Mukwashenu Mwini Itala Yatoñojoki Chikupu
1. Njilanyi yayiwahi yitwatela kuzatisha mumudimu wakushimwina?
1 Njila yimu yidihi yazatikaña chiwahi mumudimu wakushimwina, yakukakeja muntu tahindi yakumukwasha mwini itala yatachiki kutoñojoka chikupu kulonda yatiyi? Hakuhosha nawaYudeya muTesalonika, kapostolu Pawulu wayikwashili kulonda atachiki kutoñojoka chikupu, chafuminumu ‘amakwawu hiyakwikala akakwitiya.’ (Yil. 17:2-4) Hanu dinu tunateli kukwasha ñahi antu kulonda atachiki kutoñojoka chikupu?
2. Tunateli kwimbujola ñahi chakutalilahu chaPawulu hampinji yitunakushimwina nsañu yayiwahi?
2 Ilukenu Chinakutoñojokawu antu niYuma Yelukawu: Neyi twiluka chatoñojokañawu antu mwiluña mutwashimwinaña niyuma yelukawu, chikutukwashaku kuhanjeka namuntu nimuntu itukuwana hetala. Pawulu watachikili mpanji nawaGriki abula kwitiya kuMarasa kuhitila mukushimuna yuma yatela yelukiluwu nawa yakuhweleleluwu. (Yil. 17:22-31) Dichi, neyi himukuloñesha nsañu yimukuya nakuhosha, toñojokenu hayuma yakuhwelelawu nichambu chekala nawantu amwiluña denu. (1 Kor. 9:19-22) Neyi mwiniitala yehula lwihu, esekenu kumuleja nsañu yimukuditeja wejima wenu, kuhiñahu hanjekenu hanoyu nsañu.
3. Tunateli kukwasha ñahi antu kutoñojoka chikupu kuhitila mukuzatisha malwihu chiwahi?
3 Ihulenu Malwihu Munjila Yayiwahi: Hitukutwesha kuleja muntu wudi halwendu njila yikumushikija kunakuyayi chakadi kwiluka iluña kudiyuku. Chochimu, hitukutwesha kukwasha mwiniitala yeluki chikuma chacheni chakadi etu kwiluka yuma yinakutoñojokayiku. Henohu kanda yatachiki kuhanjeka namuntu, kakavulu Yesu wehwileña malwihu kulonda yeluki chinakutoñojokayi. Chakutalilahu, muntu wumu chamwihwiliyi Yesu nindi, “Nukwila ñahi kulonda niswani wumi wahaya nyaka?,” Yesu wasambilili kwiluka yitoñojoka yaniwu muntu henohu kanda yakuli. (Luka 10:25-28) Mpinji yimu, Petulu chashimwiniyi ñakwilu yaheña, Yesu wenhwili malwihu munjila yayiwahi kulonda yololi yitoñojoka yaPetulu. (Mat. 17:24-26) Dichi, neyi mwiniitala yehula lwihu hela yahosha nsañu yabula kutelela, tunateli kumwihula malwihu kulonda tumukwashuku kutoñojoka chikupu hanoyu nsañu.
4. Muloñadi chitwatela kweseka kumukwasha mwiniitala yatoñojoki chikupu?
4 Neyi tumukwasha mwiniitala kutoñojoka chikupu, dikwila nawu tunakumwimbujola Ntañishi Muneni, Yesu, niakwakushimwina amakwawu akuluka yitembi adiñuku munkulakaji yakusambila. Tukumwekesha kalemesha kudi mwiniitala. (1 Pet. 3:15) Chikufumamu, wukwikala namuchima wakukeña nindi tukafunti cheñi.