Komana Munadiloñeshi Kuya kuChawija chakuSpiritu?

1. Kudiloñesha kwamuchidinyi kunakukeñeka hachawija?

¹ Kwekalaña nyidimu yayivulu yakeñekaña hakuloñesha chawija. Kwekalaña kulanda yakudya, kuyiteleka chiwahi, nikuyiloñolwela antu. Nawa atela kuhana yakudya chakadi mapupa. Cheñi, atela kuloñesha iluña kwakudyila. Enyi niwena atela kudiloñesha hakwila nawu akashiki kuchawija. Hela mudimu wakuloñesha chawija weneni, chawahaña nankashi neyi mushakama nawamabwambu niantaña jenu nakudyila hamu yakudya yalumweñumweñu. Katataka aYinsahu jaYehova mukaayi kejima akupompaña mumazanvu amaneni nianyanya kulonda akadiluñishi chawija chakuspiritu chadiña nakutalilawu chaKupompa kwaNkambi kunakwila nawu ‘Tonenuña!’ Mudimu weneni wakuloñesha progiramu awuzata dehi kulonda yuma yendi chiwahi. Anetu nawa anatutambiki. Hakwila nawu tukekaluku nawa twakahetelumu chikupu, ninetu twatela kudiloñesha chiwahi.—Yish. 21:5.

2. Chumanyi chitwatela kwila hakwila twakekaluku kuchawija chejima chakuspiritu?

² Hetelenumu Chikupu: Munaloñeshi dehi yuma yejima yimunafuukuluhu kulonda mwakekaluku kuchawija chakuspiritu chejima? Neyi chinatwesheki, lejenu mukulumpi wayiñija nyidimu nenu mwakaya nakupompa mafuku ejima asatu. Komana munaloñeshi nsañu jañendelu nihakukama? Aeluda atela kwiluka chikupu nawu atushinakaji niakata ninana ejima anakankili anayakameni.—Yere. 23:4; Ŋal. 6:10.

3. Muloñadi chitukubulila kuya kukupompa kwamatuña kunabuli kututambikawu?

³ Amakwawu akaya kukupompa kwamatuña. Anukenu nenu kudi antu anatambikuwu kuya nakupompa kweniku. Hakutanjika yumiyi, kuloñesha kwelukili chikupu naambala yawantu atela kutambikawu, nawa kunashinshiki hayuma yayivulu. Antu akadichinyaña neyi akwakushimwina akaya kukupompa kwamatuña kwanabuli kuyitambikawu.

4. Yumanyi yinatwanukishuwu yikutukwasha kutachikila progiramu hamu mafuku ejima?

⁴ Diloñeshenu kulonda mwakashikeña swayi hakupompa mafuku ejima kulonda mwakamoneña hakushakama henohu progiramu kanda yitachiki. Henohu chibalu chakupompa kanda chitachiki, zatishenu oku kapinji nakutala yuma yidi muprogiramu. Chumichi chikuyikwasha kusha muchima kuyuma yikuhoshawu. (Ezera 7:10) Neyi cheyamani wanochu chibalu yashimuna kutachika kwaprogiramu natumina, mwani tiyililenu nawa imbenuku kamina kamatachikilu nikulomba.

5. Indi chisaka chetu chinateli kuhetelamu ñahi muprogiramu?

⁵ Neyi chisaka chinashakami hamu hakupompa, anvwali atela kukwasha anyanawu kulonda kutiyilila kuprogiramu nakanañachima. (Kuhit. 31:12) Antu ejima anayikoleshi kutaña mujiBayibolu jawu hampinji yakutaña nsona. Mukwikala asoñama neyi munakusoneka nsañu jantesha. Mazu imukusoneka akayikwashaku kwanuka yikuma yamaneni yahosheluwu mumpanji. Mwani bayi muhosha-hoshaña hampinji yakupompa, hela kunyamoka nyamokaku. Neyi mudi naselufoni, mwani bayi yiyihuwañesha hela kuluwañesha akwenu neyi munakupompaku. Neyi chibalu chakupompa chinamani, komana kwila muhanjeka nawakwenu hayuma yinayihizumwishi nehi?

6. Chumanyi cheneni chamwekanaña hakupompa, nawa tunateli kudiluñisha ñahi?

⁶ Hakupompa kwaNkambi, twazañalalaña hakudikunda nawana kwetu niahela nawa chumichi hichamwekanaña mukaayuku. (Mas. 133:1-3; Maku 10:29, 30) Komana kwila mudilumbulula kudi antu imunadikumashani nawu nikuhanjeka nawu hampinji yachayili nehi? Dihawahila kusenda yakudya nakudyila mulubanza chatela mutemokeleña kumalesitilanti hela kumatala nakudyilaku. Dichi bayi mushalahu kukooleka kwamuchidiwu kwakudikoleshaku.—Rom. 1:11, 12.

7. Yumanyi yitunakuloñesha kutalisha kunvwalilu yetu?

⁷ Nvwalilu: Twahetelañamu chikupu hakumona aIsarela chayilejeluwu kudi Yehova kusha nzombu kunsa yayikowelu yawu, nikushaku wanda wawusombu. (Kuch. 15:37-41) Chamonawu chumichi chayanukishileña nawu adiñi antu atondawu kudifukula kudi Yehova. Makonu, neyi tuvwala chachiwahi hakupompa chamwekeshaña nawu hitudi neyi antu akwituñaku. Kwahanaña wunsahu weneni kudi akwakutala hela tunayi nakudya hanyima yaprogiramu. Dichi, mwatela kusha maana kunvwalilu yenu.

8. Tunateli kushimwina ñahi kudi antu hampinji yitudi mwiluña hela mumusumba mudi kupompa?

⁸ Hanenu Wunsahu: Neyi tutoñojokela chadimu, tunateli kushimwina antu mwiluña mudi kupompa. Mana kwetu wayili kwitala dakudyila nañodindi hanyima yaprogiramu wakuminini dakwinyika habaji yindi nakumwihula mukwakuhana yakudya nindi: “Wunayimoni antu amavulu anavwali awa mabaji?” Mukwakuhana yakudya wahosheli nindi wayimweni nawa wahayamini hakumona antu ejima anavwali tuyuma twadifwana. Hohenohu mpanji yitachika nikutachika, mana kwetu yamuleja nimukwakuhana yakudya nindi yokenzi nakupompa.

9. Tunateli kumwekesha ñahi kusakilila kudi Mukwakuloñesha kudya, Yehova?

⁹ Hela chakwila amana kwetu akuhoshaña mpanji, kwihujola, nikwikala muyimwenu, Tata yetu wamwiwulu, Yehova diyi wunatuloñesheli chiwahi chawija chakuspiritu chachinu chaaka. (Isa. 65:13, 14) Tukumwekesha kusakilila kudi Mukwakuloñesha kudya neyi twikalaku mafuku ejima asatu nakumanisha yakudya yakuspiritu yakatwinkawu yejima to-o. Munamanishi dehi kuloñesha yuma yejima kulonda mwakayi nakupompa?

[Chikasha chidi hefu 5]

Yuma Yitwatela Kwanuka haKupompa kwaNkambi

◼ Mpinji Yikatachika Progiramu: Progiramu yikatachikaña nampinji ya 8:20 hamafuku ejima asatu. (Yinsu Yetala daKupompelamu akayenzununaña nampinji ya 7:00.) Neyi tumina twakutachikilahu tunatachiki dehi, wonsu wetu twatela kushakama muyitwamu yetu kulonda kupompa kukatachiki munjila yakalemesha. Progiramu yikamana nampinji ya 15:55 hefuku datachi, 16:05 hefuku damuchiyedi, nawa hefuku damuchisatu yikamana nampinji ya 15:30.

◼ Chakwimika Nyotoka: Chineli maluña hakwimikila nyotoka Hetala Dakupompela akehaña, yisaka yikweti nyotoka yatela kutiyashana kulonda akazatisheña motoka yimu.

◼ Mazu Akusoñamisha: Hichikweti muloña neluña dimukwimikila motoka yenuku, mwatela kukiya motoka yenu mpinji yejima nawa bayi mushiya chuma chidi chejima chinakumwekana mukachuku. Kiyilenu yuma yenu mukachi neyi chikutwesheka. Babalenu cheñi namakombi enzaña hanapompeli antu amavulu. Chumichi chinayi mukwila nawu tubuleña kushiya yuma yejima yalema muyitwamu chakubula kuyitala. Twatambwila yileji yantesha kutalisha hadi antu atama afwilaña kuluwañesha nyana yanyanya nakuyitwala kwacheñi. Mwani ikalenu asoñama.

◼ Kukwatila Yitwamu: Antu yimunenzi nawu mumotoka yimu hela yimunakushakama nawu itala dimu diwu yimwatela hohu kuhembela yitwamu hela hakushakama.

◼ Kudya Kwahachayili: Mwani mwakasendi yakudya yenu yahachayili kulonda mukabuleña kufuma heluña dakupompela nakuya nakukeña yakudya hampinji yakunooka. Mwatela kusenda kachimpaya kanyanya kimwatela kusha mwishina dachitwamu. Bayi musenda chuma cheneni nankashi chekalashi mwakusha yakudya heluña dakupompelaku.

◼ Yawaana: Tunateli kumwekesha kusakilila hakutuloñeshela kupompa kuhitila mukuhana yawaana kumudimu wamukaayi kejima mukudikeñela Hetala detu daWanta hela hakupompa kwankambi. Macheki ejima akahanawu hakupompa kwankambi atela kuyihana ku “Watch Tower Society.”

◼ Maposu niYuma Yakukasumwisha: Neyi kunamwekani kukala kwakukasumwisha heluña dakupompela, mwani hoshenu nakalama wudi kwakwihi, kulonda yayi swayi-swayi nakuleja akamutayi waFirst Aid aheluña dakupompela kulonda muntu wakuluka yitembi yatweshi kumona kutoha kwakukala nikukwashana.

◼ Kukwata Mazu: Makina ejima akukwatilaku mazu bayi muyisokankesha kuyozelu yakutiyakeshelamu mazu hela kukesi kawuneñuku, nawa mwatela kuyizatisha hohu munjila yakubula kuluwañesha amakwawu.

◼ Malasha: Chikuwaha neyi tukuzatisha nakwesekeja malasha asweja ivumba, muloña anateli kuleta kukala kudi amakwawu ekala nakukala kwañonenu hela kukala kukwawu.—1 Kor. 10:24.

◼ Mafomu Akumukeñelahu Muntu: Zatishenu formu yaMwani Mukeñenu Iwu Muntu (S-43) kulonda muhani nsañu yamuntu wunamwekeshi mpwila hakumushimwina wunsahu wamumpanji hampinji yakupompa kwankambi. Akwakushimwina atela kusenda fomu yimu hela jiyedi jakumukeñelahu muntu kukupompa kwankambi. Mwatela kuhana mafomu imunasoneki kuKapeka kaNyikanda hela kudi nsoneki wamuchipompelu chenu neyi munafunti.—Talenu Mudimu Wetu waWanta wachiBemba waFebruary 2005, ifu 7.

◼ Chimwenu: Kwosi muntu anetejuwu kukwata nyevulu kudi kwejima hela kwakwihi nachinañamu hampinji yachimwenu nawa kwosi muntu yanetejuwu kuluwañesha amakwawu kudiluñisha chimwenuku. Mwani toñojokelenuku akwenu kuhitila mukubula kuyijikilila. Anyana atela kushakama nawanvwali jawu. Atulama akweti wuswa wakupalañesha anyana anadikuñululi hamu nakuyitwala kudi anvwali jawu hela kuyifumisha muchipaka kulonda abuli kuluwañesha antu.

◼ Chipapatishu: Hamatala Akupompela Kupompa Kweneni hekala majiya akupapatishila, izaza datela kulondela nshimbi yakushakama muyitwamu hampinji yachipapatishu. Kumaluña amakwawu kwapapatishilañawu mutuloña, nimunyihoñi, anyana bayi atemukilaña kumbidi yawantu anakuya nakupapatishewaku, ilaña atela kushala hanyima yawatulama. Hadi yaaka yayivulu yinahituhu, twatambwilaña wunsahu wakwila nawu akulumpi amavulu hiyayaña kwiluña dakupapatishilaku. Nianvwali akweti anyana anakupapatishewa hiyayaña nakumona ichi chidika chalemaku. Dichi anvwali niakulumpi amakwawu anayikonkomweni kuyaña kuchipapatishu kulonda amwekesheña kulema kwanichi chidika.

◼ Nswadi: Tunakukeña kuhemba iluña detu dakupompela dadiwahi nawa dawunyonji. Neyi tunakutoñojokelaku amakwawu twatela kunatila yakudya yejima yinashaluhu, yipapilu niyuma yikwawu mwibuku dinaloñeshuwu, ichi chamwekeshaña chiwahi nhoshelu yetu yakwila nawu twamwakama Nzambi. Hakupompa kwankambi kudi hambidi, wejima wetu tukafwili kuhemba iluña dakupompela dawunyonji nikudihemba etu aweni kulonda ‘tuwahishi kuleja kwaNzambi, Chamwinu chetu, muyuma yejima.’—Tit. 2:10.

◼ Nyisalanyi: Mpinji yejima anyana anyanya atela kuyitwala kudi anvwali jawu hela akulumpi anakuyihemba hakuzatisha kapeka kakuwelela kumakasa ninyisalanyi. Mpinji yikwawu hakupompa, chimwahita ora yimu hela maora amavulu anyana atachikaña wupila. Hakwila awani mwakuyila nakuhema, kakavulu anyana ekalaña nachaaku chakutemukila kunyisalanyi hampinji yakupompa, nakuluwañesha amakwawu chikupu. Neyi chakwila anvwali akanjikija anyanawu kuya kumusalanyi henohu kanda atachiki kupompa, kakavulu hiyaluwañeshaña kupompa chimwahita mpinji yanteshaku. Kutwala anyana kumusalanyi nikutupeka twakuwelela kumakasa nikwena kwakiñaña anyanetu kuchina akenda kamona wubanji.