Chakutachika Kudiza Bayibolu naWantu Yitwenkaña Magazini
1. Chikonkwanyi chitwatela kwikala nachu hakuhana magazini?
1 Kakavulu haMposu twahanaña Kaposhi Kakutalila niAwake! mumudimu wakushimwina. Hela chochu, iyi hinjila hohu yatachi yakushikija chikokwanyi chetu chakudizisha antu ashinshika chalala. Njila jinalondeluhu jikumwekesha chakuhana mukanda waChatañishaña Bayibolu hakufuntila nikutachika kudiza kwaBayibolu. Iji njila jatela kuhimpa kwesekeja nachidi iluña denu nawa mwatela kuhosha mumazu enu. Mwatela kuzatisha njila yikwawu yimunamoni nenu yikuzatika chiwahi.
2. Twatela kuzatisha ñahi mafu akutachikilahu amukanda waChatañishaña Bayibolu kulonda kutachika kudiza kwaBayibolu?
2 Zatishenu Mafu aKutachikilahu: Hampinji yakufuntilaku, mwatela kuhosha nenu: “Magazini yinayishilili yinakuhosha haBayibolu. Talenu chichalemena kutaña Bayibolu.” Tañenu Isaya 48:17, 18; Yowanu 17:3; hela nsona yikwawu yatelela. Kulondelahu, neyi munamuleji dehi mwiniitala mukanda waChatañishaña Bayibolu nakumwinka mukanda windi, mwatela kutwalekahu nenu:
◼ “Bayibolu yatwinkaña kuchiñeja kwalala kwakumbidi.” Mulejenu mwiniitala mafu 4 ni 5, nawa mwihulenu nenu, “Hakachi kaniyi yikaninu, chikaninu chimu chidi chimunakukeña nenu chikashikijewi?” Mulejenu kapetulu kanakuhosha hakukana kwamuNsona kwatondayi, nawa tañenu mukapinji kanti parakalafu yimu hela ayedi neyi neteji.
◼ Hela mwatela kuhosha nenu, “Bayibolu yakulaña malwihu alema nankashi muwumi.” Mulejenu hefu 6, nawa mwihulenu neyi wadihulahu dehi awa malwihu adi heshina. Bakulenu hakapetulu kadi nañakwilu, nawa hanjekenu parakalafu yimu hela ayedi mukapinji kantesha.
◼ Hadaha mwatela kuhosha hanyitu yikwawu yidi hayuma yidimu nawa mwihulenu mutu wunamutiyishi kuwaha. Bakulenu hakapetulu kanakuhosha hamutu wunasakuliyi, nawa mwekeshenu chakudiza Bayibolu mukapinji kanti.
3. Twatela kutachika ñahi kudiza kwaBayibolu hanyima yakuhana magazini yinakuhosha ha (a) kutaminaku kwayililu mukaayi? (b) chisaka? (c) chitwakuhwelela Bayibolu?
3 Ihulenu Lwihu haLwendu Lwatachi: Chuma chikwawu chimwatela kwila halwendu lwatachi hikwala chikuku chakufuntilaku. Neyi mwiniitala natambuli magazini, ihulenu lwihu, nawa mulejenu nenu mwakenza nakulwakula chimwakafuntaku cheñi. Loñeshenu chachiwahi kulonda mwakafuntiluku, nawa shenuku kashinshi kulonda mwakashikiji kukana kwenu. (Mat. 5:37) Neyi munafuntiluku dehi, mwanukishenu mwiniitala lwihu lumwehwili hatachi, nawa mukapinji kanti tañenu nikuhanjeka hañakwilu mumukanda waChatañishaña Bayibolu. Mwinkenu mukanda kulonda yayilondeleña. Talenu yakutalilahu yantesha:
◼ Neyi chakwila magazini yimwahanini yinakuhosha hakutaminaku kwayililu mukaayi, mwatela kuhosha nenu, “Mpinji yikwawu tukahanjeka hañakwilu yamuBayibolu yanilu lwihu, Kuhimpanyi kukaletayi Nzambi hamaseki?” Hakufuntilaku mulejenu mwiniitala mafu 4 ni 5. Hela mwatela kwihula nenu, “Komana kukala kunakumwekana hinkeñelu yaNzambi?” Hakufuntilaku, mulejenu mwiniitala parakalafu 7 ni 8 mukapetulu 1.
◼ Neyi chakwila magazini yimwahanini yinakuhosha hachisaka, henohu kanda muyi mwatela kwihula nenu, “Chumanyi chatela kwila muntu wejima muchisaka kulonda muchisaka mwikali muzañalu?” Hakufuntilaku hanjekenu haparakalafu 4 mukapetulu 14.
◼ Neyi chakwila magazini yimwahanini yinakuhosha hachitwatela kukuhwelela Bayibolu, mwatela kwihula ilu lwihu lumwakahanjekahu, “Komana Bayibolu yahoshaña choloka hansañu yasayansi?” Hakufuntilaku, hanjekenu parakalafu 8 mukapetulu 2.
4. Chumanyi chitwatela kwila neyi mwiniitala yakaana kutambula mukanda waChatañishaña Bayibolu?
4 Mpinji yejima yimukukumisha kuhanjeka, ihulenu lwihu lukwawu lumwakakula chimwakafunta. Chimwatachika kudiza kwampinji yejima, dizenu tupetulu twamumukanda mukulondashana kufuma hakapetulu katachi nakushika kunsa. Indi neyi mwiniitala yakaana kutambula mukanda waChatañishaña Bayibolu? Munateli kutwalekahu kumutwalilaña magazini nikuhanjeka nindi hansañu jamuBayibolu. Chimukusañumunaña mpwila yindi, mukuhita kwampinji wuketeja kudiza kwaBayibolu.
5. Muloñadi wutwatela kuzatila nañovu kubadika hakuyinka hohu antu magazini?
5 Kaposhi Kakutalila niAwake! yinateli kusañumuna mpwila yamuntu yakudiza chuma chacheni chatañishaña Bayibolu. Dichi, zatenu nañovu kulonda mutachiki kudiza Bayibolu nawantu atambulaña magazini. Muniyi njila, tukwovwahila nshimbi yaYesu ‘yakwilisha atumbanji . . . , nikuyileja.’—Mat. 28:19, 20.