Kupompa kwaNkambi—Mpinji Yitwazañalalaña haKudifukula
1. Indi kupompa kwankambi kwamakonu kwadifwana ñahi nayawija yawaIsarela?
1 Yosefu, Mariya, anyanawu, niantu amakwawu ayileña kuYerusalema kuyawija yahachaaka mpinji yejima. Haniyi mpinji, Yosefu nichisaka chindi niakwakudifukula amakwawu hiyadiña nakwakamena kukala kwadiñuwu nakuku, ilaña ashileña muchima kuyuma yalema yakuspiritu muwumi wawu. Hampinji yayawija adiña nakukooleka kwakutoñojoka nikuhosha hakuwaha kwaYehova nikushinshika haNshimbi jindi. Anetu nawa tukekala nakukooleka kwakudifukula kudi Yehova namuzañalu hakupompa kwankambi kudi hambidi.
2. Yumanyi yitwatela kwila hakudiloñesha kuya kukupompa kwankambi kudi hambidi?
2 Kudiloñesha Kwakeñekaña: Chisaka chaYesu chendeleña jikilomita kwakwihi na 200 kufuma kuNazareta nakuya kuYerusalema nikufunta. Hela chakwila tweluka wanyi kuvula kwawanyiki jaYesu, tunateli kufwikija Yosefu niMariya chadiloñesheleñawu nikuzata nañovu. Komana munadiloñeshi kulonda mwakapompi mafuku ejima asatu akupompa kwankambi kudi hambidi? Ichi chinakukeñeka kutambula mafuku akunooka kumudimu hela kumuleja muntu wayiñija mudimu hela ntañishi yamwanenu kulonda yayinki lusesa. Neyi chakwila munakukeña hakukama hela mwakwendela komana mwaloñesha dehi yumiyi? Komana munateli kukwashaku muntu muchipompelu wunakukeña wukwashu hakuya nakupompa?—1 Yow. 3:17, 18.
3. Indi yawija yawaIsarela yayinkeleña ñahi kukooleka kwakudikolesha nawakwawu?
3 Mpinji yaKudikolesha naWakwetu: A Yudeya adiña nakukooleka kwakudikunda nikudikolesha hampinji yayawija nawakwawu akwakudifukula. Chakadi nikujina, chisaka chaYesu chadiña nakutalila iyi mpinji kulonda kuhanjeka nawamabwambu jawu amakulu. Adiña cheñi nakudiluñisha kukwata wubwambu nawantu amaha hakachi kawaYudeya niantu abalumukili kwikala aYudeya adiña nakupompa hela ayileña kuYerusalema nikufunta.
4. Tunateli kumwekesha ñahi netu twalemesha kudikunda kwawumana kwetu kwawakwaKristu?
4 Nduñu wamaana nikashinshi waloñesha kulonda tupompeña hamu nakutiyilila jimpanji hakupompa kwankambi chatela ajisoneki hohu munyikanda, muloña wafwilaña nindi tudikolesheña nawakwetu. (Heb. 10:24, 25) Dichi, loñeshenu chadimu mwakashikeña swayi mafuku ejima akupompa kulonda mwakadikoleshi nawakwenu henohu cheyamani kanda yashimuni nindi tutiyilili tumina twatwihi tunakumwekesha nawu himpinji yakushakama muyitwamu yetu. Chatela muyeña nakulanda yakudya hampinji yachayili, anatwikoleshi kusenda yakudya nakudiila heluña dakupompela kulonda twakadikolesheña nawakwetu itudi nawu. Kudikunda kwawumana kwetu kwawakwaKristu hichawaana chakufuma kudi Yehova nawa twatela kukwilemesha.—Mika 2:12.
5. Yumanyi yikatukwasha kuhetelamu mujiprogiramu?
5 Mpinji yaKudiza: Kufuma tuhu kuwansi Yesu wakoolekeleleña mpinji yayawija kulonda kudiza hadi Tata yindi wamwiwulu. (Luka 2:41-49) Yumanyi yikatukwasha hamu nayisaka yetu kuhetelamu mujimpanji jikahoshañawu? Mwani bayi muhosha-hoshaña hampinji yakupompa, hela kunyamoka nyamokaku. Neyi mudi naselufoni, hela yuma yikwawu bayi yiyiluwañesha hela kuluwañesha akwenu neyi munakupompaku. Mutalenuña nhoshi nawa sonekenuña nsañu yantesha. Shakamenu hamu nachisaka kulonda mukwashi anyanenu kutiyilila kuprogiramu. Hampinji yamelela shakamenu hamu nakuhanjeka hayikuma yimwadiluñisha.
6. Yumanyi yitwatela kwanukaña kutalisha hanvwalilu nimmwekenu yetu?
6 Nvwalilu niMmwekenu: Akwakulanda nakulandulula afumineña kumatuña acheñi ahitileña mumukwakwa elukili chisaka chaYesu niaYudeya akwakudifuukula ayileña nikufuma kuyawija muloña wanzombu jadiñi kunsa jamahinawu niwanda wawuzeeli wahitileña kunsa jamahinawu. (Kuch. 15:37-41) Hela chakwila akwaKristu hiyavwalaña yakuvwala yadimenaku, atwilukila kunvwalilu yayiwahi nawa yawunyonji. Twatela kusha maana chikupu kunvwalilu yetu neyi tunakuya hela tunakufuma kukupompa hela neyi tudi heluña dakupompela. Chili tunahimpi yakuvwala hanyima yaprogiramu, twatela kuvwala yakuvwala yinateli kuleta kalemesha hejina daYehova nikuvwala mabaji ahakupompa. Muniyi njila twakekala ambukaku nawantu abula kwikala aYinsahu nikukokola antu atumonaña.
7. Muloñadi wutwatela kutoñojokela kuzata mudimu wakudikeñela hakupompa?
7 Akwakuzata Mudimu Wakudikeñela Akeñekaña: Akwakuzata amavulu akeñekaña hakwila nawu kupompa kwendi chachiwahi. Komana munateli kukwashana? (Mas. 110:3) Mudimu wazatañawu heluña dakupompela niwena wekala hakachi kamudimu wajila nawa wahanaña wunsahu wawuwahi. Mukulumpi watalaña iluña dimu dapompeleleñawu kupompa kwankambi wahayamini chikupu hakumona akwakuzata mudimu wakudikeñela chiyawahishiluwu itala chakwila wasonekeli nindi: “Inakuyisakilila hachuma chekomwesha chimuneli chinabula kumonawu dehi. Mpinji yejima natiyaña hohu kwampuhu nawu aYinsahu jaYehova hiyantu ambukaku akweti yililu yayiwahi hama, mpinji yejima ashiyaña iluña detu dawunyonji kubadika chadiwaninuwu. Enu nikuloñesha kwenu mwaletesha adinu iluña dikali dawunyonji kudi antu nawa izanvu dawantu alema itwabula kwiluka diwu awahisha.”
8. AkaMutayi waFirst Aid atela kukwashana munjilanyi, nawa yumanyi yatela kwilukilawu chadimu antu anakwinza kukupompa?
8 Mutayi waFirst Aid wekala wakukwashana hamaposu akukasumwisha bweñi. Bayi neyi himutayi wakuhanina yitumbu hela chipatelaku. Mwani mwakasendi yitumbu yenu hela yuma yikwawu yadifwana, muloña yumiyi hiyakayihana hakupompaku. Neyi mweluka dehi nenu mwakatakataña musoñu washunga, chikatu chamuchima niyikatu yikwawu, mwatela kusenda yitumbu yashikila. Atela kwinza nantaña yawu hela muntu wamuchipompelu weluka yikatu yawu nawa wunateli kuyikwasha neyi kumwekana kukala kwakukasumwisha. Neyi chakwila antu akatakataña hiyakweti ntaña watela kuyikwashaku, atela kuyileja aeluda haniku kukala nawa akwiluka mwakuyikwashila. Hichikutwesheka kuloñesha tupeka twadimena hakupompa kwankambi kulonda kuhembelamu antu akatakataña neyi epula mavumba acheñuku.
9. Kukoolekanyi kutukekala naku kwakushimwina antu ashakamaña mwiluña dakupompela?
9 Mpinji Yitwatela Kushimwina: Antu amavulu ashakamaña mwiluña dakupompela akamona enyi awunyonji anavwali mabaji hakupompa kwankambi, nawa chumichi chakayileñela kukeña kwiluka yuma yayivulu, dichi tukekala nakukooleka kwakuyileja nsañu yakupompa. Kansi wayaaka 4 wasendeli mukanda wawuha wedikili hakupompa kwitala dakudiila hampinji yachayili nakumulejawu mukwakulandisha yakudya. Chumichi chaletesheli anvwali jindi kumutambika ona mumbanda kukupompa.
10. Tunateli kwimbujola ñahi yililu yadiña nachisaka chaYesu kutalisha hayuma yakuspiritu yatuloñeshelañayi Yehova?
10 A Yudeya ashili maana kuyuma yakuspiritu adiña nakutalila yawija yakushankulu yayizañalesheleña. (Kuhit. 16:15) Chisaka chaYesu nichena chadiña nakudikita kulonda kuya nakupompa nikuhetelamu chikupu. Anetu nawa twasakililaña hakupompa kwetu kwankambi, twakwimonaña netu hichawaana chakufuma kudi Tata yetu wamwiwulu. (Yak. 1:17) Yinu diyi mpinji yakudiloñesha haniku kukooleka kwahachaaka kwakudifukula kudi Yehova.
[Chikasha chidi hefu 5, 6]
Yuma Yitwatela Kwanuka haKupompa kwaNkambi
◼ Mpinji Yikatachika Progiramu: Progiramu yikatachikaña nampinji ya 8:20 hamafuku ejima asatu. (Yinsu Yetala daKupompelamu akayenzununaña nampinji ya 7:00.) Neyi tumina twakutachikilahu tunatachiki dehi, wonsu wetu twatela kushakama muyitwamu yetu kulonda kupompa kukatachiki munjila yakalemesha. Progiramu yikamana nampinji ya 15:55 Hefuku Datachi, 16:15 Hefuku daMuchiyedi, nawa Hefuku daMuchisatu yikamana nampinji ya 15:10.
◼ Chakwimika Nyotoka: Chineli maluña hakwimikila nyotoka Hetala Dakupompela akehaña, yisaka yikweti nyotoka yatela kutiyashana kulonda akazatisheña motoka wumu.
◼ Kukwatila Yitwamu: Antu imunenzi nawu mumotoka yimu hela imunakushakama nawu itala dimu kushilahu niantu imunakudiza nawu Bayibolu diwu imwatela hohu kuhembela yitwamu hela hakushakama.—1 Kor. 13:5.
◼ Kudya Kwahachayili: Mwani mwakasendi yakudya yenu yahachayili kulonda mukabuleña kufuma heluña dakupompela nakuya nakukeña yakudya hampinji yakunooka. Mwatela kusenda kachimpaya kanyanya kimwatela kusha mwishina dachitwamu. Bayi musenda chuma cheneni nankashi chekalashi mwakusha yakudya heluña dakupompelaku.
◼ Yawaana: Tunateli kumwekesha kusakilila hakutuloñeshela kupompa kuhitila mukuhana yawaana yamudimu wamukaayi kejima mukudikeñela Hetala detu daWanta hela hakupompa kwankambi. Macheki ejima akahanawu hakupompa kwankambi atela kuyihana ku “Watch Tower Society.”
◼ Maposu niYuma Yakukasumwisha: Neyi kunamwekani kukala kwakukasumwisha heluña dakupompela, mwani hoshenu nakalama wudi kwakwihi, kulonda yayi swayi-swayi nakuleja akamutayi waFirst Aid aheluña dakupompela kulonda muntu wakuluka yitembi yatweshi kumona kutoha kwakukala nikukwashana.
◼ Kukwata Mazu: Makina ejima akukwatilaku mazu bayi muyisokankesha kuyozelu yakutiyakeshelamu mazu hela kukesi kawuneñuku, nawa mwatela kuyizatisha hohu munjila yakubula kuluwañesha amakwawu.
◼ Malasha: Chikuwaha neyi tukuzatisha nakwesekeja malasha asweja ivumba, muloña anateli kuleta kukala kudi amakwawu ekala nakukala kwañonenu hela kukala kukwawu.—1 Kor. 10:24.
◼ Mafomu Akumukeñelahu Muntu: Zatishenu formu yaMwani Mukeñenu Iwu Muntu (S-43) kulonda muhani nsañu yamuntu wunamwekeshi mpwila hakumushimwina wunsahu wamumpanji hampinji yakupompa kwankambi. Akwakushimwina atela kusenda fomu yimu hela jiyedi jakumukeñelahu muntu kukupompa kwankambi. Mwatela kuhana mafomu imunasoneki kuKapeka kaNyikanda hela kudi nsoneki wamuchipompelu chenu neyi munafunti.—Talenu Mudimu Wetu waWanta waNovember 2009, ifu 4.
◼ Chipapatishu: Hamatala Akupompela Kupompa Kweneni hekala majiya akupapatishila, izaza datela kulondela nshimbi yakushakama muyitwamu hampinji yachipapatishu. Kumaluña amakwawu kwapapatishilañawu mutuloña, nimunyihoñi, anyana bayi atemukilaña kumbidi yawantu anakuya nakupapatishewaku, ilaña atela kushala hanyima yawatulama. Hadi yaaka yayivulu yinahituhu, twatambwilaña wunsahu wakwila nawu akulumpi amavulu hiyayaña kwiluña dakupapatishilaku. Nianvwali akweti anyana anakupapatishewa hiyayaña nakumona ichi chidika chalemaku. Dichi anvwali niakulumpi amakwawu anayikonkomweni kuyaña kuchipapatishu kulonda amwekesheña kulema kwanichi chidika.
◼ Chimwenu: Kwosi muntu anetejuwu kukwata nyevulu kudi kwejima hela kwakwihi nachinañamu hampinji yachimwenu nawa kwosi muntu yanetejuwu kuluwañesha amakwawu kudiluñisha chimwenuku. Mwani toñojokelenuku akwenu kuhitila mukubula kuyijikilila. Anyana atela kushakama nawanvwali jawu. Atulama akweti wuswa wakupalañesha anyana anadikuñululi hamu nakuyitwala kudi anvwali jawu hela kuyifumisha muchipaka kulonda abuli kuluwañesha antu.
◼ Nswadi: Tunakukeña kuhemba iluña detu dakupompela dadiwahi nawa dawunyonji. Neyi tunakutoñojokelaku amakwawu twatela kunatila yakudya yejima yinashaluhu, yipapilu niyuma yikwawu mwibuku dinaloñeshuwu, ichi chamwekeshaña chiwahi nhoshelu yetu yakwila nawu twamwakama Nzambi. Hakupompa kwankambi kudi hambidi, wejima wetu tukafwili kuhemba iluña dakupompela dawunyonji nikudihemba etu aweni kulonda ‘tuwahishi kuleja kwaNzambi, Chamwinu chetu, muyuma yejima.’—Tit. 2:10.
◼ Nyisalanyi: Mpinji yejima anyana anyanya atela kuyitwala kudi anvwali jawu hela akulumpi anakuyihemba hakuzatisha kapeka kakuwelela kumakasa ninyisalanyi. Mpinji yikwawu hakupompa, chimwahita ora yimu hela maora amavulu anyana atachikaña wupila. Hakwila awani mwakuyila nakuhema, kakavulu anyana ekalaña nachaaku chakutemukila kunyisalanyi hampinji yakupompa, nakuluwañesha amakwawu. Neyi chakwila anvwali akanjikija anyanawu kuya kumusalanyi henohu kanda atachiki kupompa, kakavulu hiyaluwañeshaña kupompa chimwahita mpinji yanteshaku. Kutwala anyana kumusalanyi nikutupeka twakuwelela kumakasa nikwena kwakiñaña anyanetu kuchina akenda kekala muwubanji.
◼ Mudimu waKudikeñela: Twazañalalaña hama hakupompa kwankambi sweje-e dinu neyi tudihana kuzata mudimu wakudikeñela hakupompa. (Yil. 20:35) Ejima anakukeña kudihana atela kuya kuDipatimenti yaMudimu waKudikeñela hakupompa kwankambi. Anyana adi nayaaka 16 nakufunta mwishina anateli kuzata chiwahi neyi azatilaña hamu nawanvwali jawu hela ayihembaña hela akulumpi amakwawu anayiteji kuzata nawu.