Mukanda Kufuma Kwizaza Dalombolaña
KULONDELA chakutalilahu chaYesu, tunakulomba chikupu kudi Nzambi netu: “Ijina deyi dijili.” Nkeñelu yetu yayeni yakutwalekahu kukakela kuniku kulomba yamwekenaña kuhitila munshakaminu yetu hamu neyi aYinsahu jaYehova. Twatela kwiluka yuma yayivulu kubadika hakwiluka hohu netu ijina daNzambi diyi Yehova. Twatela kuzatisha kukooleka kutukweti kulonda kuhameka idi ijina. Eña, kalemesha kakeni kitwadiluñishaña wonsu wetu kekala kakutwitena nawu wudi Chinsahu chaYehova.—Mat. 6:9; Isa. 43:10.
Kwesekeja naMasamu 110:3, antu jaYehova anakukalakala mukudikeñela mudimu wunahaniyi Yehova nindi chiña awuzati. Muloñadi antu akweti yaaka yashiyashana niyisemwa chanakuzatilawu muniwu mudimu wakushimwina? Chuma cheneni, ashimwinaña muloña amukeña Nzambi nawa adihana chikupu kudi yena. Kuhituluka 6:5, 6 yatulejaña kumukeña Yehova ‘namuchima wetu wejima, nawumi wetu wejima, ninañovu jetu jejima.’ Kukeña kwamuchidiwu kwakufuma hamuchima kwatuleteshaña kuzatisha mpinji yetu, ñovu, nimaheta kulonda kutwala Wanta waNzambi hambidi, kushilahu nimudimu wakushimwina nañovu kushika hakumina ñovu yetu.
Kukeña kwaYehova kwakeñayi muchidi wamuntu dikwamuleteshaña kuhana wunlomboli wakushimwina nsañu yayiwahi yaWanta heseki dejima. Kwosi niwumu wunakukeñayi nindi akafwiku, ilaña nakufwila ejima kubalumuka muyililu yawu yatama nakwinza kudi Nleñi yawu kulonda atweshi kuhanda. (2 Pet. 3:9) Yehova nindi, “Hinatiyaña kuwaha nakufwa kwamuntu watamaku; chiña muntu watama abalumuka aleka mwelañayi, ahandi.” (Ezek. 33:11) Chitwazataña mudimu wakushimwina, dikwila nawu tudi chinjikijilu chakukeña kwaYehova kudi akwetu antu. Ichi dichuma chimu hayuma yatuletelaña muzañalu nikuwaha kutwatiyaña neyi tuzataku muniwu mudimu walema.
Tunateli cheñi kumwekesha netu twamukeña Yehova nankashi kuhitila hanochu chitwamonaña Izu dindi donenewa, Nyikanda Yajila. Neyi chatulejaña Yakoba 4:8, chakadi Bayibolu mutenowu hitwadi kumwiluka Nzambi hela kuswila kwakwihi nayenaku. Cheñi hitwadikwiluka muloña wutwekalilaku hela chuma chakamwekana kumbiduku. Hitwadi kwiluka netu nkakulula yetu Adama diyi waleta yihuñu yitunakumonaku. (Rom. 5:12) Cheñi hitwadi kwiluka kukeña kwaNzambi kwasweja kwakuhana Mwanindi wumu hohu neyi ifutu danyiloña kukola amavuluku. Munjila jajivulu, Yehova nakutwinka chipimu chakwiluka, maana, nikashinshi kindi. Twalemesha chikupu chawaana chinatwinkiyi, Izu dindi donenewa naspiritu. Kusakilila kwetu hachamukunkulu chachiwahi kwatwilishaña ‘kwambulaku mpinji’ yakutaña, kudiza, nikutoñojoka hamazwindi. (Efwes. 5:15, 16; Mas. 1:1-3) Bayi tutiya kutama nampinji yitunakuzatisha hakutaña Izu daNzambi mafuku ejimaku. Ilaña, kukeña kutwamukeña Nzambi kwatela kutuswija Kwiizu dindi, nakutwileñela etu kumwilukisha nikumukeña chikupu.
Tunadizi muBayibolu nawu Adama chamuvulumwiniyi Yehova, waleteleli hadi anyanindi ejima akavwalika kumbidi, kushilahu wejima wetu kwikala nachihandilu chatama nankashi, chakadi muzañalu. Hela chochu, Nzambi natweshi nawa wahana dehi njila kumuchidi wamuntu, nakwila mwenimu kulonda yamoni chikupu nindi nkeñelu yindi kutalisha kwiseki yinashikijewi.—Kutach. 3:15.
Chakadi kujina, wonsu wetu tunakufwila chikupu kujilika ijina dadiwahi daNzambi yetu. Chitunakusweja kwiluka Yehova Nzambi chawahayi chikupu, chikutuletesha kulondela munakutulejayi nikuloñesha kwindi hakutiyakesha ijina dindi deneni ninkeñelu yindi. Anatukani kutambwila wuselewa ninkisu jindi makonu nihaya nyaka mwituña dadiha.
Etu hamu neyi Izaza Dalombolaña tunakuyileja chikupu netu twayikeña enu ana kwetu niahela akeñewa. Cheñi tunakuyihameka chikupu hanyidimu yenu yasweja hakuzatisha mpinji yinashaluku kulonda kuleja antu amavulu nankashi nsañu yayiwahi henohu ‘ihuñu deneni’ kanda dinzi. (Chim. 7:14) Chimwela mwenimu, mukuyinka kukooleka kwokumu kumwatambwilili enu, kwakumwiluka Nzambi niKristu kwalombolaña kuwumi wahaya nyaka.—Yow. 17:3.
Yetu ana kwenu,
Izaza Dalombolaña dawaYinsahu jaYehova