Komana Mwahakwilañaku Izu daNzambi?
1 Mukanu kaayi mwavula kukaanawu Bayibolu, eniKristu alala ahakwilañaku chikupu Izu daNzambi. Hamuloña wakwiluka netu “Nyikanda yajila yejima ayonena dehi kudi Nzambi,” twetejaña mazu aYesu Kristu ahosheli yi hatooka mukulomba kudi Yehova nindi: “Mazu eyi hinsañu yalala.” (2 Tim. 3:16; Yow. 17:17) Tunateli kuhakwilaku ñahi chachiwahi Izu daNzambi?
2 Dizenu Nyikanda: Chakubula kujinoka Yesu wadizileña Izu daNzambi. Ichi chamukwashileñaku kutañisha kufuma muNyikanda mumudimu windi wakushimwina wejima. (Luka 4:16-21; 24:44-46) Tunateli kwanuka ñahi nyikanda yayivulu yitwatela kuzatisha? Kuhitila mukutaña Bayibolu ifuku niifuku nikutoñojoka havasi yatwikolesha nankashi hela yatela kutwikwasha mumudimu wakushimwina. Neyi hitukuloñesha kupompa, twatela kutaña nsona yinateniwu chakutena muBayibolu yetu hekwawu nikuloñeshahu mazu yimukuhoshahu. Hakupompa, twatela kulondela mumaBayibolu etu neyi nhoshi hakutaña nsona. Kudiza nsona yamuBayibolu kukutwikwashaku ‘kulumbulula mazu ansañu yalala mwayawu.’—2 Tim. 2:15.
3 Ilenu Bayibolu Yaakuli: Hampinji yitudi mumudimu wakushimwina, twatela kuleka Bayibolu yaakuli. Chakutalilahu, neyi chinatwesheki, twatela kweseka kutaña nikuhanjeka hansona namwiniitala. Neyi yehula lwihu hela yataadika, chikuwaha kuzatisha Bayibolu hakwakula. Neyi mwiniitala hakweti mpinjiku, chochimu twatela kuhosha chikuma chamuBayibolu kuhitila mukuhosha netu: “Henohu kanda niyi, añiteji mwani nitañi iyi nsona yimu hohu.” Neyi chikutwesheka, tañenu muBayibolu, nakumwiteja mwiniitala kutala nsona yimunakutaña.
4 Mwiniitala wumu chamutañililuwu nsona nakumuleja nawu hikwekala Anzambi Asatuku, wahayamini nindi: “Mukuhanda kwami kwejima nayaña kuchipompelu, ilaña hinelukili chahosha Bayibolu haniyi nsañuku!” Washikeneni dakwiteja kudiza Bayibolu. Yesu wahosheli nindi anyikoku indi akatiya izu dindi. (Yow. 10:16, 27) Njila yayiwahi yawantu ashinshika yakwilukilamu chalala yidi yakudimwena aweni muNyikanda. Komana twatela kwikala akakuhakwilaku Izu daNzambi dalala!