‘Hoshenu Izu daNzambi Chakadi Woma’
1 Komana mpinji yikwawu mwajinokaña kuhosha hachikuhwelelu chenu neyi ayinka kukooleka hashikola hela hamudimu? Komana chayikalilaña kushimwina wunsahu wamumpanji kudi antaña jenu niantuñi nenu hela antu yimwabula kwiluka? Chumanyi chikutukwasha wejima wetu kuzatisha mpinji yatelela ‘yakuhosha izu daNzambi chakadi woma’?—Fwi. 1:14.
2 Bayi Mulekaku: Komana munateli kushintajala kuhakwilaku ibwambu denu yimwakeña hela ntaña yenu anatwambiliwu? Yehova, Ibwambu detu yitwakeña anamutwambili chikupu hadi yaaka yayivulu. Tukweti kukooleka kweneni chikupu kwakushimuna wunsahu wakumuhakwila Nzambi yetu! (Isa. 43:10-12) Kukeña kwakweni kutwamukeña Yehova kwatela kutukwasha kubula kutiya nsonyi hela woma nawa kwatuleñelaña kumuhakwilaku, nakutwalekahu kushimwina nsañu yalala chakadi woma.—Yil. 4:26, 29, 31.
3 Anukenu nenu mazu yitwashimwinaña hinsañu yayiwahi. Yikaleta nkisu yahaya nyaka kudi antu anakutiyilila. Neyi tukusha kashinshi hakulema kwamudimu wakushimwina kubadika hadetu aweni hela hadi akwakudimbulula, kukutukwasha kushimwina chakadi woma.
4 Yakutalilahu Yawamakwawu: Tunateli kwikala nañovu neyi tushinshika hakashinshi kawamakwawu ahosheli izu daNzambi chakadi woma. Chakutalilahu, Enoki washimwinini wunsompeshi waYehova nawulobu kutalisha hadi akwanshidi. (Yuda 14, 15) Nowa mukashinshi washimwini kudi antu adiña nakadiwu. (Mat. 24:37-39) EniKristu amuyaaka nkulakaji yatachi abulili ‘kwiluka nyikanda hela kwiñila mumashikola’ atwalekeluhu kushimwina hela chakwila amweneña ikañesha. (Yil. 4:13, 18-20) Kakavulu munyikanda yetu mwekalaña nsañu yayihandilu yamakonu yawantu amukuhweleleli Yehova nakushinda kutiya antu woma nikwikala akola mukushimwina.
5 Tunateli kumika kuhitila mukushinshika hachihandilu chawantu ashinshika akunyima amweni kukala. (1 Anya. 19:2, 3; Maku 14:66-71) ‘Akoleli kuhitila mudi Nzambi yetu’ nakushimwina chakadi woma. Dichi ninetu tunateli kukola!—1 Tesa. 2:2.