Komana Munakuzatisha Chikupu Kaposhi Kakutalila Kawantu Amavulu?
1 Hanyima yakutaña Kaposhi Kakutalila kaJanuary 1, 2008 kawantu amavulu muhela wumu wasonekeli nindi, “Inakufwila chikupu kukihana mwiha.” Komana mwatañaña yibaba yadimena yekalaña muKaposhi Kakutalila kawantu amavulu, nawa mwawana dehi njila yimwatela kukihaninamu mumudimu wakushimwina?
2 “Yuma Yitwadizilaña Kudi Yesu”: Hadaha munawani ichi chibaba nenu chikuyikwasha hakutachika kudiza kwaBayibolu. Neyi kanda mwili mwenimu, esekenu kumutañila mwiniitala mutu wachibaba nawa mulejenu chahosheliyi Yesu hanoyu nsañu neyi chinashimunuwu muparakalafu yatachi. Neyi muntu namwekeshi mpwila, fwilenu kutwalekahu nakuhanjeka kuhitila mukuzatisha nyitu yanyanya yekala neyi malwihu akusañumuna nachu. Mwilenu muntu yahoshuhu halwihu. Lumbululenu mukwihihisha mwevulu wunakundami hanoyu parakalafu, kufumahu yenu hayinalondeluhu. Munateli kuhanjeka chikunku chatachi chachibaba halwendu lwatachi nawa chimwakafuntaku munatweshi kuhanjeka chamuchiyedi. Diloñeshenu kulonda mutwalekuhu kudiza mumukanda waChatañishaña Bayibolu.
3 “Yuma Yaletaña Muzañalu muChisaka”: Iyi yibaba yamwekanaña neyi munahiti tukweji tusatu, ayiloñesha kulonda kukwasha amayala, ambanda nianvwali kwiluka chatela kuzatishawu nshimbi yamuBayibolu neyi anamoni kukala kwakañeshaña kuwunda kwamuchisaka. Munateli kuzatisha cheñi iyi yibaba hakukwasha antu abula kwikala aYinsahu kulonda eluki maana amuBayibolu.—2 Tim. 3:16, 17.
4 Yibaba Yawatwansi: Yibaba yinakwila nawu, “Chibaba Chawatwansi” yikukwasha antañi kutoñojoka hansañu yamuBayibolu yinateli kuzatishawu hakusandujola nsañu yamuBayibolu. Munateli kuzatisha iyi yibaba kulonda kukwasha atwansi yimwawanaña mwiha kulonda eluki kulema kwakudiza Izu daNzambi. (Mas. 119:9, 105) Neyi munakuhanjeka nawanvwali, munateli kukonkomwena hayibaba yamwekanaña neyi munahiti tukweji tusatu, “Dizishenu Anyanenu.” Iyi yibaba yinateli kukwasha atwansi kudiza yuma yalema yawantu amuBayibolu. Komana mwekala nampinji yakutaña iyi yibaba nawanyanenu?
5 Yibaba Yikwawu: Kakweji nikakweji, chibaba chinakwila nawu, “Malwihu Ehulaña Antañi” chahoshaña halwihu lwatela kwihulawu antu abula kwikala aYinsahu. Hampinji yakuhana magazini kwitala nikwitala munateli kukonkomwena hanichi chibaba. Chibaba chinakwila nawu, “Mukanda Kufuma Kudi . . . ” hichileji chamuntu yamweni chinakumwekesha kukala kwamonañawu amishonali niantu amakwawu mumudimu wakushimwina. Iyi yibaba yinateli kukwasha antu adi nampwila yakudiza chalala kwiluka nawu nsañu yayiwahi ayishimwinaña mukaayi kejima, kulonda kushikija chinjikijilu chakwinza kwaKristu.—Mat. 24:3, 14.
6 Chibaba chasonekañawu kakweji nikakweji, “Kundamenu Kwakwihi naNzambi,” chashindamena hakutaña Bayibolu kwaShikola yaMudimu waTeokalatiki, chinateli kusañumuna antu ashinshika kudiza hadi Yehova. Yibaba yinakwila nawu, “Imbujolenu Chikuhwelelu Chawu,” yamwekanaña kapampa kawana hachaaka, ayisonekaña kulonda kukwasha antu kufwikija nsañu yamuBayibolu, nakwilisha antu amuBayibolu, yuma yafuukwiluwu, kukala kwamwenuwu, nichikuhwelelu chawu neyi chinakuzatika kudi antañi amakonu.
7 Twatiyaña kuwaha kutambwila Kaposhi Kakutalila kaloñeshawu kuzatisha mumudimu wakushimwina kakweji nikakweji. Dichi, twilukenu chikupu nsañu yejima yidumu nikukizatisha nankashi mumudimu wetu wakushimwina.