“Shakamenu Chachiwahi naWantu Ejima”
1. Kufumbanyi kwamuBayibolu kutwatela kuzatisha neyi tuwana enimatala anahili?
1 Antu jaYehova akeña kuwunda nawa mudimu wetu wakushimwina himudimu waletaña kuwunda. (Isa. 52:7) Hela chochu, mpinji jikwawu twawanaña antu ahilaña muloña wakwila tunayendeli hetala dawu. Chumanyi chikutukwasha kwikala awunda neyi tuwana antu amuchidiwu?—Rom. 12:18.
2. Muloñadi chichalemena kwikala nakashinshi?
2 Ikalenu Nakashinshi: Hela chakwila, amakwawu azuwaña muloña akaanaña nsañu yalala, amakwawu azuwaña hayuma yabula kukundama kunsañu yitwashimwinaña. Hadaha twayendela hampinji yabula kutelela. Mwiniitala nateli kuhila hamuloña wakukala kukwetiyi. Hela chakwila nsañu yayiwahi diyinamuhilishi, twatela kwiluka netu nakaani muloña wakwila amudimba dehi. (2 Kor. 4:4) Neyi twikala nakashinshi chikutukwasha kutulisha muchima mwivumu nawa tukwiluka netu natuhilili etu wanyi.—Yish. 19:11.
3. Tunateli kumulemesha ñahi mwiniitala?
3 Mwekeshenu Kalemesha: Antu amavulu mwiluña dakushimwina akolela chikupu kuyuma yakuhwelelawu. (2 Kor. 10:4) Akweti wuswa wakufuukulahu chili kutiyilila hela kukaana. Bayi tudiwula yuma yakuhwelelayi mwiniitala hela kumuleñela yatoñojoki neyi kwosi yuma yelukayi muloña tweluka nsañu yayivulu yamuBayiboluku. Neyi atuhaña twatela kuya chakubula kumba mpinji.
4. Indi kuhosha mumesu awunda kwatalisha mudihi?
4 Hoshenu Mumesu Awunda: Hela chakwila anatuhosholi, twatela kwakula mumesu awunda nawa munjila yayiwahi. (Kol. 4:6; 1 Pet. 2:23) Chatela tutachiki kutaadeka, twatela kukeña nsañu yikwitejayi niyena. Hadaha tunateli kumwihula mwiniitala mumesu awunda yuma yinamuleñeli kukaana. Hela chochu, hakwila tubuli kumuhilisha cheñi, hadaha chikuwaha neyi tuketula mpanji.—Yish. 9:7; 17:14.
5. Nkiswinyi yafumaña mumudimu wetu wakushimwina neyi twikala awunda?
5 Neyi twikala awunda, mwiniitala nateli kwanuka yililu yetu nawa wakatiyilila ifuku dikwawu dakamushimwinawu. (Rom. 12:20, 21) Hela chakwila nakudimbulula chikupu, ifuku dimu nateli kwikala mana kwetu. (Ŋal. 1:13, 14) Hela chakwila wukusha muchima kunsañu yalala chili nehi, tukumulemesha Yehova nikuwahisha ntañishilu yetu neyi tutwalekahu kudihemba nikwikala awunda.—2 Kor. 6:3.