Twalekenuhu Kumuchiñilila Yehova

1. Indi mutu wakupompa kwankambi wudi nawudi, nawa muloñadi chiwunateleli?

¹ Isaya wasonekeli nindi ‘Yehova hiNzambi wawuñaji. Amuzañalu antu ejima akumuchiñilila.’ (Isa. 30:18b) MuBayibolu mwekala nsañu yayivulu yakusompesha kwaNzambi kwakujilumuna ayilumbu jindi nikupulwisha ambuñindi ashinshika. Indi iyi nsañu yayidizishañadi akwakudifukula aYehova makonu? Chayinu mpinji, chumanyi chitwatela kwila hakudiloñesha ‘kwifuku daYehova deneni, dakutiyisha woma’? (Yoweli 2:31, 32) Kupompa kwetu kwaNkambi kunakwinza kwa “Kupuluka Kudi Mukamwihi! kukatukwashaku kutoñojoka hanawa malwihu nikudishinshika etu aweni. Kukatukwashaku kutwalekahu kumuchiñilila Yehova.

2. Munjilanyi mutunateli kumwekeshela kalemesha kakupompa kwetu kwankambi?

² Komana mwadiloñesha dehi kulonda mukahetelimu hamafuku ejima asatu akupompa kwankambi? Chakutalilahu, komana mwayilejamu dehi ayiñija nyidimu hansañu yamafuku akunooka kulonda mwakawaniki kukupompa? Bayi muhembelela kukashali mafuku anteshaku. Chishenu mukulomba. Kulondelahu lombenu mafuku akunooka. (Nehe. 2:4, 5) Munjila yoyimu, bayi tulaba kuloñesha nsañu jañendelu, kwakukama, niyuma yikwawu yalemaku. Kuloñesha kwakuwahi kwamuchidiwu kukumwekesha nawu twalemesha chikupu mesa yaYehova yakuspiritu. Aeluda atela kwikala asoñama kulonda kukwashaku anakukeña wukwashu kutalisha hakuloñesha kwawu kwakupompa kwankambi, sweje-e atushinakaji muchipompelu.−Ŋal. 6:10.

3. Yililwinyi yatela kumwekesha antu jaYehova mwiluña mudi kupompa kwankambi?

³ Yililu Yayiwahi Yamulemeshaña Nzambi: Chitwahwila amavulu hamu hakupompa kwankambi, yililu yetu yayiwahi yahanaña wunsahu kudi antu amuchituñilu. Chumanyi chinakukeñeka kudetu? Hampinji yitudi heluña dakulanda nakulandulula didi mwiluña dakupompela, antu yitukuzata nawu atela kutiya kuwaha nayililu yetu yawiniKristu yidi neyi, kukaba kabe-e, kwovwaha, kudihemba nimaana. (Ŋal. 5:22, 23; Fwi. 4:5) Wonsu wetu twatela kumwekesha kukeña kwamuchidiwu ‘kwabulaña kwila chuma chabula kutelela, kwabulaña kukokwela kwindi hohu, kwabulaña kunyakala kuzuwa.’ Hela chakwila kumwekana kukala hela yuma yahuwañeshaña, twakakeña ‘kwila yuma yejima kulonda kulemesha Nzambi.’−1 Kor. 10:31; 13:5.

4. Indi anvwali anateli kukwasha ñahi anyanawu kudihemba awenawu munjila yaletaña kuhameka kudi Yehova?

⁴ Chelili kupompa kumu kwankambi kunamani dehi, mukulumpi wumu wetala damapumwinu wazañaleli hama nayililu nimmwekenu yayiwahi yawatwansi chakwila wamwekesheli mpwila yindi “yakukeña kutambwilaña enyi awaYinsahu jaYehova mpinji yejima.” Hichuma chaleteshaña muzañalalu! Iku hikuhameka hakufumba niwunlomboli wahanañawu anvwali. Neyi anvwali akushiyaña anyana kankawawu himaana amawahiku. Mpinji yejima mwatela kuhemba anyana chiwahi. (Yish. 29:15) Lekenu yililu yawu yayiwahi yileti kuhameka kudi Yehova nikutiyisha muchima windi kuwaha!−Yish. 27:11.

5. Tunateli kumulemesha ñahi Yehova kuhitila munvwalilu nimummwekenu?

⁵ Nvwalilu Yayiwahi niKudiwahisha: Wonsu wetu twatela kubombelaku kukuwaha kwahanewaña hampinji yakupompa kuhitila mukutondolwela nvwalilu yashiyashana nikudiwahisha kwabula kulumbuluka, kwahambakana, kwakutiyisha nsonyi hela kwabula kutelela. Ichi chinabombelimu hakuya nihakufunta kufuma kwiluña dakupompela, nihakukwasha kuloñesha iluña dakupompela, nihampinji yakupompa. Hakwikala antu jaNzambi, chuma chitwatela kwakamena nankashi hiijina daYehova nimpuhu, bayi yuma yahalwetu yitwakeña hela mahetaku. Nyitu yayisaka yikweti mudimu wakumona kwila nawu mmwekenu yayisaka yawu yinakumwekesha kulumbuluka nikuwundisha mumesu mpinji yejima.−1 Tim. 2:9.

6. Muloñadi wutwatelela kutwalekelahu kumwekesha mmwekenu yoyimu yalemeshewa hampinji yakunooka nihampinji yakupompa?

⁶ Kutwalekahu nammwekenu yalemeshewa hampinji yakunooka mumatala akupumwina, mumasitolu nihamatala akudyila hichuma chalema. Chachiwahi kuvwala yakuvwala yetu yahakupompa neyi twadilaña kwiluña dacheñi hanyima yakumanisha chibalu chakupompa. Kuvwala baji yahakupompa kukutukwashaku kwikala nakukooleka kwakushimwina wunsahu wamumpanji.−2 Kor. 6:3, 4.

7. Munjilanyi mutunateli kubombelaku kukuwunda nimuzañalu wakupompa? (Talenu “Yuma Yitwatela Kwanuka haKupompa kwaNkambi.”)

⁷ Isaya washimwineñahu dehi nindi: ‘Dichi chachiñililañayi Yehova, kulonda akayitiyili luwi, dichi chaditwalilayi hewulu kwiwulu, kulonda yakayitiyili wushona.’ (Isa. 30:18a) Kuhameka hawushona nihaluwi lwaYehova kwatela kutwileñela kumulemesha kuhitila muyililu nimummwekenu hampinji yitukahwila hamu hakupompa kwetu. Komana lekenu Kupompa kwaNkambi kwa “Kupuluka Kudi Mukamwihi!” kuleti kalemesha kudi Nzambi yetu nawa kutukwashiku kutwalekahu nakumuchiñilila!

HEMBENU NYANENU MPINJI YEJIMA.

Yuma Yitwatela Kwanuka haKupompa kwaNkambi

◼ Mpinji Yikatachikilañahu Progiramu: Progiramu yikatachikaña nampinji ya 8:45 hamafuku ejima asatu. (Yinsu Yetala daKupompelamu dakuLusaka, akayenzununaña nampinji ya 7:00). Mujiminiti jantesha henohu kupompa kanda kutachiki, cheyamani wukashakamaña hachinañamu iku tumina twaWanta twakutachika nachu kupompa tunakuvuma. Hayina mpinji wonsu wetu twakashakama muyitwamu yetu kulonda kupompa kukatachiki munjila yakalemesha. Progiramu yikamana nampinji ya 16:15 Hefuku Datachi, Hefuku Damuchiyedi nampinji ya 16:05, dichi Hefuku Damuchisatu yikamana nampinji ya 15:10.

◼ Chakwimika Nyotoka: Hamaluña ejima akupompela, iluña dakwimikila nyotoka dakekala kwoku chakadi kufwetesha, ilaña chikashindamena hadi muntu wukasambila kushika swañu. Mabaji ahakupompa diwu akahanaña wunsahu wakwimikilamu nyotoka.

◼ Kukwatila Yitwamu: Antu yimunenzi nawu mumotoka yimu hela yimunakushakama nawu itala dimu diwu mwatela kuhembela hohu yitwamu.

◼ Kudya Kwahachayili: Mwani mwakasendi yakudya yenu yahachayili kulonda mukabuleña kufuma heluña dakupompela nakuya nakukeña yakudya hampinji yakunooka. Mwatela kusenda kachimpaya kanyanya kimwatela kusha mwishina dachitwamu. Bayi musenda chuma cheneni nankashi chegilasi mwakusha yakudya niwalwa heluña dakupompelaku.

◼ Yawaana: Mali amavulu nankashi anazatishewi hakuloñesha kupompa kwankambi. Tukumwekesha kusakilila kuhitila mukuhana yawaana mukudikeñela kumudimu wamukaayi kejima Hetala detu daWanta hela hakupompa kwankambi. Macheki ejima akahanawu hakupompa kwankambi atela kuyihana ku “Watch Tower Society.”

◼ Maposu niYuma Yikwawu Yakukasumwisha: Neyi kunamwekani kukala kwakukasumwisha hakupompa kwankambi, mwani hoshenu nakalama wudi kwakwihi kulonda yayi swayi-swayi nakuleja akamutayi waWukwashu Waswayi-swayi aheluña dakupompa kulonda muntu wakuluka yitembi yatweshi kumona kutoha kwakukala nikuhana wukwashu.

◼ Kukwata Mazu: Nyichidi yejima yamakina akukwatilaku mazu bayi muyisokankesha kuyozelu yakutiyakeshelamu mazu hela kukesi kawuneñuku, nawa mwatela kuyizatisha hohu munjila yakubula kuluwañesha amakwawu.

◼ Kukwata Nyevulu: Neyi munakukwata nyevulu hampinji yakupompa, mwani bayi muzatisha chimunyi chakamelaku.

◼ Mapeja nimaSelufoni: Mwatela kuyichuna-chuna yumiyi kuchina jakenda kaluwañeshaña.

◼ Malasha: Chikuwaha neyi tukuzatisha nakwesekeja malasha asweja ivumba, muloña anateli kuleta kukala kudi amakwawu ekala nakukala kwañonenu hela kukala kukwawu.—1 Kor. 10:24.

◼ Maformu Akumukeñelahu Muntu: Mwatela kuzatisha formu yaMwani Mukeñenu Iwu Muntu (S-43) kulonda muhani nsañu yanowu muntu wunamwekeshi mpwila hamuloña wawunsahu wamumpanji wutwaheneni hampinji yakupompa kwankambi. Akwakushimwina atela kusenda formu yimu hela jiyedi jakumukeñelahu muntu hakwinza kukupompa kwankambi. Maformu anenzeshiwu mwatela kuyihana kuKapeka kaNyikanda kulonda ayitemeshi hela kudi nsoneki wachipompelu chenu neyi munafunti.—Talenu Mudimu Wetu waWanta wachiBemba waFebruary 2005, ifu 7

◼ Chipapatishu: Anakuya kuchipapatishu atela kushakama muyitwamu yinayiloñesheliwu henohu progiramu yantetemena Yefuku daMuchiyedi kanda yitachiki. Wudi wejima wunakudiloñesha kupapatishewa watela kusenda yakuvwala yashikila yakumujimika nachu niditwayi. Muyaaka yamunyima, amakwawu adiña nakuvwala yakuvwala yabula kutelela nawa yabulileña kulemesha chipaptishu. Aeluda anakuhituluka mumalwihu amumukanda waAbaiteyanya Ukucita Ukufwaya kwa kwa Yehova nawunakuya kuchipapatishu atela kwiluka nawu wudi wejima neluki iyi yuma. Chipapatishu chakumwekesha chinjikijilu chakudihana kwamuntu hiwubwambu waweni nawa hichuma chakudifuukwila hakachi kindi naYehova. Komana hichikuwahaku neyi anakuya kuchipapatishu akudikumbata hela kudikwata kumakasa namukwawu hampinji yinakuyipapatishawu.

◼ Mazu Akusoñamisha: Ikalenu asoñama kukukala kweneni kulonda mutweshi kutondolwelela kukala kwabula kushikila. Kakavulu, amakombi niantu abula kutelela abuwilaña antu anafumi kwakulehi. Mwani ilukenu nenu munakiyi motoka yenu nikaluwasha kenu mpinji yejima, nawa bayi mushiya chuma hatooka mumotoka yenu chatela kubakwisha muchima wamuntu kulonda yabuwiku. Amakombi niakwakupapata muyisweku yayakuvwala enzaña hadi antu amavulu. Bayi mushiyaña yuma yalema wuseya hachitwamu chenuku. Himukutwesha kwiluka nenu antu ejima yimudi nawu hiyeniKristuku. Muloñadi wakuyitesha? Twatambwilaña yileji hansañu yawantu akwituña esekaña kwiya nyana yanyanya.