Imbujolenu Yehova ‘Nzambi Yetu Wamuzañalu’
1 Yehova wakeñaña chikupu nindi antu ekali amuzañalu. Izu dindi datwinkaña chikuhwelelu chankisu yayiwahi yinatentekeliyi muchidi wamuntu. (Isa. 65:21-25) Chatela kumwekana kudi antu nawu twawanaña muzañalu mukushimwina ‘nsañu yayiwahi yakulema kwaNzambi wamuzañalu’ kudi wena. (1 Tim. 1:11) Njila yitwahoshelañamu nsañu yaWanta yatela kumwekesha nawu chalala twachikeña nawa twayita maana chikupu antu yitwahoshaña nawu.—Rom. 1:14-16.
2 Eña, mpinji yikwawu chatela kwikala chakala kutwalekahu nayililu yamuzañalu. Mumaluña amakwawu, twawanañamu antu antesha etejaña nsañu yaWanta chachiwahi. Mpinji jikwawu twekalaña nakukala kwakweni mukuhanda kwetu. Hakwila nawu tutwalekihu naspiritu yamuzañalu, twatela kutoñojoka hakulema kwampwila yikwetiwu antu amwiluña detu yakukeña kutiya nikwilukisha nsañu yayiwahi yaWanta yitwashimwinaña. (Rom. 10:13, 14, 17) Kutoñojoka hachumichi kukatukwasha kutwalekahu namuzañalu wakutiyakesha luwi lwaYehova lwayuma yawamwinu yinaloñeshiyi.
3 Konkomwenenu haYuma Yayiwahi Yakenza: Cheñi nawa twatela kuta maana kuyuma yitwahoshaña. Hela chakwila twatela kutachika mpanji kuhitila mukutena kukala kunelukiwu antu hela nsañu yahampepela, hitwatela kushindamena hayuma yamukunkulwayiku. Mudimu wetu wudi wakuleta “nsañu yayiwahi yayuma yakuluñisha.” (Isa. 52:7; Rom. 10:15) Iyi nsañu yayiwahi himazu anashindameni hayikaninu yaNzambi yambidi yayiwahi. (2 Pet. 3:13) Hakwiluka chumichi, zatishenu jiNsona kulonda ‘mukasikasi chiwahi abaluka nyichima.’ (Isa. 61:1, 2) Chumichi chikutukwashaku wonsu wetu kutwalekahu naspiritu yamuzañalu niyililu yayiwahi.
4 Chakadi nikujinoka yililu yetu yayiwahi akayimona kudi antu hampinji yitukuzataña mumudimu wakushimwina. Komana mpinji yejima, tumwekesheña chekalayi Yehova ‘Nzambi yetu wamuzañalu,’ hampinji yitunakushimwina nsañu yayiwahi kudi antu adi mwiluña detu.