Ejima muChipompelu Atela Kuzata Mudimu waKwilisha Atumbanji Amaha
1 Kwikala nakambanji wamuha hikwashindamena hañovu yamuntu wumu hohuku. Yehova nateli kuzatisha ‘akwakukalakala’ indi ejima kulonda kukwasha atudizi aBayibolu kukulilaku lwakuspiritu. (1 Kor. 3:6-9) Ejima wetu hitwakwashaña amaha kuhitila mukwakula kwakufuma kumuchima hakupompa kwawiniKristu hohuku ilaña nikuhitila muyililu yetu yayiwahi, yamwekeshaña nawu spiritu yaNzambi yinakutulombola mukuhanda kwetu. (Yow. 13:35; Ŋal. 5:22, 23; Efwes. 4:22, 23) Yumanyi yikwawu yitwatela kwila hakukwasha amaha?
2 Hamu Neyi Chipompelu: Wejima wetu twatela kumwekesha kukeña kudi antu anatachiki kuwanewa kukupompa kuhitila mukuyimusha namuzañalu nikuhanjeka nawu henohu kupompa kanda hela hanyima yakupompa. Iyala wumu hakwanuka mpinji yayiliyi nakupompa katachi wahosheli nindi: “Mwifuku dimu hohu nadiweni nawantu akweti kukeña kwalala, akaadi kwiluka, antu yinabula kuwanahu dehi muchipompelu munakulila. Chamwekeni hatooka to-o nawu nawanini chalala.” Amupapatishili hanyima yatukweji tutanu natuyedi kufuma hayiliyi nakupompa katachi.
3 Muhamekenu chikupu kadizi waBayibolu hampinji yanakukulilaku lwakuspiritu. Komana wadiña nakumika ikañesha? Komana nakuwanika kukupompa mpinji yejima? Wakulañahu? Wasonekesha muShikola yaMudimu waTeokalatiki hela natachiki dehi kushimwina? Muhamekenu hakuyilaku hambidi. Ichi chikumuzañalesha nikumukolesha.—Yish. 25:11.
4 Hamu Neyi Mukwakulombola Kudiza kwaBayibolu: Akwakushimwina amakwawu anakwashi chikupu atudizi awu aBayibolu kudiluka nawantu amuchipompelu kuhitila mukuya nawakwakushimwina amakwawu nakulombola kudiza. Chakubula kulaba mulejenu kadizi kwinza kukupompa. Neyi natachiki kuwanika kukupompa, mulumbululenu kudi amakwawu. Komana nakulwisha kuleka chaaku chatama, chindi neyi kunwa makanya? Komana kudihu muntu wamuchisaka wunakumukañesha kudiza? Nateli kuhetelamu mukuhosha namukwakushimwina wamweni nikushinda kukala kwokumu.—1 Pet. 5:9.
5 Amaha akeñaña wukwashu wachipompelu wakuspiritu. Ejima anateli kuyikwasha kukulilaku kuhitila mukuyakamena chikupu.