Kuwahisha Njila Jetu Jakushimwinamu—Kuhana mukanda waChatañishaña Bayibolu

Chichalemena: Mukanda waChatañishaña Bayibolu dimukanda wutwazatishaña nankashi hakudizisha. Hela chochu, twatela kumwinka mwiniitala iwu mukanda henohu kanda tutachiki kudiza nindi. Dichi, wejima wetu twatela kwiluka chakuhana mukanda waChatañishaña Bayibolu mwiha. (Yish. 22:29) Kudi njila jajivulu jakuwuhaninamu nawa akwakushimwina atela kutondahu jinjila yinayipeleli.

Yuma Yimwatela Kwila:

Ihulenu lwihu lukumusañumuna mwiniitala nawa lukuyileñela mumuleji kapetulu muniwu mukanda. Munateli kuzatisha lwihu ludi hamalwihu adi kumatachikilu atupetulu. Hanyima yakutiya chikwakulayi, tañenu nsona yimwaloñesha, kuhiñahu tañenu paragilafu yinakuhosha hanolu lwihu nawa hanjekenu nindi hakapinji kantesha.
Cheñi mwatela kuzatisha mafu akutachikilahu kulonda mumusañumuni mwiniitala, kuhiñahu mulejenu ñakwilu yamuBayibolu muniwu mukanda. Chakutalilahu, mwatela kuhosha hawubanji wadiñaku katataka washimunawu muchipapilu chansañu nawa mulejenu nenu antu eluka wanyi ñakwilu yamalwihu adi hefu 3. Hela mukuhosha nenu tunakwendela antuñinetu nakuhanjeka hayuma yayiwahi yikamwekana kumbidi. Kuhiñahu mulejenu nyevulu yidi hefu 4 ni 5 nawa mwihulenu nenu, “Chikaninu chimu chidi chimukukeña nenu chikashikijewi?” Njila yikwawu hoshenu nenu, munakwendela antu kulonda muyikwashi kuwana ñakwilu yamalwihu alema muchihandilu. Kuhiñahu mulejenu mwiniitala malwihu adi heshina hefu 6, nawa mwihulenu yatonduhu lwihu lunakeñiyi.
Zatishenu njila yakutachika kudiza Bayibolu halwendu lwatachi. Hoshenu nenu: “Tunakuhana iwu mukanda wutwazatishaña hakudiza Bayibolu kudi atuñinetu. Mwawumonahu dehi? [Mulekenu yaakuli.] Neyi mukuñiteja mukapinji kantesha, nukuyileja chitunateli kudiza muniwu mukanda kuzatisha Bayibolu yenu.”

Esekenu Iyi Njila Mukanu Kakweji:

Hitulukenu muniji njila hakudifukula kwenu kwachisaka.
Neyi mudi mwiha, lejenu mukwenu imunakuzata nindi mazu imwaloñesha. (Yish. 27:17) Himpenu ntachikilu yenu, neyi hiyinateli kuzatika chiwahuku.