Kuhimpa Kwakuwahi kwa Kaposhi Kakutalila!
1Kukutachika kwachinu chaaka, yipompelu yatambwilili kubidika kwakuzañalesha kwakwila nawu: Kutachika muJanuary 2008, Kaposhi Kakutalila kakekalaña munyitapu yiyedi yashiyashana, Kaposhi kamu kakekalaña kawantu amavulu nawa kakwawu kakekalaña kawana kwetu awiniKristu! Hadaha mwadiña nakutoñojoka nenu: ‘Chambwinyi chikekala hadi awa mamagazini ayedi? Kuwahanyi kudihu hakwikala namagazini ashiyashana? Mwakekalahu yuma yayiha munawa magazini amaha tahindi?’
2 Chaambu Chidihu: Kaposhi katachi kakedikaña hakakweji twakakitenaña netu Kaposhi Kakutalila Kawantu Amavulu. Yibaba yejima yamunaka Kaposhi akayisonekaña kulonda kukwasha antu amavulu. Kaposhi Kakutalila ka 15 kakedikaña hakakweji twakakitenaña netu Kaposhi kaKudizamu nawa hitwakakihanaña mumudimu wamwihaku. Kakekalaña nayibaba yejima yakudizamu kakweji kamukuma cheñi niyibaba yikwawu yatela kukwasha eniKristu adihana. Kaposhi Kakutalila Kawantu Amavulu hikakazañaleshaña aYinsahu hohuku, ilaña kakazañaleshaña nankashi antu abula kwikala aYinsahu alemesha Bayibolu. Ilaña Awake!, yikutwalekahu kuhosha hadi antu ejima, kushilahu akwakujinooka niantu ekala munsakililu yabula kwikala yawiniKristu. Iku kuhimpa kwakuha kunakundami hohu kuKaposhi Kakutalila kedikaña kayedi hakakweji.
3 Kuwaha Kudihu: MuKaposhi kaKudizamu, himwakakeñekaña kulumbulula mazu adi neyi “payiniya” munjila yakwila antu abula kwikala aYinsahu atweshi kutiyaku. Munaka kaposhi mwakekala cheñi nsañu yashikila chikupu yikaloñeshelañawu sweje-e aYinsahu jaYehova niatudizi aBayibolu anakukulilaku lwakuspiritu. Indi Kaposhi kaWanta Amavulu? Chineli nsañu ninsonekelu yikashindamenaña hadi antu amavulu, muntu wabula kwikala Chinsahu watela kudiluñisha kutaña magazini yejima. Hela chochu, aYinsahu jaYehova ejima akaheteleñamu mukutaña kaposhi kejima kakedikaña. Chineli tukahanaña hohu Kaposhi Kakutalila kamu niAwake! mumudimu wamwiha kakweji nikakweji, mukakweji kamukuma tukazatishaña jinjila jajiwahi jakuhaninamu.
4 Yibaba Yayiha Yidimu: Mukaposhi Kakutalila Kawantu Amavulu anafuukuli kushamu yibaba yayiha. Chibaba chimu chikahoshaña hantañishilu yalema yamuNsona munjila yapela. Chibaba chikwawu chikahoshaña haBayibolu chiyatela kukwasha yisaka. Akashañamu nsañu yawatwansi yakudiza Bayibolu. Kaposhi kejima kakedikaña kakekalaña nachibaba chikahoshaña hansañu yimu yamuBayibolu yatwidizishaña hayililu yaYehova.
5 Tunakulomba netu Yehova wukukiswila iyi ntanjikilu yayiha yaKaposhi Kakutalila. Tunakuhweleli netu iyi magazini hamu niAwake!, yikashimwina nsañu yayiwahi kudi antu amavulu ashinshika.—Mat. 10:11.