Tañishenuña Nakushinjila
1. Chumanyi chakeñekaña hakwila nawu tuzatishi chiwahi Izu daNzambi mumudimu wakushimwina?
1 Akwakushimwina akuluka yitembi neyi kapostolu Pawulu, eluka nawu ‘kulumbulula mazu ansañu yalala mwayawu mwayawu’ kwakeñekaña yuma yayivulu, bayi neyi kusombolola chahosha Nyikanda Yanjila hohuku. (2 Tim. 2:15) Hampinji yitunakuzatisha Izu daNzambi, tunateli kutañisha ñahi “nakushinjila”?—Yil. 18:13.
2. Tunateli kukwasha ñahi muntu kulemesha Izu daNzambi?
2 Mulejenu Muntu Chahosha Izu daNzambi: Sambilenu kumuleja muntu Bayibolu munjila yikumuletesha yayilemeshi nindi yikweti maana aNzambi. Neyi tukuhwelela Mwizu daNzambi tukusañumuna muntu wunakututiyilila kushaku maana hampinji yitunakutaña nsona. (Heb. 4:12) Tunateli kuhosha netu: “Chankwashaña neyi niluka chahoshayi Nzambi haniyi nsañu. Talenu chahosha Izu dindi.” Neyi chinatwesheki mulejenu muntu chahosha Izu daNzambi kuhitila mukutaña Bayibolu.
3. Hanyima yakutaña nsona munateli kwiladi hakwila nawu mukwashi muntu kwiluka munatalishi nsona?
3 Kamuchiyedi, lumbululenu nsona yinazatishuwu. Antu amavulu chayikalilaña kutiyisha nsona neyi ayitaña katachi. Kakavulu twalumbululaña nsona kwesekeja nansañu yitunakuhanjekahu. (Luka 24:26, 27) Tenenu mazu adi munsona anakundami kunsañu yimunakuhanjekahu. Neyi mumwihula muntu lwihu, munateli kwiluka neyi chakwila natiyi chikuma chansona.—Yish. 20:5; Yil. 8:30.
4. Njilanyi yakukumishaku yatela kutukwasha kutañisha nakushinjila?
4 Lumbululenu Yikuma yamuNsona: Chamuchisatu, ilukenu chinakutoñojoka muntu nawa fwilenu kumushika hamuchima. Mukwashenu mwiniitala kulonda yeluki chatela kuzatishayi nsona yenoyu halwindi. Kuhanjeka hansona kunateli kumushinjila muntu kulonda yohimpi yitoñojoka yindi. (Yili. 17:2-4; 19:8) Chakutalilahu, hanyima yakutaña Masamu 83:18 tunateli kuhanjeka namwiniitala netu kwiluka ijina damuntu kwalema hakwila nawu mukwati wubwambu nindi. Hadaha munateli kumwihula nenu, “Komana munakutoñojoka nenu kwiluka ijina daNzambi kukuletesha kulomba kwenu kwikala kwatiyakana?” Kumuleja mwiniitala nsona chiyinakundami muchihandilu chindi muniyi njila kwamwekeshaña kulema kwayu. Neyi tutañishaña nakushinjila hampinji yitunakuzatisha Izu daNzambi tukukokola antu ashinshika kudifukula kudi Yehova Nzambi walala nawa wamumi.—Yere. 10:10.