Ikalenu Akutalilahu muNyidimu Yayiwahi
1. Muloñadi wutwatela kwikala asoñama sweje-e kuyililu yetu hakupompa kwankambi?
1 Neyi tunapompi amavulu hakupompa kwankambi, antu atumonaña elukaña chitwazataña nawantu amakwawu. Komana wejima wetu twatela kutiyilila chikupu kukonkomwena kwamuBayibolu kwakwila nawu: ‘Ikalaku wawundisha mumesu, wikali wakutalilahu munyidimu yayiwahi yejima.’ (Tit. 2:6, 7) Twatela kuzata nañovu chikupu hakwila nawu ‘tubuleña kutoñojoka hansañu jetu etu aweni, chiña nsañu jawakwetu nawa.’ (Fwi. 2:4) Tushinshikenu jinjila mutwatela kuzatishila iku kukonkomwena haKupompa kwetu kwaNkambi kudi hambidi kunakwila nawu “Twalombolewaña naSpiritu yaNzambi.”
2. Chumanyi chitwatela kwanuka kutalisha kunyidimu yakuwaninamu mali heluña dakupompela?
2 Nyidimu Yakuwaninamu Mali: Amakwawu hamuloña wakwiluka nawu antu amavulu enzaña kukupompa hiyekala namakina akukwata nachu nyevuluku, afwilaña kuwana mali hakukwata nyevulu hakupompa kwankambi nikupompa kukwawu kwawantu jaYehova. Hichaluwaku neyi munakukeña kukwata mwevulu haniku kupompa kwalema. Ilaña, antu amavulu akwataña nyevulu akeñaña mwakuwanina mali, dichi azataña mudimu wakuwaninamu mali. Hakwila nawu chumichi chibuli kutamisha lubanji lwawakwaKristu lwakudikunda kuspiritu, bayi tutwala mudimu wawu hambiduku. Ichi chinakundami kumudimu wudi wejima wakuwaninamu mali. Nkeñelu yakupompa kwetu yakela hohu yakudifukula kudi Yehova, kudyila kumesa yindi yakuspiritu nikutiya kuwaha ‘kudikolesha.’—Rom. 1:11, 12.
3, 4. Tunateli ‘kwilila ñahi antu ejima chachiwahi’ heluña dakupompela?
3 Twatela kumwekesha nawu twasha maana kudi amakwawu kuhitila mukuhemba iluña dakupompela nawunyonji. Mwaka waadi, chawahili hakumona yisaka kudihemba chiwahi nikwikala nawunyonji. Akulumpi amavulu nianyana azatili mudimu weneni hakukuñula nswadi, yipapilu, yilanjeli, yakudya yinashaluhu nakunatila mwibuku. Eña, antu amukaayi hiyanateli kusha maana kuwunyojuku, ilaña kuhemba maluña etu akudifukwila nawunyonji, kwalemeshaña kupompa kwetu nawa hichinjikilu chakwila nawu twakundama kwakwihi naNzambi wajila, Yehova.—Lev. 19:2; 2 Kor. 7:1.
4 Komana mwamonaña nyisalanyi yawantu amavulu chiyekalila namajilu nawa chiyabulilaña kuzatika hamuloña wakuyizatisha chatama? Kuwahisha musalanyi hanyima yakuwuzatisha hichinjikijilu chamwekeshaña nawu ‘twelilaña antu ejima chachiwahi.’ (Ŋal. 6:10) Nshimbi yaNzambi yaheniyi kudi Isarela kutalisha hakushikila majilu afumaña mudi muntu yadiña yatiyakana nawa yaswayi kulondela. Nshimbi yahosheleña nawu kala muntu wadiña namudimu wakushikila majilu indi. (Kuhit. 23:12, 13) Ilu lushimbi lwakushankulu luchidi kuzatika nimakonu nawa amavulu hiyakatañaku muloña wakulondela iyi nshimbi. Kutiyilila nshimbi jaYehova mpinji yejima kwaletaña nkisu nawa kwatwambulaña nakanu kaayi.—Kuhit. 28:9, 10.
5, 6. Indi anyana anateli kumulemesha ñahi Yehova, nawa anvwali akweti mudimwinyi?
5 Anvwali niAnyana: Mukanu kaayi mudi anyana abulaña kutiyilila, anyanetu ekala ambukaku nawa ichi chamulemeshaña Yehova nikuloñesha kwindi. Hela chochu, mpinji yikwawu kukala kwamwekanaña neyi chakwila anyana anayihembi chiwahi wanyi. (Yish. 29:15) Anvwali hiyatela kuleka anyanawu chakubula kuyitala heluña dakupompelaku.
6 Anvwali amakwawu amona neyi chakwashanaña kuyileja anyanawu yililu yatela kwikalawu nayu henohu kupompa kanda kushiki. (Efwes. 6:4) Akwashaña nyana kwiluka nawu kukeña kwalala kwawakwaKristu “hikwelaña chuma chabula kutelaku” hela “hikwakokwelaña kwindi hohuku.” (1 Kor. 13:5) Kupompa kwankambi himpinji yadimena yatudizishañayi Yehova, nawa anyana niakulumpi atela kalemesha iyi ntanjikilu kuhitila muyililu yawu heluña dakupompela nikudi kwejima.—Isa. 54:13.
7. Indi yililu yetu yayiwahi yinateli kukwasha ñahi amakwawu?
7 Yililu yetu yayiwahi yinateli kutuhakwilaku kudi antu atuhoshaña chatama nawa yakokolaña antu kukudifukula kwalala. (Mat. 5:16; 1 Pet. 2:12) Komana antu ejima akenza kukupompa kwetu kwankambi akatambwili wunsahu wawuwahi kuhitila muyuma yitwakayilila. Kwila mwenimu tukwikala ‘chakutalilahu chanyidimu yayiwahi’ nawa twakalombolewa naspiritu yaNzambi.—Tit. 2:7.
[Chikasha chidi hefu 5]
Toñojokelenuñaku Akwenu
◼ Tondolwelenu nyidimu yakuwaninamu mali
◼ Hembenu iluña ninyisalanyi nawunyonji
◼ Hembenu anyanenu chiwahi