Chibaaba Chachiha Chikutukwashaña Hakutachika Kudizisha Antu Bayibolu
1. Chibaabanyi chachiha chakusonekañawu muKaposhi Kakutalila, nawa anachisoneki ñahi?
1 Kutachika nakakweji kanakwinza, muKaposhi Kakutalila kawantu amavulu mukwikalaña chibaaba chachiha chikutukwashaña hakutachika kudizisha antu Bayibolu. Chidi namutu wunakwila nawu: “Dizenu Nsañu Yidi Mwizu daNzambi.” Hela chakwila antu amakwawu mwiluña dakushimwina akudiluñishaña hakutaña ichi chibaaba chichikwidikaña, iyi yibaaba anayisoneki nawu yakuzatisha hakuhanjeka namwini itala.
2. Yumanyi yidi muniyi yibaaba?
2 Yuma Yidimu: Mutu wachibaaba ninyitu yanyanya anayisoneki mumalwihu kulonda twihuleña mwiniitala hakuhanjeka. Nsona hanashindameni yikuma anayiteni hohu, hiyanayisonekuku, kulonda mwiniitala yadizeña nsañu yidi Mwizu daNzambi. Mudi maparakalafu amehi kulonda mutweshi kuyihanjeka hayoyenoyu mpinji. Chibaaba chejima chinashindameni hamukanda waChatañishaña Bayibolu kulonda mutweshi kutachika kudiza muniwu mukanda neyi neteji.
3. Hakushimwina kwiitala nikwiitala, tunateli kuzatisha ñahi ichi chibaaba hakutachika kudiza nawantu Bayibolu hampinji yitunayiwani hetala katachi?
3 Chakuchizatisha: Neyi himukuhana magazini munateli kwihula lwihu lwaluwahi lukumuzañalesha mwiniitala hansañu yidi muchibaaba. Chakutalilahu, chibaaba chidi muKaposhi Kakutalila kaJanuary-March chinakuhosha hakulema kwaBayibolu. Munateli kumwihula nenu: “Komana Bayibolu mwayilemesha nenu Hiizu daNzambi ntahindi nenu himukanda wamuwahi hohu? [Mulekenu yaakuli.] Nidi nansañu yayiwahi yinakukeña kuyileja haniwu mutu.” Mulejenu lwihu lwatachi, tañenu parakalafu yatachi, nawa tañenu nsona yinashimunuwu. Tañenu cheñi lwihu, nawa mwihulenu mwiniitala yahoshuhu. Dizenu nsañu yinateleli, nawa zatishenu malwihu anashimuniwu nakuhanjeka hayikuma. Dichi henohu kanda muyi, mulejenu malwihu anashaluku nawa tiyañanenu mwakafunti nakuhanjeka hanowu malwihu. Funtilenuku kulonda mwakahanjeki hayibaaba yikwawu mulungu nimulungu kushika nimpinji yimukamuletela magazini yikahiñahu. Njila yikwawu yidi yakuhanjeka nindi hachibaaba kuhiñahu mukumuleja mwiniitala chitwadizaña Bayibolu. Zatishenu chibaaba chidi mumagazini kulonda mumuleji chitwadizaña.
4. Iyi yibaaba tunateli kuyizatisha ñahi hakufuntila kudi antu?
4 Munateli cheñi kuzatisha chachiwahi ichi chibaaba chachiha kudi antu imwatwalilaña magazini nikudi antu imwafuntilañaku. Munateli kuhosha nenu: “Munaka Kaposhi Kakutalila mudi chibaaba chachiha. Inakukeña kuyileja chimwatela kudiza ichi chibaaba.” Tunakuhweleli netu ichi chibaaba chachiha chikukwasha antu amavulu ‘kwiluka nsañu yalala chikupu.’—1 Tim. 2:4.