Chikasha Chalwihu

◼ Komana chachiwahi izaza kusakilila hanyima yampanji yidi yejima yikuhanawu muShikola yaMudimu waTeokalatiki nihaKupompa kwaMudimu?

Chelili Nleñi, Yehova yaleñi iseki, ‘tutumbwa twabudidi twembili tumina hamu, nianyana kaNzambi ejima adikuwili nakuzañalala.’ (Yoba 38:6) Awa anyana kaNzambi añelu akeñeli kumuhameka Yehova hamudimu windi wabadika kuwaha wakuleña, iwu mudimu wadiña hinjila yayiha yamwekeshelelumu maana, kuwaha, niñovu jindi.

Hichuma chachiwahi kuhameka amana kwetu chakufuma hamuchima hakuzata nañovu nihampanji yahanawu hela chimwenu. Chakutalilahu, twasakililaña hajimpanji niyimwenu hakupompa kwadimena, chidi neyi kupompa kwamaneni. Jimpanji niyimwenu yahanañawu hakupompa kweniku yakeñekaña mpinji yeneni nikuzata nañovu hakwila ayiloñeshi. Kusakilila kwetu hikwamwekeshaña nawu tunahameki nhoshi chazatayi nañovu hohuku, ilaña twamuhamekaña cheñi Yehova hanshimbi yatwinkañayi kuhitila Mwiizu nimukuloñesha kwindi.—Isa. 48:17; Mat. 24:45-47.

Komana akaanisha kusakilila hajimpanji niyimwenu yahanañawu muShikola yaMudimu waTeokalatiki niKupompa kwaMudimu? Hikwekala nshimbi yakaanisha kusakilila neyi hikuhameka kwakufuma hamuchimaku, chidi neyi kadizi nahani mpanji yindi yatachi mushikola. Hela chochu, kusakilila kunateli kwikala neyi hichinjililu nawa kunateli kwikala kwabula kulema. Dichi, hitwavula kusakilila hampanji yejimaku.

Hela chakwila, hitwasakililaña jimpanji niyimwenu yejima muShikola yaMudimu waTeokalatiki nihaKupompa kwaMudimuku, kudi jinjila mutwatela kuhamekela wejima wetu hanshimbi niñovu yazatishawu antu ahana jimpanji. Tunateli kwila mwenimu kuhitila mukwikala asoñama nikusha kashinshi chikupu kudi nhoshi. Dichi neyi kupompa kunamani dehi, chikuwaha neyi tudimona namuntu wahana mpanji kulonda tumuhameki chazatayi nañovu.—Efwes. 1:15, 16.