Kuwahisha Njila Jetu Jakushimwinamu—Kumwekesha Chakudiza Bayibolu Kuzatisha Mukanda waChatañishaña Bayibolu

Chikwalemena: Izu dakwila nawu “kudiza” dalema wanyi kudi antu amavulu. Dayanukishaña yuma yakoñeleñawu kushikola yayineñesheleña yidi neyi kutaña, kuhembela nsañu kumutu, nyidimu yamushikola yakuzatila kwitala nikusoneka kweseka. Munjila yikwawu, antu amavulu anakusha muchima kuyuma yatela kuyikwasha kumanisha kukala kukwetuwu. Dichi, twatela kwiluka chakumwekesha chiwahi netu kudiza Bayibolu diyi njila yayiwahi nankashi yakwilukilamu kukala kweneni kunakumonawu.—Yish. 22:29

Chakwila:

Hanyima yakudimusha, mwihulenu mwiniitala neyi chakwila kudi yuma yinakwakamenayi nindi yikamumwekena kumbidi nichisaka chindi.
Hoshenu nenu antu amavulu niwena anakwakama, nawa mulejenu ifu dayuma yidumu mumukanda waChatañishaña Bayibolu. Mulumbulwilenu nenu iwu mukanda wudi nansañu yapela kutiyisha chatañishaña Bayibolu hayuma yakamwekana kumbidi ninsañu yikwawu, nawa mwihulenu yashimuni mutu wunakeñiyi.
Mwinkenu mukanda nawa yenu hakapetulu kanatondiyi. Mulumbulwilenu nenu malwihu adi hakutachika kwakapetulu anayakuli mumaparagilafu.
Mwilenu mwiniitala yatañi paragilafu yatachi neyi neteji kutaña. Kufumahu, ihulenu lwihu lwanoyu paragilafu nawa wanenu ñakwilu hamu. Tañenu nikuhanjeka nsona yidi yejima yinatenuwu muparakalafu yinesekani nañakwilu. Mulejenu chimwafunjeka ñakwilu mumukanda wenu.
Tañenu paragilafu yinalondelihu nawa mwilenu mwiniitala yakuli mumazu indi.
Musakililenu nawa tiyañanenu ifuku dimwakafunta nakumanisha kudiza.
Neyi munakeñi, mutalishenu vidiyo yidi ha jw.org/lun yinakuhosha nawu Yumanyi Yamwekanaña haKudiza Bayibolu?

Esekenu Kuzatisha Iyi Njila Mukanu Kakweji:

Lombenu kudi Yehova kulonda yakiswili nyidimu yenu yakufwila kutachika kudizisha antu Bayibolu.—Fwi. 2:13.
Esekenu kumwekesha chakudizisha antu Bayibolu kuzatisha mukanda waChatañishaña Bayibolu hela mwekeshenu vidiyo yaYumanyi Yamwekanaña haKudiza Bayibolu? hela tuhu kamu neyi munayi nakushimwina.