Atuleñeli Nawu Tushakameña Haya Nyaaka
HINYI hakachi ketu wabulaña kukeña kushakama yaaka yayivulu nikudiluñisha nawumi? Tunateli kutiya kuwaha kushakama haya nyaaka namuzañalu nawa chakadi kukata! Twadi kushakamaña mpinji yeneni nawantu itwakeña, kuya mumatuña ashiyashana, kudiza, kwikala namaana nikudiza yuma yitwakeñesha nankashi.
Muloñadi antu chakeñelañawu kushakama haya nyaaka? Nsona jatulejaña nawu Nzambi washa mpwila yamuchidiwu mudi etu. (Mukwakutañisha 3: 11) Jahosha cheñi nawu “Nzambi hikukeña.” (1 Yowanu 4:8) Mwalala Nzambi wakukeña nateli kusha mudi etu mpwila yakushakama haya nyaaka hampinji yoyimu yatuleña nindi tufweña?
Chakadi nikujina, kufwa hibwambu detu wanyi. Bayibolu yahosha nawu ‘hichilumbu.’ (1 Akorinda 15:26) Antu amakwawu afwaña nawansi, amakwawu neyi anashinakaji dehi. Ilaña ejima kwayishikenaña. Antu amavulu akeñaña nikutoñojokahu wanyi, atiyaña woma. Komana iwu chilumbu amba kamushinda? Mwalala anateli kumushinda?
WUNSAHU WATULETESHAÑA TUCHIÑEJEÑA
Komana mukuhayama neyi mwiluka nenu hiyadiña nkeñelu yaNzambi yakwila nawu antu afweña? Mukanda wamuBayibolu waKutachika wukweti wunsahu wamwekeshaña nawu nkeñelu yaNzambi yadiña yakwila nawu antu ashakameña hamaseki haya nyaaka. Yehova Nzambi wawahishili iseki kulonda antu ashakameñahu. Kuhiñahu waleñeli iyala watachi, Adama nakumusha muparadisa, itempa daEdeni. Nkumininaku, “Nzambi wamweni yuma yejima yeliliyi nindi yinawahi nankashi.”—Kutachika 1:26, 31.
Adama amuleñeli wawanina, muchifwana chaNzambi. (Kuhituluka 32:4) Ñoda Adama, Eva, niyena wadiña wakadi ihuji, wadiña wawanina muyitoñojoka nikumujimba. Yehova wayilejeli nindi: “Semununenu, muvuleña, muwanini heseki, mudovwahishi; ikalenu anyanta niawanshi amwijiya, niawatujila ahaluzwizu, niayuma yayumi yejima yendaña hamaseki.”—Kutachika 1:28.
Chadi kusenda mpinji hakwila enzeshi iseki nawanyanawu. Eva wadi kwikala nanyana, ana anyana niwena adi kusema anyana sampu iseki dejima dinawanini antu neyi chakeñeleñayi Nzambi. (Isaya 45:18) Komana Yehova wadi kuyileja aAdama naEva nindi asemununi neyi chakwila wayileñeli nindi ashakameña yaaka yantesha hohu nakumona chikusemuka nyanawu niejikulu awu ilaña chakadi kwiluka chuma chikayimwekena kumbidi?
Toñojokenu cheñi hamudimu wamwinkeliwu wakuyuula anyama. Adama amulejeli kutuumba anyama majina, nawa iwu mudimu wadi kusenda mpinji. (Kutachika 2:19) Ilaña hakwila nawu yayiyuuli wateleleli kuyiluka chekalawu nikwiluka chakuyakamena. Chumichi chadi kusenda mpinji yeneni nankashi.
Dichi Nzambi chayilejeliyi aAdama naEva kwinzesha iseki nikwikala anyanta awanyama chamwekeshaña nawu wayileñeli nindi ashakameña yaaka yayivulu. Nawa Adama washakamini yaaka yayivulu nankashi.
NKEÑELU YANZAMBI YIDI YAKWILA NAWU ANTU AKASHAKAMI HAYA NYAAKA MUPARADISA HAMASEKI
ASHAKAMINI YAAKA YAYIVULU
Adama washakamini yaaka 930
Metusela washakamini yaaka 969
Nowa washakamini yaaka 950
Makonu antu anakushakama yaaka 70 hela 80
Bayibolu yamwekeshaña nawu antu kunyima ashakamineña yaaka yayivulu kubadika etu makonu. Yahoshaña nawu: “Kubomba nyaka yejima yahandiliyi Adama yashikili munyaka makulakaji atanu namakulakaji awana nanyaka makumi asatu [930].” Kuhiñahu, yahosha hadi amayala 6 ashakamini yaaka kubadika ha 900! Adiña aSeta, Enoshi, Kenani, Yaredi, Metusela, niNowa. Ejima wawu adiñaku henohu Dibaji damumafuku aNowa kanda dinzi—Nowa washakamini yaaka 600 henohu Dibaji kanda dinzi. (Kutachika 5:5-27; 7:6; 9:29) Atwesheli ñahi kushakama iyi yaaka yayivulu?
Awa amayala ejima adiñaku henohu munahiti hohu yaaka yantesha kufuma hadiñawu antu awanina. Hadaha chumichi dichaletesheli ashakami yaaka yayivulu. Hanu dinu kuwanina kunateli kuletesha ñahi muntu kushakama yaaka yayivulu? Nawa kufwa akakwishinda ñahi? Hakwila twiluki ñakwilu, chatachi twatela kwiluka chaleteshaña tushinakajeña nikufwa.