Londelenu muMahaji aKristu Kuhitila muKumwekesha Kalemesha
1. Indi mutu wakupompa kwachinu chaaka wunakundami ñahi kukumwekesha kalemesha?
1 Bayibolu yamulumbulula Yehova Mwanta Wakuleña Kwejima nawu, wavwala kulema. (Mas. 104:1) Mpinji yejima Yesu wahosheleña nikwila yuma munjila yalemesheleña Tata yindi nintanjikilu yaTata yindi. (Yow. 17:4) Wonsu wetu tudi nakukooleka kwakumwimbujola Yesu nikuleta mpuhu kudi Yehova haKupompa kwaNkambi kunakwinza kunakwila nawu “Londelenu Mumahaji aKristu!”
2. Indi kudiloñesha kulonda tukawaniki kuyibalu yejima yakupompa kwalemeshaña ñahi Yehova?
2 Kulemesha Kudifukula: Tunateli kumulemesha Yehova kuhitila mukudiloñesha kulonda tukawaniki kunichi chawija chakuspiritu chinatuloñesheliyi. Komana mwahosha dehi namuntu wayiñija mudimu nikuloñesha yuma yejima kulonda mukawanikiku mafuku ejima asatu akupompa? Komana munafuukulihu kushika hampinji yatelela kulonda mukamoni hakushakama nikwimbaku kamina kakwenzulwila nikulomba? Komana munaloñeshi dehi yakudya yenu yahachayili kulonda mwakadyili hamu nawana kwenu hakupompa? Hakutachika kwachibalu hichibalu neyi cheyamani yatuleja nindi tushakami henohu kamina kanda katachiki, twatela kuleka mpanji nikushakama nakuhembelela kutachika kwaprogiramu.
3. Indi kutiyilila kuprogiramu kwalemeshaña ñahi kudifukula kwetu?
3 Kutiyilila chikupu kuprogiramu nikwena kwamulemeshaña Tata yetu wamwiwulu. Hanyima yakutala kupompa kwankambi kwamwiluña dawu, mukwakushimuna nsañu wumu wasonekeli nindi akwakutala akutiya kuwaha “nayililu yayiwahi yawantu anapompi, hampinji yanakulondela yuma yinakuhoshewa chakadi kuleta ipumba chinakumwekesha nawu anashi kashinshi kuyuma yakuspiritu.” Wahosheli cheñi “hayililu yayiwahi yawanyana amavulu yabula kuvula kumwekana . . . , wonsu wawu adihembeli chiwahi nawa atañileña mavasi amuBayibolu Yajila.” Neyi progiramu yinatachiki dehi, bayi neyi diyi mpinji yakuhosha-hosha, kudisonekela nsañu hamaselufoni, kudya, hela kwendujolaku. Anyana atela kushakama nawanvwali jawu kulonda anvwali jawu ayikwashi kuhetelamu muprogiramu. (Kuhit. 31:12; Yish. 29:15) Kwila mwenimu kukumwekesha nawu tunalemeshi akwetu nawa tunakusakilila hayakudya yalema yakuspiritu yanakutwinkawu.
4. Muloñadi chitwatela kumwekena chiwahi hampinji yitudi hakupompa?
4 Mmwekenu Yakalemesha: Antu amavulu ahamekeli nankashi hayanukishu yadiñi mumpanji yakupompa kwankambi yahosheleña nawu “Mwekeshenu Kalemesha KawiniKristu Mpinji Yejima,” yakonkomweneni nawu antu jaNzambi atela kumwekesha kalemesha kawiniKristu munvwalilu nimmwekenu yawu. Nichinu chaaka twatela kushaku cheñi kashinshi kuniyi mbadi. Mmwekenu yetu yamwekeshaña chitwamwakama Yehova nikukooleka kwakwikala aYinsahu jindi. Twatela kuvwala neyi antu “adishimunaña nawu twaakamaña Nzambi.”—1 Tim. 2:9, 10.
5. Tunateli kwikala ñahi nammwekenu yayiwahi hampinji yakunooka mwiluña mudi kupompa?
5 Komana twatela kumwekana hohu chachiwahi neyi hitukupompa? Anukenu nenu antu amavulu akatumonaña tunavwali mabaji ahakupompa mwiluña mudi kupompa. Mmwekenu yetu yatela kutwileñela kwambukaku nawantu amavulu. Dichi nihampinji yitunakunooka, chidi neyi hitukuya nakudya hanyima yaprogiramu, twatela kuvwala neyi ankoñi anenzi kukupompa kwawiniKristu nawa bayi tuvwala yakuvwala yidi neyi majinizi, tuputula, nyipila yakuhatula makasaku. Neyi twila mwenimu, tukuhana wunsahu wawuwahi kudi antu amunodu iluña. Yehova wazañalalaña neyi mmwekenu yetu yimwekesha nawu tudi ankoñi.
6. Yumanyi yayiwahi yafumaña mukumwekesha kalemesha kawiniKristu?
6 Yuma Yayiwahi Yafumañamu: Kumwekesha kalemesha kawiniKristu hakupompa kwetu kwenzululaña njila yakuhaninamu wunsahu wamumpanji nawa kwazañaleshaña antu atumonaña. Chamanini kupompa kumu, mukulumpi wanfulumendi wumu wahosheli nindi: “Kanda tumoneñahu dehi antu adi nayililu yayiwahi neyi awaku. Yenu mwekala neyi chakeñañayi Nzambi nindi twikali chochenichi.” Kwikala nakalemesha kwamwekeshaña nawu munakudivumbika wumu namukwawu nikumulemesha Yehova. (1 Pet. 2:12) Kalemesha kamwekeshaña nawu twamwakama Nzambi nawa tunakusakilila hakukooleka kwakudizishewa naTata yetu. (Heb. 12:28) Tufwilenu kumwekesha kalemesha hampinji yitunakuchiñeja Kupompa kwaNkambi kwa “Londelenu Mumahaji aKristu!”
[Chikasha chidi hefu 6]
Yuma Yitwatela Kwanuka haKupompa kwaNkambi
◼ Mpinji Yikatachikaña Progiramu: Progiramu yikatachikaña nampinji ya 8:20 hamafuku ejima asatu. (Yinsu Yetala daKupompelamu, akayenzununaña nampinji ya 7:00. Neyi tumina twaWanta twakwenzununa nachu tutachika kuvuma, wonsu wetu twatela kushakama muyitwamu yetu kulonda kupompa kukatachiki munjila yakalemesha. Progiramu yikamanaña nampinji ya 16:25 Hefuku Datachi, niHefuku daMuchiyedi, ilaña Ifuku daMuchisatu yikamana nampinji ya 15:45.
◼ Kukwatila Yitwamu: Antu yimunenzi nawu mumotoka yimu hela yimunakushakama nawu itala dimu diwu mwatela kuhembela hohu yitwamu.
◼ Kudya Kwahachayili: Mwani mwakasendi yakudya yenu yahachayili kulonda mukabuleña kufuma heluña dakupompela nakuya nakukeña yakudya hampinji yakunooka. Mwatela kusenda kachimpaya kanyanya kimwatela kusha mwishina dachitwamu. Bayi musenda chuma cheneni nankashi chegilasi mwakusha yakudya niwalwa heluña dakupompelaku.
◼ Yawaana: Mali amavulu nankashi anazatishewi hakuloñesha kupompa kwankambi. Tukumwekesha kusakilila kuhitila mukuhana yawaana mukudikeñela kumudimu wamukaayi kejima Hetala detu daWanta hela hakupompa kwankambi. Macheki ejima akahanawu hakupompa kwankambi atela kusonekahu nawu ayihani ku “Watch Tower Society.”
◼ Maposu niKukala Kwakukasumwisha: Neyi kunamwekani kukala kwakukasumwisha hakupompa kwankambi, mwani hoshenu nakalama wudi kwakwihi kulonda yayi swayi-swayi nakuleja akamutayi waWukwashu Waswayi-swayi aheluña dakupompa kulonda muntu wakuluka yitembi yatweshi kumona kutoha kwakukala nikuhana wukwashu.
◼ Kukwata Mazu: Nyichidi yejima yamakina akukwatilaku mazu bayi muyisokankesha kuyozelu yakutiyakeshelamu mazu hela kukesi kawuneñuku, nawa mwatela kuyizatisha hohu munjila yakubula kuluwañesha amakwawu.
◼ Malasha: Chikuwaha neyi tukuzatisha nakwesekeja malasha asweja ivumba, muloña anateli kuleta kukala kudi amakwawu ekala nakukala kwañonenu hela kukala kukwawu.−1 Kor. 10:24.
◼ Mafomu Akumukeñelahu Muntu: Mwatela kuzatisha fomu yaMwani Mukeñenu Iwu Muntu (S-43) kulonda muhani nsañu yanowu muntu wunamwekeshi mpwila muloña wawunsahu wamumpanji wutwaheneni hampinji yakupompa kwankambi. Akwakushimwina atela kusenda fomu yimu hela jiyedi jakukeñelahu muntu hakwinza kukupompa kwankambi. Mafomu yimunenzeshi mwatela kuyihana kuKapeka kaNyikanda kulonda ayitemeshi hela kudi nsoneki wachipompelu chenu neyi munafunti.−Talenu Mudimu Wetu waWanta wachiBemba waFebruary 2005, ifu 7.
◼ Nswadi: Tunakukeña kuhemba iluña detu dakupompela dadiwahi nawa dawunyonji. Neyi tunakutoñojokelaku amakwawu twatela kusenda yakudya yejima yinashalihu, yipapilu niyuma yikwawu kumatala etu, ichi chamwekeshaña chachiwahi nhoshelu yetu yakwila nawu twamwakama Nzambi. Hakupompa kwankambi kudi hambidi, wejima wetu tukafwili kuhemba iluña dakupompela dawunyonji nikudihemba etu aweni kulonda ‘kuwahisha kuleja kwaNzambi, Chamwinu chetu, muyuma yejima.’—Titusa 2:10.
◼ Nyisalanyi: Mpinji yejima anyana anyanya atela kuyitwala kudi anvwali jawu hela akulumpi anakuyihemba hakuzatisha kapeka kakuwelela kumakasa ninyisalanyi. Mpinji yikwawu hakupompa, chimwahita ora yimu hela maora amavulu anyana atachikaña wupila. Hakwila awani mwakuyila nakuhema, kakavulu anyana ekalaña nachaaku chakutemukila kunyisalanyi hampinji yakupompa, nakuluwañesha amakwawu chikupu. Neyi chakwila anvwali akanjikija anyanawu kuya kumusalanyi henohu kanda atachiki kupompa, kakavulu hikwekalaña kuluwañesha kupompa chimwahita mpinji yanteshaku. Kutwala anyana kumusalanyi nikutupeka twakuwelela kumakasa nikwena kwaleñela kukiña anyanetu nikubula kudikatisha.