Mpinji Yakudya Kudya kwakuSpiritu niKuzañalala

1. Indi Yehova wakamenaña ñahi ambuñindi hayuma yakuspiritu yakeñañawu?

¹ Yehova wayakamenaña ambuñindi hayuma yakuspiritu yakeñañawu. Hela chakwila antu amavulu mukaayi adi nanzala yakuspiritu, ilaña etu tunakudya chachiwahi. (Isa. 65:13) Njila yimu yatwakamenañayi Yehova kuspiritu hikupompa kwetu kwankambi kwahachaaka hachaaka. Komana munakudiloñesha kulonda mwakawaniki kujiprogiramu jejima jakupompa kwaNkambi kunakwila nawu “Twalombolewaña naSpiritu yaNzambi”? Anatuloñesheli chawija chakuspiritu chayakudya yanuna nawa yatowala.

2. Chumanyi chitwatela kwila hakuloñesha kulonda tukawaniki kukupompa?

² Fuukulenuhu Chadimu: “Yitoñojoka yamukwakudikita yatwala kwamukuvulisha hohu.” (Yish. 21:5) Dichi, hampinji yimunafuukuluhu kulonda mwakawanikuku mafuku ejima asatu akupompa, mulejenu muntu wayiñija mudimu kulonda ayinki mafuku akunooka. Neyi munakukeña kwakukama, mwaloñesha dehi hakushikena? Munateli cheñi kuloñesha yakudya yahachayili kulonda mwakadyili hamu nawana kwenu heluña dakupompela. Diloñeshenu kulonda mwakashikeña nampinji heluña dakupompela mafuku ejima mwakawaneña hakushakama kulonda mwakembeña kamina kakutachikilahu nikulomba.

3. Yakuvwala yamuchidinyi yitunakufuukula kuvwala?

³ Twatela kwiluka chikupu netu tukavwalaña chalumbuluka nawa chatelela. (1 Tim. 2:9, 10) Kupompa kwankambi kwatwinkaña kukooleka kwakuwahi kwakushimwina kudi antu. Kuhitila mukuvwala chalumbuluka hampinji yitudi mwiluña mudi kupompa kwankambi nikuvwala mabaji etu akupompa kwankambi, kwatwambulaña nawantu abula kwitiya nawa antu atumonaña atiyaña kuwaha.

4. Chumanyi chikutukwasha niyisaka yetu kuhetelamu chikupu mujiprogiramu?

⁴ Tiyililenu naKanañachima: Chalala hitunakukeña kushalahu nsañu yantesha yidi yejima yinatuloñesheluwu hanichi chawija chakuspirituku. (Yish. 22:17, 18) Kulondela muBayibolu yetu hampinji yinakutañawu nyikanda nikusoneka nsañu yayihi kukutukwasha kusha kashinshi kuprogiramu nawa tukutiyilila chakubula kuluwankana. Kufumahu, namelela tunateli kuhanjeka hayikuma yamuprogiramu yitwatiya kuwaha nawakwetu. Muyaaka yamakonu chinelukewi nawu atwansi ashakamaña hamu kukupompa nakuhanjeka hampinji yinakuhoshawu mpanji hela kusoneka nsañu nakuditemeshela hajinshiña jawu hela kwila yuma yikwawu. Neyi tukweti anyana, kubombelahu atumpululu hela atunkaña chikuwaha kushakama nawu nikutiyilila jiprogiramu neyi chisaka kubadika kuyileka anyanetu kushakama kwacheñi nawakwawu atwansi.

5. Tunateli kwikala ñahi namuzañalu chikupu hakupompa?

⁵ Diluñishenu Kuhanjeka: Yakudya yayiwahi yaswejaña kuwaha neyi muyidyila hamu nawamabwambu. (Yish. 15:17) Chochimu, kuhanjeka nawamana kwetu niahela kwatuleteshaña kutiya muzañalu chikupu hakupompa. Dichi, hampinji yakwila jiprogiramu kanda jitachiki himpinji yayiwahi yakutachikilahu kudilumbulula kudi amakwawu nikudiluñisha kuhanjeka. (Mas. 133:1) Neyi cheyamani natuleji kushakama henohu tumina kanda tutachiki, twatela kuleka mpanji yetu nikushakama kulonda progiramu yitachiki.

6. Shimunenu chakuhumañana chimwamweni chinakumwekesha chitwatela kushimwina antu amwiluña mudi kupompa kwankambi.

⁶ Zatishenu Kukooleka Kwejima Kulonda Kushimwina: Kupompa kwankambi kakavulu kwatwinkaña kukooleka kwakushimwina. Antu amavulu enzaña kukupompa ayihulaña hamutu wansañu wekalaña habaji. Ichi chaleteshaña kuhanjeka nikushimwina nsañu yalala. Amakwawu ehwili ayitambikili kukupompa nawa awanikiluku.

7. Muloñadi wutwatela kuwanika kukupompa kwankambi kudi hambidi?

⁷ Anazatishi mpinji yeneni nankashi hakuloñesha progiramu, kuloñesha matala akupompela, kuloñesha madipatimenti ahakupompa, nikuloñesha jimpanji. Mudimu weneni wunazatewi hakuloñesha chawija chakuspiritu wunakumwekesha nawu Yehova wakamenaña antu jindi. Komana wejima wetu tukawanikuku nakudiza yuma yayivulu nankashi. Chitukwilaña mwenimu, kwambukaku nawantu amukaayi, ‘twakemba tumina twachiseki mumuchima.’—Isa. 65:14.

[Chikasha chidi hefu 4]

Yuma Yitwatela Kwanuka haKupompa kwaNkambi

◼ Mpinji Yikatachika Progiramu: Progiramu yikatachikaña nampinji ya 8:20 hamafuku ejima asatu. (Yinsu Yetala daKupompelamu akayenzununaña nampinji ya 7:00.) Neyi tumina twakutachikilahu tunatachiki dehi kuvuma, wonsu wetu twakashakama muyitwamu yetu kulonda kupompa kukatachiki munjila yakalemesha. Progiramu yikamana nampinji ya 15:55 Hefuku Datachi niDamuchiyedi, Hefuku Damuchisatu yikamana nampinji ya 15:00.

◼ Kukwatila Yitwamu: Antu yimunenzi nawu mumotoka yimu hela yimunakushakama nawu itala dimu diwu yimwatela kuhembela hohu yitwamu hela hakushakama.

◼ Kudya Kwahachayili: Mwani mwakasendi yakudya yenu yahachayili kulonda mukabuleña kufuma heluña dakupompela nakuya nakukeña yakudya hampinji yakunooka. Mwatela kusenda kachimpaya kanyanya kimwatela kusha mwishina dachitwamu. Bayi musenda chuma cheneni nankashi chekalashi mwakusha yakudya niwalwa heluña dakupompelaku.

◼ Yawaana: Tunateli kumwekesha kusakilila hakutuloñeshela kupompa kuhitila mukuhana yawaana mukudikeñela kumudimu wamukaayi kejima Hetala detu daWanta hela hakupompa kwankambi. Macheki ejima akahanawu hakupompa kwankambi atela kuyihana ku “Watch Tower Society.”

◼ Maposu niYuma Yakukasumwisha: Neyi kunamwekani kukala kwakukasumwisha heluña dakupompela, mwani hoshenu nakalama wudi kwakwihi, kulonda yayi swayi-swayi nakuleja akamutayi waFirst Aid aheluña dakupompa kulonda muntu wakuluka yitembi yatweshi kumona kutoha kwakukala nikuhana wukwashu.

◼ Malasha: Chikuwaha neyi tukuzatisha nakwesekeja malasha asweja ivumba, muloña anateli kuleta kukala kudi amakwawu ekala nakukala kwañonenu hela kukala kukwawu.—1 Kor. 10:24.

◼ Mafomu Akumukeñelahu Muntu: Mwatela kuzatisha formu yaMwani Mukeñenu Iwu Muntu (S-43) kulonda muhani nsañu yanowu muntu wunamwekeshi mpwila hamuloña wawunsahu wamumpanji wutwaheneni hampinji yakupompa kwankambi. Akwakushimwina atela kusenda fomu yimu hela jiyedi jakumukeñelahu muntu kukupompa kwankambi. Mafomu anenzeshuwu mwatela kuyihana kuKapeka kaNyikanda kulonda ayitemeshi hela kudi nsoneki wachipompelu chenu neyi munafunti.—Talenu Mudimu Wetu waWanta wachiBemba waFebruary 2005, ifu 7.

◼ Nswadi: Tunakukeña kuhemba iluña detu dakupompela dadiwahi nawa dawunyonji. Neyi tunakutoñojokelaku amakwawu twatela kunatila yakudya yejima yinashaluhu, yipapilu niyuma yikwawu mwibuku dinaloñeshuwu, ichi chamwekeshaña chiwahi nhoshelu yetu yakwila nawu twamwakama Nzambi. Hakupompa kwankambi kudi hambidi, wejima wetu tukafwili kuhemba iluña dakupompela dawunyonji nikudihemba etu aweni kulonda ‘tuwahishi kuleja kwaNzambi, Chamwinu chetu, muyuma yejima.’—Tit. 2:10.

◼ Nyisalanyi: Mpinji yejima Anyana anyanya atela kuyitwala kudi anvwali jawu hela akulumpi anakuyihemba hakuzatisha kapeka kakuwelela kumakasa ninyisalanyi. Mpinji yikwawu hakupompa, chimwahita ora yimu hela maora amavulu anyana atachikaña wupila. Hakwila awani mwakuyila nakuhema, kakavulu anyana ekalaña nachaaku chakutemukila kunyisalanyi hampinji yakupompa, nakuluwañesha amakwawu chikupu. Neyi chakwila anvwali akanjikija anyanawu kuya kumusalanyi henohu kanda atachiki kupompa, kakavulu hiyaluwañeshaña kupompa chimwahita mpinji yanteshaku. Kutwala anyana kumusalanyi nikutupeka twakuwelela kumakasa nikwena kwaleñelaña kukiña anyanetu nikubula kudikatisha.