Chakutwesha muMudimu wawuPayiniya
1, 2. Chumanyi chinakukeñeka kulonda kutwesha mumudimu wawupayiniya wampinji yejima?
1 Komana wupayiniya diwu mudimu wumwazataña? Neyi mudi apayiniya, hela mukwakushimwina Wanta wampinji yejima, dikwila nawu mwakeñaña kutwesha. Ilaña kutwesha kwakeñekaña yuma yayivulu kubadika hakuzata mpinji yeneni mumudimu wunayinkiwu. Muntu watweshaña chiña yatambwilaña kufumba nawa nikutatakena hakumwekesha wuswa windi.
2 Dichi dinu munjilanyi mumunateleli kutwalekelahu neyi payiniya hampinji yoyimu nakuyilaku hambidi mumudimu wenu? Kudi malwihu amavulu alema yimwatela kutoñojokahu.
3, 4. Chumanyi chitukudizilaku kudi Mwanta Davidi?
3 Indi Wubwambu Wami naNzambi Wakola Ñahi?: Chuma chimu chasweja kulema hakutwesha hamu neyi payiniya hikwikala nawubwambu wakola chikupu naYehova Nzambi. Muniyi njila, tunateli kudizilaku kudi ñimbi wamasamu Davidi. Walembeli nindi: “Ñilukishi muwendelaña, eyi Yehova; nleji njila jeyi. Nlomboli mwaya nsañu yeyi yalala, nleji; muloña eyi yeyi Nzambi yawamwinu wami; yeyi nachiñejaña mwaana wonsu.”—Mas. 25:4, 5.
4 Davidi washindameneni chikupu hadi ‘Nzambi yawamwinu windi.’ Wakeñeli nindi Yehova yamutañishi ‘nikumwilukisha jinjila Jindi yomweni.’ Komana himunamoni chipepa chaDavidi chakumuzañalesha Nzambuku? Iyi bayi neyi yadiña mpwila yamakudiku, muloña Davidi wahosheli nindi: ‘Yeyi nachiñejaña mwaana wonsu.’
5. Chumanyi chalema chinakukeñeka hakuhemba wubwambu wetu naNzambi?
5 Hanu tunateli kuhemba ñahi wubwambu wamuchidiwu naYehova? Ilukenu nenu yuma yinatenuwu hewulu diwu mazu adi mukulomba kwaDavidi. Eña, kuhanjeka kuhitila mukulomba dichikuku chacheni chakwikala nawubwambu wawuwahi naNzambi. Nawa chikutuzañalesha hakwiluka netu hichinakukeñeka kudikana naTata yetu wamwiwuluku. Tunateli kwinza kudi yena kala mpinji. Neyi chahosheliyi Davidi nindi: ‘Kudi eyi nukukutambekaña mwaana wejima.’ (Mas. 86:3) Mwana kaNzambi niyena, wadiña hanu hamaseki hamu neyi muntu waloña, welukili nindi chakadi wukwashu waTata yindi hakutweshaku. Yesu wahoshelaña nindi mukulomba ifuku dejima—hankunku yakucha, namwaana, ninawufuku.—Maku 1:35; Luka 11:1; 6:12.
6, 7. Mazwinyi ahosheliyi payiniya wumu wakuluka yitembi, nawa munateli kwiteja mwahosheliyi?
6 Hamu neyi eniKristu, twatela kulondela chakutalilahu chaYesu neyi tunakukeña kutwesha mumudimu wetu. (Heb. 5:7) Kutalisha kukulomba, mumbanda wumu wawiniKristu wunatweshi wupayiniya hadi yaaka 30 wadihosheleli yomweni nindi: “Hakwila nawu nitweshi hamu neyi payiniya, nachiwani neyi kulomba hichuma chalema kudami. Kulomba kunankwashi kushindamena nankashi hadi Yehova, nakwanuka nami kankawami hinukutwesha kuwuzataku. Namulombaña Yehova mpinji yejima nami yankwashuku kulonda nitwalekuhu.”
7 Eña, hakwila nawu mutweshi mumudimu wawupayiniya, mwatela kwikala nawubwambu wakola naYehova, nakushindamena hadi yena chikupu mukulomba. Hela chochu, kudi lwihu lukwawu lwalema lumwatela kudihula.
8. Muloñadi wupayiniya chakuwutenenawu kwikala njila yakumwekeshelamu kukeña?
8 Komana Antu Nayikeña Nankashi?: Wupayiniya hinjila yimu yakumwekeshalamu kukeña. Muloñadi? Muloña mudimu wampinji yejima wabombelamu spiritu yakudihana. Hamu neyi payiniya, mpinji yejima mwazatishaña mpinji yenu niñovu kulonda kukwashaku amakwawu. Hakwila nawu mutwalekuhu kwila mwenimu, mwatela kumwekesha kukeña kwakweni muyuma yinakankiluwu amakwawu. Yesu wamwekesheli kukeña kwamuchidiwu kudi antu hampinji yadiñiyi hamaseki. Chakutalilahu, kwadiña mpinji yimu heliliyi yena niatumbanji twindi hiyakuya muwatu ‘nakunookahu chanti mwisaña.’ Ilaña, antu hiyakuyañahu dehi. “Chanedikiyi muwatu, hakumona izaza deneni, hakuyitiyila wushona muloña adiñi neyi anyikoku akadi kabiña; hakutachika kuyileja yuma yayivulu.”—Maku 6:30-34.
9. Muloñadi kwikala nankeñelu yayiwahi yakuzataku mudimu wawupayiniya chiyalemena?
9 Kufwana Yesu, etu hamu neyi apayiniya twatela kuyikeña antu nankashi. Kukeña kwamuchidiwu kwatuleñelaña kudihana etu aweni kukoola wena. Neyi chahosheliyi nsoneki kudi Yesu nindi: “Kumukeña [Nzambi] namuchima wejima, nakashinshi kejima nañovu jejima, nakukeña mukwenu neyi chiwadikeña eyi aweni chabadika nyilambu yakushita yamukuma, niyimuna yakuketula yejima.” (Maku 12:33) Awa mazu anakutukwashaku kwiluka nawu bayi neyi yuma yitwelaña mumudimu wakushimwina diyalema hohuku, ilaña muloña waweni wutwayililaña.
10, 11. Indi kwikala nakukeña neyi kwaKristu kwakeñeliyi antu kwakwashaña ñahi apayiniya kumika mumudimu wakushimwina?
10 Hamu neyi payiniya, mwazataña mpinji yeneni nankashi mumudimu wakushimwina nikwilisha atumbanji kubadika amakwawu. Cheñi nawa mwahanjekaña nawantu amavulu. Mwatiyaña ñahi hadawa antu? Payiniya wumu wahosheli nindi: “Neluka nami kukeña himukabu waspiritu yaNzambi. Neyi nabulili kukeña mutenowu hinadi kwikala muchalalaku, nawa hinadi kutwesha kwikala payiniyaku. Kukeña kwanleteshaña ami kuyakamena antu, kwiluka yuma yinakankiluwu, nawa nasakililaña hakumona antu atambwilaña kukeña. Eña, kwekala mpinji jikwawu kukeña kwenu kumwakeña antu kwekalaña mukweseka muloña wayililu niyitoñojoka yawu. Hampinji yamuchidiwu dihu nesekaña kutiyilila nikwikala wawunda.”
11 Komana ninenu dichimwatiyaña hadi antu amwiluña denu? Hakwila mwikali payiniya watweshaña, mwatela kukeña antu. (1 Tesa. 2:6-8) Hakwila mutweshi mumudimu wenu wawupayiniya, mwatela kwikala cheñi nandandanda yayiwahi. Dichi mwatela kudihula enu aweni nenu:
12. Chumanyi chinakukeñeka neyi payiniya nakukeña kuzata chikupu mudimu windi wakushimwina?
12 Komana Nikweti Ndandanda Yesekana?: Hakwila nawu mutwalekuhu chachiwahi namudimu wampinji yejima, payiniya watela kwikala wadiloñesha chachiwahi. Chakadi ndandanda yayiwahi yahalwenu, wupayiniya watela kwikala mudimu wakuhilisha. Hela chochu, kwikala nandandanda yakuzataña mpinji yeneni mumudimu wamwiha bayi neyi dichuma chinakukeñeka hohuku.
13. Chambwinyi chidi hakachi kandandanda nandandanda yesekana?
13 Payiniya watela kwikala nandandanda yesekana. Komana mukweti? Munateli kudihula enu aweni nenu: Komana nakuzatishaña mpinji yashikila mumbadi jashiyashana jamudimu wakushimwina? Komana nateli kuhosha nami nakuzata nañovu yejima kulonda kuhosha nawantu ejima amwiluña? Komana nahimpaña munzatilu yami kulonda nitwesheña kufuntila hamatala habulaña kuwanika antu? Komana nelaña kufuntila kwalumbuluka? Yesu wahosheli nindi: “Yenu mwakelishi atumbanji . . . Mwakayileji.” (Mat. 28:19, 20) Yuma yejima yiyedi kushimwina nikutañisha hiyuma yalema nankashi yamudimu wetu. Komana mwazañalalaña nakuhana nyikanda hohu, hela mwafuntilaña kudi ana amwekeshaña mpwila, chili etejaña nyikanda yashindamena haBayibolu hela nehi? Hela tuhoshi netu, komana mwazatishaña mpinji yenu chiwahi?
14, 15. Kwilukanyi apayiniya kuyatela kwikala naku mpinji yejima, nawa yumanyi yinayiloñesheluwu yakuyikwashaku kwila mwenimu?
14 Komana Nidi Ntañishi Wunakuyilaku Hambidi?: Ilu hilwihu lukwawu lwalema. Ha 2 Timotewu 4:2, Pawulu wasonekeli nindi: ‘Shimunaku mazu mukunyakashana muchilaaka chachiwahi, . . . nimuchilaaka chinabuli kuwaha, nakudiwunjika nawa nakwiluka kutañisha.’ Hakwila nawu tushimwini izu, chili muchipompelu hela mwiiha, apayiniya atweshaña afwilaña kwikala nikuwahisha kwiluka mwakutañishila. Muloñadi Pawulu chahosheleliyi nindi kutañisha hikwiluka? Muloña kutañisha kwakeñekaña kwiluka nikwilamu.
15 Munjilanyi mumunateli kuwahishilaku kwiluka kwenu hamu neyi ntañishi? Kapostolu Pawulu wakwili nindi: ‘Toñojokaku hayumiyi, wudinkumu chikupu, kulonda chiwukuyaña kumbidi chimwekanaña kudi antu ejima.’ (1 Tim. 4:15) Eña, apayiniya atela kwikala nampinji yakudiza Bayibolu halwawu, kushinshika nikutoñojokahu. Ichi chinabombelumu kuzatisha chalumbuluka jinjila jekala munyikanda yidi neyi Ukupelulula Ukufuma mu Malembo, Mudimu Wetu waWanta, niNonkelenimo mu Masambililo ya Isukulu lya Butumikishi Ilya Bulesa.
16. Hoshenu mumazu antesha hajinjila jakutwesha mumudimu wawupayiniya.
16 Hakwila nawu mutweshi mumudimu wawupayiniya, koleshenu wubwambu wenu naYehova Nzambi. Chikufumamu, chikuyileñelenu kwikala nikumwekesha kukeña kwakweni kudi antu. Eña, hakumwekesha iku kukeña, bayi neyi mwatela kwanukaña hohu hakutoha kwampinji yimunakuzata mumudimu wakushimwinaku, ilaña mwatela cheñi kukeña kuzatisha mpinji yenu chiwahi. Munjilanyi? Kuhitila mukushaku ñovu chikupu kulonda kuhosha nawantu amavulu nakuyileja nsañu yaWanta. Nkumininaku, twalekenuhu nakuyilaku hambidi neyi ntañishi kuhitila mukudiza jinjila jashiyashana jakuhoshelamu nawantu mumudimu nikudiza Bayibolu namukoyi nankeñelu yakuwahishaku kwiluka ntañishilu yenu.