Dizishenu Amakwawu Kumukeña Yehova
1. Yumanyi yaleteshaña amakwawu kukundama kudi Yehova?
1 Komana mwanukaña mpinji yatachi yimwadizili hadi Yehova? Chumanyi chayiletesheli mukundami kudi yena? Antu amavulu akashinshi akuyileja nawu akundamini kwakwihi naNleñi yetu hampinji yadiziluwu yililu yindi yasweja kuwaha, sweje-e wushona windi nikukeña.—1 Yow. 4:8.
2, 3. Tunateli kuzatisha ñahi mukanda waChatañishaña Bayibolu hakukwasha atudizi kusweja kumukeña Yehova?
2 “Yeniwu Diyi Nzambi Yetu”: Mukanda waChatañishaña Bayibolu wakonkomwenaña hakukeña kwaYehova nikwikala nawulunda nayena. Tunateli kuzatisha ñahi iwu mukanda kulonda kudizisha amakwawu kusweja kumukeña Nzambi? Neyi tunakuhanjeka hachikuma chachiha, tunateli kwihula malwihu akuletesha muntu kutoñojokahu, adi neyi: “Indi iyi nsañu yinakushimunadi hadi Yehova?” hela “Indi ichi chikuma chinakuhana wunsahwinyi nawu Yehova diyi Tata yetu wabadika watela kukeñayi muntu wejima?” Kudizisha muniyi njila kunateli kukwasha kadizi kwikala nawulunda wawuwahi naYehova muchihandilu chindi chejima.
3 Neyi tukwasha atudizi aBayibolu kwiluka kulema kwakudiza nsañu yalala yaNzambi wumu hohu nawa wamumi, akwiluka mazu aIsaya akwila nawu, “yeniwu diyi Nzambi yetu.” (Isa. 25:9) Neyi hitukulumbulula Izu daNzambi, twatela kukonkomwena hankisu yakekala namuchidi wamuntu hakashikijayi Yehova nkeñelu yindi muchiyulu chawanta waKristu Yesu.—Isa. 9:6, 7.
4, 5. Indi kumukeña Nzambi kwalumbulukadi?
4 Wunsahu waMwekeshaña Nawu twaMukeña Yehova: Tweluka netu kumukeña Yehova namuchima wetu wejima, wumi, nimaana kwabombelamu yuma yayivulu kubadika kutoñojokaña hohu nawu twamukeña Nzambi. Twatela kwiluka nikukakela kuyitoñojoka yindi. (Mas. 97:10) Kumukeña Nzambi kwamwekenaña mukwovwahila nshimbi jindi jejima nikutwalekahu kuzata, ‘nyidimu yajila nakushakama nakwakama Nzambi,’ hela tunakumona kweseka niikañesha.—2 Pet. 3:11; 2 Yow. 6.
5 Kwila nkeñelu yaNzambi muloña twamukeña hichuma chachiwahi. (Mas. 40:8) Kadizi waBayibolu watela kwiluka nindi nshimbi jaNzambi jejima jekalaku kulonda Ambuñindi ahandeña chachiwahi. (Kuhit. 10:12, 13) Neyi muntu yalondela wunlomboli waYehova, wamwekeshaña kuhameka kwakweni hanyidimu Yindi yejima yayiwahi. Kwashenu kadizi waBayibolu kwiluka nindi kwenda munjila jaYehova jaloña kwakiñaña muntu kubula kwikala mukukala kwenzaña hakubula kulondela nshimbi jaYehova.
6. Nkiswinyi yatela kutambwilayi muntu hamuloña wakumukeña Yehova?
6 Nkisu Yatambwilaña Antu Amukeña Nzambi: Yehova wakamenaña chikupu antu adizoza nawa amukeña, wayimwekeshelaña “yuma yaNzambi yayeni yakunama.” (1 Kor. 2:9, 10) Hakwiluka nkeñelu yaYehova yamuchidiwu, akweti mmwenu yayiwahi nikuchiñeja kwakweni kwakumbidi. (Yere. 29:11) Antu amukeña Yehova diwu atiyilañayi luwi lwindi lwasweja. (Kwid. 20:6) Alemesha kuchiñeja kwawumi wahaya nyaka muloña Nzambi wasweja kuyikeña.—Yow. 3:16.
7. Mwatiyaña ñahi kudizisha amakwawu kumukeña Yehova?
7 Chitwamwiluka Tata yetu wamwiwulu chikupu, dihu hitukusweja kulejaku amakwawu hadi yena. (Mat. 13:52) Hikukooleka kwabadika chikupu kwakudizisha amakwawu kumukeña Yehova sweje-e anyanetu. (Kuhit. 6:5-7) Dichi wejima wetu hamu niatudizi etu aBayibolu, tutwalekuhu kumulemesha hampinji yitunakumona ‘kuwaha kwaYehova kwasweja.’—Mas. 145:7.