Magazini Etu Ayisonekaña Munjila Yatela Kukokola Antu Ashiyashana
1. Indi izaza danduñu wamaana nikashinshi damwimbujolaña ñahi kapostolu Pawulu?
1 Neyi chochahimpileñayi kapostolu Pawulu njila yakushimwinamu nsañu yayiwahi kulonda yakokoli “antu ejima,” izaza danduñu wamaana nikashinshi dazatishaña magazini etu kulonda kushimwina nachu antu ayitachi yashiyashana nawa akuhwelela yuma yamboka. (1 Kor. 9:22, 23) Hakwila nawu tuzatishi chiwahi Kaposhi Kakutalila niAwake! twatela kwiluka mazanvu awantu asonekelañawu awa magazini.
2. Indi Awake! ayisonekelaña nawu yikokoleña antu amuchidinyi?
2 Awake!: Iyi magazini ayisonekelaña kulonda yikokoleña antu adifwana nawantu ashimwininiyi kapostolu Pawulu hampinji yahosheleñayi ‘nawamayala akwaAtenisi.’ (Yil. 17:22) Ana antu hiyelukili ntañishilu yawakwaKristuku, nawa hiyelukili Nyikanda yajilaku. Chochimu Awake! ayisonekelaña antu eluka nsañu yantesha hohu yamuBayibolu hela abula kwiluka. Hadaha eluka wanyi ntañishilu yawakwaKristu, indi kwiji akuhwelela wanyi munsakililu hela eluka wanyi nawu Bayibolu yalema. Nkeñelu yayeni yasonekelañawu Awake! yekala yakushinjila antañi kulonda eluki nawu Nzambi walala wekala kwoku. Nkeñelu yikwawu yekala yakukolesha chikuhwelelu muBayibolu nikukwasha antañi kwiluka nawu aYinsahu jaYehova ambukaku namazanvu ansakililu jikwawu.
3. Antu amuchidinyi asonekelañawu Kaposhi Kakutalila kakudizamu nikawantu amavulu?
3 Kaposhi Kakutalila: Antu asonekelañawu Kaposhi Kakutalila kawantu amavulu amulemesha Nzambi niNyikanda yajila. Eluka nsañu yikwawu yamuBayibolu ilaña hiyatiyishaña chikupu ntañishilu yachuku. Adi neyi antu ateneniyi Pawulu nindi ‘amwakamaña Nzambi.’ (Yil. 13:14-16) Kaposhi Kakutalila kakudizamu akisonekelaña aYinsahu jaYehova. Pawulu welukili nindi antu atañileña nyikanda yindi adiña eluka Nyikanda yajila ninsañu yalala. (1 Kor. 1:1, 2) Hohamu, yibaaba yekalaña muKaposhi Kakutalila kakudizamu ayisonekelaña antu enzaña nakupompa nawa eluka nhoshelu yawaYinsahu.
4. Muloñadi wutwatelela kwiluka nsañu yidi mumagazini ejima itunakuzatisha mwiha?
4 Hela chakwila twahanaña magazini ejima ayedi, twahoshaña hohu hamagazini yimu neyi tunakuhana. Dichi mwatela kwikala nachikonkwanyi chakwiluka nsañu yidi mumagazini ejima. Chumichi chikuyikwasha kuhana magazini yikukokola antu imukuwana.