutiyilila kutumina nakanañachima, wejima wetu twatela kwimana nakumuhameka Yehova hakwimba tumina twetu twaWanta.
Chakwimika Nyotoka: Hamaluña amakwawu akupompela akatwiteja kwimikilahu nyotoka, dichi antu akashikañahu dehi diwu akawana hakwimika. Chineli maluña hakwimikila nyotoka hetala dakupompela akehaña, yisaka yikweti nyotoka yatela kutiyashana kulonda akazatisheña motoka yimu. Mwani tiyililenu chinakuyilejawu kudi amanakwetu akweti mudimu wakuleja antu chakwimika nyotoka nimakinga.
Kukwatila Yitwamu: Mwani bayi munyakala kuya nakukwatila iluña dimunakeñi neyi kwiji munakudibecha nawakwenuku. Chililu chakudihana chatuleñelaña kwilila akwetu yuma yayiwahi, dikwatwilukilañawu nawu tudi akwaKristu alala nawa kwaleñelaña antu atumonaña kumuhameka Nzambi. (Yow. 13:34, 35; 1 Kor. 13:5; 1 Pet. 2:12) Mwatela kukwatila yitwamu antu imunakushakama nawu itala dimu hohu hela imudinawu mumotoka yimu hela atudizi aBayibolu. Mwani toñojokelenuku akwenu neyi himukuzatisha ambulela. Tondenu chiwahi hakushakama. Dihulenu nenu, komana inakuluwañesha amanakwami chakwila anakudiluñisha wanyi progilamu? Atushinakaji niantu akata anayiloñesheli maluña akushakama. Chineli maluña akushakama akeha, antu ayedi hela wumu wunakumukwasha kashinakaji hela wakata diyi watela kushakama nindi.
Kuvwala Chachiwahi: Twatela kuvwala yakuvwala yayiwahi nawa yatelela hampinji yakupompa, bayi tuvwala neyi akwetuñaku. (1 Tim. 2:9) Twatela kuvwala chiwahi hampinji yakunooka henohu kanda tupompi nihanyima yakupompa. Dichi tukutiya kuwaha kuvwala baaji yahakupompa nawa tukutiyaña nsonyi wanyi kushimwina neyi tukoolekela muntu. Chitwavwala chiwahi nikwikala nayililu yayiwahi hakupompa kunakwinza, tukukokola antu ashinshika kunsañu yamuBayibolu yapulwishaña antu nikumuzañalesha Yehova.—Zef. 3:17.
Kuzatisha Chiwahi Mafoni niYozelu Yikwawu Yadifwanaku: Neyi tuchuna mafoni etu niyozelu yikwawu yitukweti hampinji yitunakupompa tukumwekesha netu tukweti yililu yayiwahi nawa tukuluwañesha akwetu wanyi. Twatela kutoñojokelaku akwetu neyi tunakuzatisha kamela, tunakukwata vidiyo, hela kuzatisha matabuleti niyozelu yikwawu kuhitila mukubula kuyijikilila. Twamwekeshaña cheñi yililu yayiwahi kuhitila mukubula kudisonekela mamesaji hela imelu.
Kudya Kwahachayili: Mwani mwakasendi yakudya yenu yahachayili kulonda mukabuleña kufuma heluña dakupompela nakuya nakukeña yakudya hampinji yakunooka. Mwatela kusenda kachimpaya kanyanya kimwatela kusha mwishina dachitwamu. Bayi musenda chuma chekalashi heluña dakupompelaku. Mwatela kuloñeja nikusenda yakudya yinashalihu nawa niyuma yamajilu kulonda mukayinatili kwitala denu.
Yawaana: Tunateli kumwekesha kusakilila hakutuloñeshela kupompa kuhitila mukuhana yawaana kumudimu wamukaayi kejima mukudikeñela hakupompa kweluña. Macheki ejima akahanawu hakupompa kweluña atela kuyihana ku “Watch Tower Society.”
Yihemba: Neyi mwekala hayihemba, mwani sendenu yayivulu muloña hakupompa hiyakahanaña yihembaku. Masirinji ayikatu yashuga nijindoñu mwatela kujinata chiwahi mumaluña akunatila yuma yafwana, bayi kujinatila mwakunatila nswadi hakupompaku.
Kukañesha Maposu: Mwani shenuku muchima kulonda mubuli kudikatisha hamuloña wakuselumuka hela kuhukana. Chaaka nichaaka antu adikatishaña muloña wakuvwala nsapatu jajilehi kutushintilu. Chikuwaha neyi muvwala nsapatu yatelela yikuleñela mwendeña chiwahi. Anvwali atela kuhemba anyanawu kulonda abuli kudikatisha kukojeja antu amakwawu kudikatisha. Anvwali atela kukwasha anyanawu neyi kudi yuma yinakukeñawu nikuyibabesha neyi anakuluwañesha antu.
Nkinga Yawanyikeki: Neyi mwapompelaña hanji mwatela kusenda makinga awanyikeki. Hela chochu, neyi munateli kukasa chitwamu chakuhembelamu mwana kwakwihi nakumunashakami, munateli kusenda.
Malasha: Chikuwaha neyi tukuzatisha nakwesekeja malasha asweja ivumba, muloña anateli kuleta kukala kudi amakwawu ekala nakukala kwañonenu hela kukala kukwawu.—1 Kor. 10:24.
Mafomu aMwani Mukeñenu Iwu Muntu (S-43): Zatishenu fomu yaMwani Mukeñenu Iwu Muntu kulonda muhani nsañu yamuntu wunamwekeshi mpwila hakumushimwina wunsahu wamumpanji hampinji yakupompa kweluña. Mwatela kuhana mafomu yimunasoneki kuKapeka kaNyikanda hela kudi nsoneki wamuchipompelu chenu neyi munafunti.
Jilesitilanti, Masitolu niKumaluña Amakwawu: Lemeshenu ijina daYehova nayililu yenu yayiwahi hajilesitilanti nikumasitolu. Diwunjikenu neyi mudi motoka, munakwendesha hela munakwenda munjila mwendelaña antu. Vwalenu munjila yatelela nkoñi mukwaKristu.
Chipapatishu: Mpinji yachipapatishu chawakwaKristu bayi neyi himpinji yakutachika kukwata nyevuluku. Nawa bayi neyi diyi mpinji yatela kuhemawu anyanaku. Antu anatwaliku anakuya nakupapatishewa atela kwimana chiwahi nikumwekesha kalemesha. Neyi kudi anyana, anvwali jawu hela ayihembaña atela kuyitala.
Mudimu waKudikeñela: Ejima anakukeña kudihana atela kuya kuDipatimenti yaMudimu waKudikeñela haKupompa kweluña. Anyana adi nayaaka 16 nakufunta mwishina anateli kuzata chiwahi neyi azatilaña hamu nawanvwali jawu hela ayihembaña hela akulumpi amakwawu anayiteji kuzata nawu.