Magazini Yadimena yaAwake! yaKuhana muNovember!
1 Antu amavulu akwetu malwihu alumbuluka kutalisha hakulema kwaBayibolu. Muloñadi Bayibolu chiyayitenenaña nawu Izu daNzambi, henohu ayisonekeli kudi antu? Muloñadi wunatela kukuhwelela Bayibolu kulonda yinlomboleña? Kuwahanyi kwekala mukutaña nikudiza Bayibolu? Bayibolu yimu yidihi yinatela kuzatisha? Awa diwu malwihu anakuliwu mumagazini yadimena yaAwake! yaNovember, yidi namutu wunakwila nawu: “Komana Munateli Kukuhwelela Bayibolu?”
2 Tunakukeña tukayihani chikupu iyi magazini yadimena yaAwake! mwiluña detu dejima. Neyi chinatwesheki, mwatela kuzatila hamu nachipompelu mumudimu wakushimwina kwitala nikwitala Mposu niMposu yakakweji waNovember. Hanenu iyi magazini yaAwake! kudi awusoku wenu, atuñi nenu, antu yimwazataña nawu, antañishi, akwenu akashikola, niantu yimwashikili kufuntilaku. Neyi mudi halwendu hela munakuya nakulanda sendenu mamagazini. Mutayi wunatemeshi magazini amakwawu kulonda yipompelu yitweshi kwikala namagazini amavulu.
3 Tachikenu Kudiza kwaBayibolu: Neyi muhana magazini, munateli kwala chikuku hakutachikila kudiza kwaBayibolu henohu kanda mukunkululi kuhanjeka. Chakutalilahu, munateli kuhosha nenu, “Chinakafunta nikayileja Bayibolu chiyakula ilu lwihu lwakwila nawu, ‘Chumanyi chafuukulayi Nzambi kwiseki?’” Dichi funtilenuku namukanda waChatañishaña Bayibolu nawa mulejenu mwiniitala mafu 4-5, hela tañenu maparakalafu 1-3 amukapetulu 3. Njila yikwawu mwatela kuhosha nenu, “Chinakafunta, tukahanjeka hawuprofwetu waBayibolu wunakushikijewa makonu.” Chimwafuntilaku, mulejenu mwiniitala kapetulu 9 kamukanda nawa hanjekenu nindi maparakalafu 1-3. Hela munateli kumuleja mwiniitala nenu: “Antu amavulu chayikalilaña kutiyishisha nsañu yiyatañaña muBayibolu. Chinakafunta, nikayileja chimwatela kutiyishisha Bayibolu yenu chachiwahi.” Chimwafuntilaku, mulejenu mukanda waChatañishaña Bayibolu, nakumwekesha chakudiza.
4 Bayibolu hohu diyi yikweti “nyikanda yajila,” yinatweshi kutuleja etu “maana akumona nachu wamwinu.” (2 Tim. 3:15) Dichi, wejima wetu tunakukeña kuzata nañovu hakuhana iyi magazini yaAwake! yadimena kulonda kukwasha antu akuhweleli Bayibolu!