‘Maana Ayimwekeshaña Kwikala Aloña naNyidimu Yawu’
1. Indi antu amakwawu amonaña ñahi mudimu wetu?
1 Mpinji yikwawu tunateli kuwana enimatala anateli kukaana nsañu yitwashimwinaña muloña eluka wanyi chitwashimwinaña hela ayileja nsañu yatama hadi aYinsahu jaYehova. Hadaha ayiluwañesha kudi akwayikunzulemba nayileji yakutwamba. Mumaluña amakwawu atutenaña nawu “izaza datama.” Chumanyi chitwatela kwila neyi tumona kukala kwamuchidiwu?
2. Chumanyi chinateli kutukwasha kubula kutuluwañesha neyi tumona ikañesha?
2 Ikalenu naYitoñojoka Yayiwahi: Antu muyaaka nkulakaji yakusambila hiyamwilukili Yesu niambuña Yehova chachiwahuku nawa adiña nakuyitukola. (Yil. 28:22) Hela chochu, hiyatiyili nsonyi nakuleka kushimwina muloña wakuyitukolaku. Yesu wahosheli nindi: ‘Maana ayimwekeshaña kwikala aloña nanyidimu yawu.’ (Mat. 11:18, 19) Watwalekeluhu kudikita hakwila nkeñelu yaTata yindi, nakukuhwelela nindi antu akeñaña chalala anateli kumona kulema kwansañu yayiwahi. Neyi twanuka netu niMwana kaNzambi niyena wamweni kukala kwokumu, hitukwiteja muntu kutuluwañeshaku.
3. Muloñadi wutwatela kubulila kuhayama kutalisha hayileji yatama niikañesha?
3 Yesu washimwini nindi mpata yamunu mwishina yikahela atumbanji twindi neyi chamuheleluwu yena. (Yow. 15:18-20) Dichi bayi tuhayamaku neyi tumona ikañesha hela tutiya yileji yatama makonu. Kafwampi, twatela kukuhwelela yuma yamuchidiwu kuswejelaku chineli tunakuswila chikupu kumafuku akukuminina nawa ndombu yaSatana yinakuswejelaku. (Chim. 12:12) Twatela kuzañalala muloña hiwunsahu wunakumwekesha nawu kaayi kaSatana keña akijilumuni.
4. Tunateli kwila ñahi neyi atuhosha chatama kutalisha hansañu yayiwahi?
4 Akulenuña Antu naKalemesha: Neyi atuhosha chatama, twatela kwakula nakalemesha nawa mumesu awunda. (Yish. 15:1; Kol. 4:5, 6) Neyi chinatwesheki twatela kulumbulwila enimatala akweti nyichima yayiwahi netu antu ahoshaña nsañu yayivulu yakutwamba hadi aYinsahu jaYehova, hela kuyihula kulonda ashimuni chinakutoñojokelawu munoyu njila. Chitwamwakula mumesu awunda nateli kwihula hansañu yatiyayi hadi aYinsahu jaYehova nawa nateli kutiyilila aYinsahu akamwendela mpinji yikwawu. Hela chochu, neyi mwiniitala nazuwi chikupu, chikuwaha neyi tukumushiya hohu. Twatela kukuhwelela netu hela chakwila antu amakwawu atudiwula, Yehova walemesha mudimu wetu wakushimwina.—Isa. 52:7.